Blue Water: ”Unammilligassavut immikkuullarisuunngitsut paasivarput”

Blue Water 2000-kkunni Kalaallit Nunaanni Sulisitsisunut ilaasortanngorpoq. Ullumikkut Senior Manager Søren Hansenip ilaasortaanermi iluaqutit pingaarnerit ilaattut erseqqissarpai inatsisitigut siunnersorneqarsinnaaneq, sulinermi atugassarititaasut pitsaasut kiisalu najukkami inuussutissarsiortut akornanni attaveqaqatigiinneq nukittooq.

Allattoq: Rasmus Barud Thomsen

Umiarsualivimmi kilisaatit usingiarneqaraangata, nioqqutissat illoqarfimmut illoqarfimmiillu assartorneqaraangata imaluunniit najukkami suliffeqarfinnut suliassat assigiinngitsut naammassineqaraangata, Blue Water suliffeqarfiit ingerlatsinermut pingaarutilimmik inissisimasut ilagaat.

Blue Water nunarsuaq tamakkerlugu assartuussinermik logistikkimillu ingerlatsiviusoq Kalaallit Nunaanni 120-t missaannik sulisoqarpoq, Nuummi, Aasianni, Qaqortumi, Sisimiuni Ilulissanilu immikkoortortaqarfeqarluni. Aasianni suliassat assartuussinermit nassiussanillu isumaginninnermit eqqiaanermut, errorsisarnermut nuunnermilu sullissinermut tunngasuupput.

Tassani Søren Hansen, Senior Manageritut Aasianni Ilulissanilu immikkoortortaqarfinnut akisussaasoq, sulivoq.

Blue Water 2000-kkunni Kalaallit Nunaanni Sulisitsisunut ilaasortanngorpoq. Søren Hansenimut ilaasortaanermi pingaaruteqarput inatsisitigut toqqissisimaneq, sulinermi atugassarititaasut pitsaasut kiisalu suliffeqarfiit allat attaveqarfiginissaannut periarfissat.

”Ataatsimoornerup ilaginerata saniatigut sulisoqarnermut tunngasunik inatsisitigut ikiorneqarsinnaaneq pingaaruteqarpoq. Aamma isumaqatigiissutinut ataatsimoorussanut peqataaneq pingaaruteqarpoq, taamaalilluta sulisutsinnut atugassarititaasunik pitsaasunik neqerooruteqarsinnaalluta aammalu ataatsimoorussanik malittarisassaqarluta,” oqarpoq.

Aqutsisunut sulisunullu toqqissisimaneq

Isumaqatigiissutit ataatsimoorussat atorfinitsitaanermilu isumaqatigiissutit allaganngorlugit aalajangersarneqarsimagaluartut, malittarisassat qanoq paasineqarnissaat pillugu nalornisoqarsinnaasarpoq, Søren Hansen nassuiaavoq.

Assersuutigalugu sulisut tapisiaqartitaanerat imaluunniit atorfinitsitaanermut tunngasut allat pillugit apeqqutit saqqummersinnaasarput.

”Ilaatigut aalajangersakkat qanoq paasineqarnissaat imaluunniit sulisup tapinik aalajangersimasunik pisinnaatitaaffeqarnersoq pillugu apeqqutit puttuttarput. Taamaattoqartillugu Kalaallit Nunaanni Sulisitsisunit isumaqatigiissutit ataatsimoorussat atorfinitsitaanermilu isumaqatigiissutit qanoq paasineqarnissaannut siunnersorneqarsinnaavugut,” Søren Hansen oqarpoq.Taanna erseqqissaavoq nammineq sulisoqarnermut tunngasunik aaqqiagiinngissutinik annertuunik nalaataqarsimanngikkaluarluni, immikkut ilisimasalinnit naliliiffigineqarsinnaaneq ulluinnarni pingaaruteqartoq.

”Sulisoqarnermut aqutsisutut Sulisitsisunit siunnersorneqarsinnaanerma toqqissisimatippaanga. Aamma sulisut sukumiisumik akineqaraangamik toqqissisimanerulersartut malugisarpara. Tamanna qujamasuutigisarpaat,” oqarpoq.

