”Sanaartortitsisoq takkuteriataassagaluarpat, sianerfissaqartuaannarluni toqqissisimanaqaaq”

Ukiuni kingullerni 40-uni sinneqartuni Sukkertoppen Rør Sulisitsisuni ilaasortaasimavoq. Suliffeqarfimmut piginnittumut ilaasortaaneq isumaqarpoq, inatsisilerinikkut siunnersorneqarsinnaanissami toqqissisimaneq aammalu pisinnaasanik immikkuullarissunik piginnaanilinnit ulluinnarni ikiorserneqarsinnaanissaq.

Rasmus Barud Thomsen-imit allataq

Jesper Thyregod Baarsgaard Jensenip ukiup ataatsip affaatalu matuma siorna suliffeqarfik tigugamiuk, Sulisitsisuni ilaasortaaneq ataannartinneqarpoq.

Suliffeqarfik 1982-imi aallartittoq, aallartikkamili ilaasortaasimavoq, ilaasortaanissallu ingerlatiinnarnissaa Jesper-mut apeqquserneqarsinnaasutut inissisimanngilaq.

Suliffeqarfiup ingerlatilikkami saniatigut Maniitsoq El Service aamma ingerlataraa, taannalu 2010-miilli siuuttuufigilersimavaa. Suliffeqarfiit taakkua marluullutik sulisut 20-25 missarpiaani sulisoraat – tamarmillu Sulisitsisuni ilaasortaallutik.

”Ilaasortaajuaannarsimavugut. Siornatigut suliarinnittussarsiortuni neqeroornermi pisariaqartarsimavoq, ullutsinnili sulisunut atugassarititaasunut isumaqatiginninniarnermi aammalu inatsisitigut maleruagassanut tunngassutilinnut ilaasortaaneq iluaqutissartaqarpoq, tamatumanilu Sulisitsisut tunuliaqutarineqartuarsinnaasutut inissisimapput, tassami tamakkunani ikiortariaqalissagaluarutta naatsorsuutigiuarsinnaavagut”, oqarpoq.

Sanileqartuarnissaq pisariaqarpoq

Jesper Thyregod Baarsgaardimut inatsisitigut siunnersorneqartuarnissaq eqqartueqateqartuarnissarlu pingaaruteqartorujussuupput.

Oqaaseqarnermini naqissuserpaa, nammineq assassortuunini annermillu inatsisitigut ilisimasaqarpallaarani, tamannalu aamma atorfinititsisarnermi maleruagassani malunnartarluni – taamaattumillu ikiorserneqarasuarnissaq toqqissisimanartumi inissisimalluni.

”Sanaartortitsisut annerit ilaat inatsisilerituuni ilagalugit takkutissagaluarpat, uannut pitsaasuuvoq illersortigisinnaasannut sianerluni saaffissaqartuarnissaq”, oqarpoq.

Tamannalu aamma atuuppoq suliassani annikinnerusuni, tamatumani inatsisitigut aammalu atorfinititsisarnernut tunngassutilinnut saaffissaqartuarnissaq.

Toqqissisimanartoq
Suliassami aaliangersimasumi atorfinitsinneqarlaaq soraarsittariaqarsimavaa, atorfinitsinneqarnerata kinguninngua paasinarsimammat atorfimminut tulluutinngitsoq.

Oqarporlu tamanna annertuumik illuatungeriinnut kalluaasimasoq.

”Advokatinik atuinissaminut ilimasaaruteqarpoq, uangalu iliusissaarulluinnarlunga paatsiveerutingajappunga. Taamaasimmallu Sulisitsisunut sianerpunga. Taakkua naatsumik  paatsuugassaanngitsumik nassuiaassipput, qanoq iliussasunga aammalu soraarsitama suut pisinnaatitaaffigigai. Paasisakka ingerlateqqippakka – suliassarlu tassani naammassivoq”

Jesper Thyregod Baarsgaard Jensenimut pisut tamakkorpiaat naqissusiisuupput ilaasortaanerup pingaaruteqarluinnarneranut.

”Immikkut ilisimasalimmut sianeriaannaaneq ersarissumillu akissutisisinnaaneq pingaaruteqassutsimigut nalilerneqarsinnaanngillat. Taamaasillunga unnuakkut eqqissillunga sinissinnaanngorpunga – allamillu saaffiginnissutissaqassagaluaruma sianeriaannaallunga nalunngilara.”

Ulluinnarni ikiorserneqarsinnaaneq

Inatsisitigut siunnersorneqarsinnaanissap saniatigut, ilaasortaanermi iluaqutissat nalinginnaanerusut saqqummiuppai.

Ilaasortaanermi iluaqutissat ilagaat, sulisorisaq illoqarfigisaminut ilisiartortariaqalissagaluarpat – taannaavoq ilaasortaanermi aaqqissuussaq ilaareersoq, ilaasortaanermi akiliisarnermi toqqagassatut ilanngunneqarsinnaasoq.

”Tamanna periarfissaq iluareqaarput. Tassami sulisorisaq qanoq pisumik siumut utimullu timmisartussagaluarpat, uatsinnut akisoorujussuanngorsinnaagami”, oqarpoq.

Sulisussanik amigaateqarpoq
Suliffeqarfinnullu taakkununnga marluusunut unammillernartuni annerpaatut taaneqarsinnaasoq allaalluinnarpoq.

Jesper Thyregod Baarsgaard Jensen naapertorlugu, pisinnaasamikkut naleqquttunik pigisalinnik sulisoqalersinnaanissaq ”ajornartorsiutaasorujussuuvoq”.

Tassani sarfalerisut kalaallit aammalu nunani allaneersut eqqarsaatigineqarput, ilinniarnermi aqqut unammillernartutut inissisimasinnaasarmat.

”Kalaallit Ilinniartut amerlasuut uniinnartarput, tassani tunngaviusut annersaraat ilinniarneq Danmarkimi ingerlanneqartarmat. Tassanilumi aamma piumasaqaataammat, danskisut atuarsinnaanissaq oqalussinnaanissarlu – uatsinnimi aamma taamaammat”, oqarpoq.

Ilinniarneq taannarpiaavoq Sulisitsisunit pitsanngorsaaviginiarlugu iliuseqarfiginiarneqartoq, Jesper-lu qularutiginngilluinnarpaa ajunngitsumik kinguneqassasoq. Sulisussaaleqivoq, kisiannili suliassaaleqinani. ”Suliassaaleqinngeqaagut – aamma Sukkertoppen Rør-imi. Taamaattumik naammagittaalliuutissaqanngilanga. Taamaattorli, - oqareerpunga ilinniarsimasunik sulisussanik amigaateqarpugut”, oqarpoq.