Sulisitsisisuni Qaammammi matumani Suliffeqarfitsialak tassaavoq Relatepeople

Relatepeoplep tunuliaqutaaniippoq Julia Pars 2021-mi suliffeqarfimmik tunngaviliisoq, tassunga anguniagarisimallugu ukiuni 25-ni Kalaallit Nunaanni aqutsinermik aamma siulersuisuni sulisimanermit misilittakkat atorlugit siunnersortitut pikkorissaasartutullu ataatsimoorussamik suliffeqarfinngortinnissaa. Siunertaq ersarissoq: aqutsineq pitsanngorsarlugu aammalu aaqqissugaasuni kalaaliusuni suleqatigiinnerup pitsanngorsarnissaa, taamaasiornikkut ineriartornermik piviusumik ataavartussamillu pilersitsisinnaaniassammata.

Relatepeople ulluinnarni suliffeqarfiit aaqqissukkallu periusissiornermi inerisaanermik, aqutsinermi allannguinermik, aqutsisunik inerisaanermik, suleqatigiiaalluni suliaqarnermik, ataavartitsinermik ESG-millu, misissueqqissaarnernik kiisalu ataatsimiinnermik, isummersoqatigiinnernik ataatsimeersuarnernillu ikiuilluni suliaqartarpoq. Juliap assut pingaartippaa ingerlaatsit aaqqiissutillu ilusilersorneqartut sullitat piviusumik atugaannut naapertuunnissaat, taavalu ulluinnarni naleqalersinnissai, allattorsimaffimmi pilersaarutit kusanartut kisiisa pigineqannginniassammata.

Ilulissani inunngortoq, nunamut tamarmut atuuttoq

Julia Pars Ilulissani inunngortuuvoq, kalaallisut, danskisut tuluttullu oqaaseqartuusoq, taavalu kalaallit suliffeqarfiini kulturit, oqaatsit pissutsillu ilisimasaqarfigilluartuullugit. Piginnaasaq tamanna sullitat noqqaassutigisartagaraat, pissutigalugu oqaatsit, kulturi aammalu nunap isorartussuserujussua illoqarfiit nunaqarfiillu akimorlugit suleqatigiinnermut qitiusumik pingaaruteqartuummata.

Relatepeople Juliamit ingerlanneqartuuvoq, kisianni attaveqaatini siunnersortit misilittagartuut aammalu immikkut ilisimasallit pisariaqartittarpai, taamaasilluni suliassat sukumiinerusumik piginnaasaqarfigisariaqakkat suliassaqarfiit akimorlugit eqqortumillu itisilikkamik suliassaqarfiusut suliarineqarsinnaasarput.

Sulisoqarnermut tunngatillugu ajornartorsiutit nalinginnaasumik aaqqinneqarsinnaanngitsut sukumiinerusumik pisariaqartitsiviusarput

Kalaallit Nunaanni suliffeqarfiit sulisoqarnermut ajornartorsiuteqarput, sumiiffinni amerlasuunit annertunerusumik. Suliffeqarfiit killeqartut aammalu suliassaqarfinni sulisut naammaginartumik piginnaasallit amigaatigineqartut sulilersitsinermut, suliinnartitsinermut aammalu aqutsisunik sulisunillu inerisaanissamut qitiusumik periuseqarnikkut suliassaqarfiupput - sulisoqarnermut tunngatillugu aaqqitassaannanatik.

Tamatuma saniatigut aaqqissugaanerit amerlasuut ingerlaavartumik allannguuteqarlutik ingerlapput, aqutsisut allannguinermik, atugarissaarnermik atassuteqarnermik suliaqarput saniatigullu sammiviliinermik ingerlatsinermillu suliaqartariaqarlutik. Tassani Relatepeople periusissiamik, ingerlaaseqartitsinermik, ilinniartitsinermik qanimullu avitseqatigiinnermik sullissisarpoq.

Periuseq tatiginninnermik piginneqatigiinnermillu tunngaveqartoq

Relatepeoplep allaassutigivaa Kalaallit Nunaanniit pitsaasumik aqutsinermit siulersuisunillu misilittagaqarmat, nukittuumik ingerlaaseqarlunilu ineriartortitsisartoq, aaqqissugaanerup piviusumik atugai aalajangersimasut aallaavigalugit ingerlatsilluni.  Juliap sullitani qanimut suleqatigisarpai sullitaasalu tatiginninneq, oqaloqatigiinneq aamma piginneqatigiinneq pingaartitaraat. Ineriartorneq aaqqissugaaneq ingerlaqatigalugu ingerlanneqassaaq, suliffimmi inissisimaffiit pisariaqartut peqataatillugit, taamaasiornikkut allannguineq sorlaqartutut atuussinnaaniassammat.