Suliffeqarfiit isumaqatigiissutinut annertuunut neqerooruteqartillugit, neqerooruteqartitsinerup ingerlanneqarnera pillugu isumaqatigiinngittoqassagaluarpat, kattuffimmit ikiorneqarsinnaaneq aamma iluaqutaasinnaavoq.

”Taamatut pisoqartillugu suut tamarmik malittarisassat naapertorlugit ingerlanneqarsimanersut pillugit ikiorneqarsinnaaneq pitsaasuuvoq,” oqarpoq.

Najukkami peqatigiiffimmi nutaamik uummaarissuseq

Ilaasortaanerli isumaqatigiissutinut ataatsimoorussanut inatsisitigullu siunnersorneqarnermut taamaallaat tunnganngilaq.

Søren Hansenimut najukkami inuussutissarsiortut akornanni ataatsimoorneq aamma pingaaruteqartorujussuuvoq.

”Najukkami inuussutissarsiortut akornanni attaveqaqatigiinnermik nukittorsaataavoq, suliffeqarfiit naapillutik misilittakkaminnik avitseqatigiissinnaallutik aammalu imminnut siunnersoqatigiissinnaallutik,” oqarpoq.

Aasianni inuussutissarsiortut peqatigiiffiat ingerlalluartoq aammalu ilaasortat peqataalluarnerat Søren Hansenip maluginiarpaa. Ukiualuit matuma siorna peqatigiiffimmi kinguaariit nikinnerat pivoq, tamannalu taassumunnga peqatigiiffimmut nutaamik nukissamik pilersitsisimavoq aammalu suliffeqarfiit assigiinngitsunik suliaqartartut nutaat ilaasortanngortissimallugit.

Ilaatigut suliffeqarfik mikinerusoq inuit attaveqaqatigiittarfiinik suliaqartoq peqatigiiffimmut ilaasortanngorsimavoq.

”Taakku peqatigiiffimmut ilanngunnerat nuannertuuvoq. Suliffeqarfinnut angisuunut aammalu inuussutissarsiutinut ileqquusunut naleqqiullugit allaanerusumik naatsorsuutigisaqarput aammalu eqqarsartaaseqarput,” oqaluttuarpoq.

Søren Hansen naapertorlugu suliffeqarfiit angissusaat, misilittagaat aammalu suliaqarfii assigiinngitsut ataatsimooraangata, isiginnittaatsinik nutaanik pilersitsisarpoq.

Unammilligassat amerlanertigut assigipput

Søren Hansen aperineqarami suliffeqarfiit allat Kalaallit Nunaanni Sulisitsisunut ilaasortanngornissaannik kaammattussanerlugit, akissutaa erseqqippoq.

”Aap, soorunami kaammattussavakka. Ingammik attaveqaqatigiinneq aammalu inatsisitigut siunnersorneqarsinnaaneq pingaaruteqarluinnartutut isigaakka,” oqarpoq.

Ilaasortaanerup suliffeqarfiit allat aammalu taakkua piginnaasaasa ilisimasaqarfiginerulernissaannut periarfissiisarnera aamma erseqqissarpaa.

” Tassaanngilarmi klubbi matoqqasoq, kisermaassilluni ataatsimiittarfimmi akigitinneqartut pillugit isumaqatigiiffiusartoq. Suliffeqarfiit allat ilisarisimanerulernissaat, nioqqutissiaat pillugit ilisimasaqarnerulernissaq aammalu ulluinnarni qanoq suleqatigiilluta ikioqatigiissinnaanersugut paasiniarnissaa pineqarpoq.”

Suliffeqarfiit assigiinngitsorujussarnik suliaqaraluartut ataatsimooraangata, iluaqutissaq alla aamma saqqummertarpoq.

”Paasivarput unammilligassavut immikkuullarisuunngitsut. Ajornartorsiutit nalaattakkavut suliffeqarfinnit allanit aamma nalaanneqartarput. Taamaalilluta misilittakkavut tunngavigalugit immitsinnut ilinniarfigisinnaavugut,” Søren Hansen oqarpoq.