Naalakkersuisut Kalaallit Nunaata, USA-p Danmarkillu akornanni isumaqatigiissut pillugu inuussutissarsiortunut ilisimatitsipput

Sapaatip-akunnerani qaangiuttumi Naalakkersuisut Siulittaasuata, USA-p præsidentiata Danmarkillu ministeriunerata Kalaallit Nunaata illersorneqarnera pillugu isumaqatigiissummik atsioqatigiinnerat takuarput. Isumaqatigiissummi 1951-imi Kalaallit Nunaata illersorneqarnera pillugu isumaqatigiissut nutarterneqarpoq, peqatigisaanillu Kalaallit Nunaat isumaqatigiissummi peqataasutut ilanngunneqarluni.

Isumaqatigiissummi immikkoortumi 4-mi Kalaallit Nunaanni inuussutissarsiortut USA-p Kalaallit Nunaanni illersornissamut atatillugu suliaanut pilersuisinnaanerat pineqarpoq, immikkoortumilu 10-mi aningaasaliissutinut ataatsimoortumik periuseq pineqarpoq. Taamaammat isumaqatigiissummi arlalitsigut inuussutissarsiornitsinnut, taamaalillunilu aamma najukkani inuiaqatigiinnut, pingaaruteqartunik imaqarpoq.

Siullermik isumaqatigiissut Inatsisartut akuersissutigisussaavaat. Tamatuma kingorna Naalakkersuisut isumaqatigiissutip imarisai, pingaarutai periarfissaalu pillugit inuussutissarsiortut oqaloqatiginissaat kissaatigaat. Sulisitsisut Naalakkersuisunik qanimut oqaloqateqarput, oqaloqatigiinnerullu aaqqissuunneqarneranut ikiuutissallutik.

Naalakkersuisut oqaloqatigiinnissamut qaaqqusissutaat qilanaaraarput, isumaqatigiissullu Inatsisartut akuersissutigereerpassuk naalakkersuisoqarfik pineqartoq suleqatigalugu ataatsimiinnissamut imaluunniit ataatsimiinnernut attuumassuteqartunut aggersaanissamut peqataassaagut.

Paasissutissiisarfitsigut assigiinngitsigut paasissutissiissuteqartassaagut. Isumaqatigiissut pillugu apeqqutissaqarussi, ga@ga.gl-imut saaffiginninnissassinnut tikilluaqqusaajuaannarpusi.