Assersuut, Juliap assut tulluusimaarutigaa ingerlatsineq sivisunerusoq, periusissiaq, aqutsisutut ineriartorneq aammalu suleqatigiiaallu ataqatigiisinneqartut misissueqqissaarnerit, aqutsisut isummersoqatiginneri, ilinniartitsineq aammalu ingerlaavartumik avitseqatigiinneq aqqutigalugit. Angusaq tassaavoq ataatsimoorussamik aaqqissukkamik anguniagaqarneq, ammanerusumik suleqatigiinneq aammalu aqutsisut suliaqarfimminni ersarinnerusut, taavalu suleqatiminnut ersarinnerusumik sammiviliisinnaallutillu malitseqarsinnaassuseqalersut.

Kalaallit Nunaanni siunissami sulinerup ilusilersorneqarnerannut trendit

Julia trendinik arlaqartunik  takusaqarsinnaavoq nunatsinni suliffeqarfinnut ilusilersuisussanik: ataavartitsinissamik qitiutitsineq aamma ESG, suliffeqarfimmi periusissiatut aammalu avatangiisinit piumasaqaatitut. Tamatuma saniatigut sulisussat piginnaasallu pillugit unammineq isumaqassaaq aqutsineq, atugarissaarneq, eqaassuseq aammalu ineriartornissamut periarfissat unammillissutitut suli pingaarnerulissasut.

Digitaliseriineq, akuleriisillugit suleqatigiinnerit, peqataasunut annertunerusumik naatsorsuuteqarnerit kiisalu attuumassusikkamik aqutsineq ineriartornermut aamma sunniuteqassapput. Aaqqissugaanerit iluatsittut tassaassapput periusissianik ersarissunik pilersitsisut, nukittuunik atassuteqartut aammalu sulinerup tungaatigut peqatigiinnerit ilikkarfiusut pilersissinnaagaat.

Relatepeople ukiut tallimat qaangiuppata

Ukiut tallimat qaangiuppata Julia Parsip Relatepeople suli nukittunerusoq takorloorpaa, aammalu Kalaallit Nunaanni suliffeqarfinni pisortat pigisaanni namminersortunilu suli atorneruneqartoq. Nunatsinni aaqqissugaanerni qanoq aqutsinermi, periutsini, allanngueriaatsini aammalu ataavartitsinermi pitsaassusermut inisseeqataanissaq anguniagaavoq.

Anguniagaanngilaq anginerpaanngornissaq, kisianni pitsaassutsimut, iluamik suliaqarnermut aamma sunniuteqarnermut kiisalu nunamut tamarmut ineriartortitsinermut peqataanissamut anguniagaavoq.

Ingerlatserusussuseq

Inuttut Julia Kalaallit Nunaanni aqutsineq pitsaasoq, nukittunerusumik suleqatigiinneq aammalu periutsikkut ilisimaaraluni toqqaaneq aqqutigalugit pitsaasumik ineriartortitsinermut kissaateqarluni piumassuseqartuuvoq. Sinaakkutit, sammivik ataqatigiinnerillu inissilluarneruleraangata inuit aaqqissugaanerillu iluatsittut takussallugit assut piumassuseqarfigaa.

"Uannut siunnersortitut sulineq atassuteqarnermut tatiginninnermullu tunngavoq. Suleqatigisaq tatiginartoq, tusarnaartartoq, apeqqusersuisartoq aammalu aalajangiinerit iliuuseqartitsisunngornissaannut ikiuutaasoq - minnerunngitsumillu angusaqarneq," Julia Pars oqarpoq.

Relatepeople naleqartitanit tunngaveqarnermit sanaajuvoq, suleqatigiinneq, akisussaaneq, unneqqarissuuneq ataqqinninnerlu qitiusumik tunaartaqarfiusut. Qanorluunniit periutsimik ineriartortitsinermik, allanngueriaatsinut, aqutsinermut, ataavartitsinermut imaluunniit aaqqissukkanut angisuunut ingerlatsinermut tunngagaluarpata anguniagaq ataasiuvoq: Kalaallit Nunaanni suliffeqarfiit aaqqissugaanerillu anguniakkatik angussagaat inunnut inuiaqatigiinnullu ataavartumik naleqalersitsisussamik.