Periarfissanik isumaqatigiissut aammattaarli uagutsinnik eqqarsaatiginnittoq

New Yorkimi ataatsimiinneq ippassaq malinnaavigilluarpara.

Kalaallit Nunaata, Danmarkip USA-llu isumaqatigiissutaat alloriarneruvoq pingaarutilik Kalaallit Nunaata siunissami attaveqarneranut periarfissaanullu.

Sulisitsisut Peqatigiiffianni siulersuisuni siulittaasutut isumaqatigiissutip inuussutissarsiornermik ineriartortitsinissamut aningaasaliinissamullu periarfissat ammaanneqartut kisiisa nuannaarutigiinnarnagit aammali naleqartitavut maanna suleqatigiinnermi ersarissumik allassimalersut nuannaarutigaakka.

Nuannaarutigaara isumaqatigiissummi allassimammat suleqatigiinnerup tunngavigigai demokratii, atugarissaarneq inuillu pisinnaatitaaffii. Tamanna uannut pingaaruteqarsimavoq, ilimagaaralu tamanna kalaallinut amerlasuunut suliffeqarfinnullu ilaasortaasunut ersiutaassasoq.

Isumaqatigiissummi aamma nassuerutigineqarsimavoq Kalaallit Nunaata siunissaa, nunanut allanut attaveqarneq isumannaallisaanerlu pillugit apeqqutit nunatsinni innuttaasunit soqutigineqarluartut. Taamaattumik pingaaruteqarpoq isumaqatigiissummi piffissaq ungasinnerusoq eqqarsaatigalugu siunissamut isiginninneq aamma isumannaallisaanermut politikkimut attuumassuteqartut eqqartorneqarnissaat. Ingammik maluginiarpara isumaqatigiissummi NATO-mut siunissami atassuteqarnissaq allaaserineqartoq, aamma ullormi namminiilivinnissamik aalajangiussiffiusumi. Tamanna oqallinnermi piffissami kingullermi tamatta sammisaqarfiusartumi pingaarutilimmik erseqqissaataavoq.

Isumaqarpunga isumaqatigiissut kalaallit inersimalluarlutik ataqqeqatigiillutillu nunanut allanut tunngasutigut politikkiannut ersiutaasoq, periarfissanik, suleqatigiinnermik ataatsimullu naleqartitanik ataqatigiissitsisoq. Kalaallit Nunaat nukittunerpaassaaq inuiaqatigiinni nutaamik periarfissaqalerutta tamatumalu peqatigisaanik naleqartitavut nunanut allanut attaveqarnitsinnut ilisarnaataasut aalajangiusimajuarutsigit. Neriuppunga siunissamut qiviassagutta maanna eqqissisimasinnaalissasugut, pitsaasunillu nukittuusunillu sinaakkutissatsinnik ilusilersuilluta aalajangiissagattalu uagutsinnut siunissatsinnullu iluaqutaasunik.

Krissie Winberg Berthelsen
Sulisitsisut Peqatigiiffianni siulersuisuni siulittaasoq