Pisiffik: ”Tamatigut imminuinnaq eqqarsaatiginissatsinnut akissaqanngilagut”

Pisiffik 800-t  missaanni sulisoqarluni Kalaallit Nunaanni suliffeqarfiit anginersaasa ilagaat. Inuussutissarsiutit suliffeqarfiit ataatsimoorutigisinnaasaannik unamminartoqartitsiniarneranni angissuseq akisussaaffeqarnermik pisortaanermut Per Steen Larsen-imut aamma kinguneqarpoq.

Rasmus Barud Thomsen-imit

Unammilleqatigiittoqarluarsinnaavoq peqatigitillugulu  atorfissaqaqatigiilluni.

Per Steen Larsen, Pisiffimmi ukiuni kingullerni 16-ini pisortaanerusoq suliffeqarfiup Sulisitsisuni ilaasortaanera pillugu taamatut oqarpoq.

Tassami suliffeqarfiit pisisartunik niuerfinnilu tuniniakkanik unammilleqatigiissuteqaraluarlutik, peqatigitillugu assigiinnik unamminartoqartitsipput.

Tamassumalu Per Steen Larsen malillugu ajornartorsiutit immikkuutitaarluni aaqqinniarsarinagit ataatsimoornissaq tunngavissaqalersippaa.

” Tamatigut imminuinnaq eqqarsaatiginissatsinnut akissaqanngilagut. Ataatsimoornissarput pingaartuuvoq,” oqarpoq. 

”Piginnaasaqarluartunik inuussutissarsiuteqarneq pingaartuuvoq, suliffeqarfiillu katersuutinnissaat pingaartuuvoq, taamaalilluta assigiimmik oqariartuuteqartarniassagatta. Pisiffik suliffeqarfiit angisuut ilaattut sinaakkutaasunik atugassanut aamma akisussaaffeqarpoq, taamaammallu Sulisitsisuni ilaasortaaneq pingaartuuvoq”, oqarpoq.

Sulisitsisut Per Steen Larsen malillugu pissutsit inuussutissarsiutinut tamanut pingaaruteqartut pillugit inuussutissarsiutit immikkoortui akimorlugit suleqatigiinnissamik periarfissiipput.

Ilaatigut siuariartorneq, suliffissaqartitsineq aamma unammillersinnaassuseqarneq pineqarput..

”Sulisitsisut inuussutissarsiornermi siuariartortitsinermut sunniinissamik suliassaqarput, tamannalu inuussutissarsiutit immikkoortuinut tamangajannut atuuppoq. Suliffeqarfiit Sulisitsisut aqqutigalugit akimut suleqatigiinnissamik periarfissaqarput,” oqarpoq.

Ulluinnarni toqqissisimaneq
Pisiffimmi sulisut 800-t missaaniittut niuerfinni pissutsini nalinginnaasorujussuarmik initupput.

Taamaammat sulisut sulisitsisullu isumaqatigiissutaat ilaasortaanermi aamma iluaqutaalluinnartuusut Per Sten Larsen-ip erseqqissarpaa.

Derfor fremhæver Per Steen Larsen også overenskomsterne som en helt konkret fordel ved medlemskabet. 

”Sulisitsisut isumaqatigiissutigut isumaqatigiissutiginiartarmatigit sulisitsisuni ilaasortaaneq isumannaatsuuvoq, toqqissisimanarpoq ilorrisimaarnarlunilu,” oqarpoq.

Pisiffiup kattuffik aamma inatsisilerinermi akulikitsumik atortarpaa.

”Sulisitsisunik inatsisilerinermi ikiortitut atuisarnitsinnut isumasioqatigiittarnernullu assersuutissarpassuaqarpoq.

Karsten Klausen Sulisitsisuneersoq, suliffeqarfiup inatsisilerinermi ajornartorsiutinut atatillugu suliffeqarfiup akulikitsumik atortagaa immikkut oqaatigaa.

Tassami suliffeqarfimmi Pisiffittut ittumi apeqqutinik inatsisilernermi ikiorteqarnissamik pisariaqartitsiviusunik ingerlaavartumik takkuttoqartarpoq. Pisiffik ilaasortaanermigut ikiorteqanngikkuni taarsiullugu inatsisilerinermik ilisimasaqartunik nammineq atorfinitsitsisariaqassaaq imaluunniit avataanit akiliilluni siunnersorneqartassalluni.

”Ilaasortaanermut akiliutip ilagaa, tamannalu uagutsinnut toqqissisimanartorujussuuvoq”, Per Steen Larsen oqarpoq.

Pisiniarfiit amerlanerusut ilaasortaasariaqarput 
Inuussutissarsiutit immikkoortui amerlanerit Per Steen Larsen malillugu Sulisitsisuni ilaasortaagaluartut, katuffiup annertusisitsinissamut periarfissaqarnera takusinnaavaa: pisiniarfiit.

Tassani pisiniarfiit ikingaatsiartut ilaasortaapput.

Peqatigitillugu isumaqarpoq, inuussutissarsiortut namminneq ilaasortaanermi iluaqutit pillugit pisiniarfinnut mikinerusunut oqaluttuarnissamut pikkorinnerusinnaasut.

”Sulisitsisuni ilaasortaarnermi iluaqutit siammarnissaat pikkoriffiginikuunngilarput. Taamaammat sunik pissarsiaqarsinnaaneq tamarmik paasinngilaat,” oqarpoq.

Per Steen Larsen malillugu ilaasortaanermut akiliut pisiniarfimmut mikinerusumut annertuallaanngilaq, ilaasortaanermilu ilaatigut sulisut aamma suliffeqarneq pillugu inatsisini apeqqutit pillugit inatsisilernermi ikiuisoqarsinnaavoq siunnersuisoqarsinnaallunilu.

“Pissutsinik Sulisitsisut tunuliaqutiginerat iluaqutaasumik ingerlaavartumik takkuttoqartarpoq, pisiniarfinnillu piginnittut ilaasortaalernissaat inassuteqaatigiinnarsinnaavara.”

Sulisussaaleqineq 
Pisiffimmi initoorujussuarmik unamminartoqarpoq – tamannalu Kalaallit Nunaanni inuussutissarsiutinut allanut aamma atuuppoq.

Sulisussaaleqisoqarpoq.

Pisiffik Per Steen Larsen malillugu sulisussaaleqisuartarpoq – tassunga ilanngullugit sulisunik piginnaasalinnik.

Piffissaq sivisunerusoq eqqarsaatigalugu, salliutillugu ilinniartitaaneq pitsaanerusoq kissaatigaa, taamaalilluni atorfiit inuttaqanngitsut amerlanerusut sulisunit Kalaallit Nunaanneersunit inuttalerneqarniassammata.

Tamassumali aaqqinnissaata sivisunissaa unamminartuuvoq. Taamaammat peqatigitillugu isumaqarpoq, sulisut pisariaqartut Kalaallit Nunaanni pissarsiarineqarsinnaanngippata avataaneersunik sulisussarsiortarnissamik suliffeqarfiit periarfissaat pitsaanerusariaqartut.

“Sulisussaaleqineq suliassaavoq suliffeqarfiit, Sulisitsisut Kalaallit Nunaanni inuussutissarsiutit siunissami pisariaqartitaannik sulisoqassappat ataatsimut aaqqinnissaata peqataaffigisassaat.