Godthåb Transport service: ”Inuussutissarsiortut tusaaneqarnissaat Sulisitsisunit qulakkeerneqartarpoq”

Ukiuni 61-ini Godthåb Transport service Nuummi inuussutissarsiornermi suliffeqarfittut piusimavoq. Pisortaanermut, Niels Pedersen-imut, Sulisitsisunut ilaasortaaneq tassaavoq, sulinermut sulisitsinermullu atugassarititaasunut, inatsisit tungaatigullu siunnersorneqarsinnaaneq aammalu inatsisit nutaat takkutilernerini suliffeqarfiit oqariartuutaasa apuunneqartarnerinut toqqissisimmassuteqarneq.

Rasmus Barud Thomsen-imit allataq.

Godthåb Transportservice ulapaarfiuvoq.

Ukiup ingerlanerani ulapaarfiulluartartoq aallartereerpoq, suliffeqarfiullu sulisui 25-iusut, suliassaaleqinngeqaat. Tassami sanaartortut sullitaraat aammalu umiarsuit takornariartaatit eqqagassalerinerlu aammalumi kranersuarnik aammalu kivittaatinik mikinerusunik attartortitsinerit.  

”Suliassagut siammaseqaat, sunalu tamarmi ingerlarsorpoq” Niels Pedersen pisortaanerusoq oqarpoq, taanna suliffimmi ukiuni 15 missaaniittuni siuuttuusimalereerpoq.

Upernaaq Godthåb Transportservice, Nuuk Transporimiit pisiarineqarpoq. Ukiut arlallit pisiarinninnissaq inissinniareerlugu pisiaraat. Niels Pedersen-ip alloriarneq tamanna suliffeqarfiup alloriarnerani pissusissamisoortutut isigaa.

”Kinguaariit nikinnerannik tamanna taasariaqarpoq, tassami inuusunnerit maanna tigusiartuaarput. Tamanna suliffeqarfimmut pitsaasuuvoq”, oqarpoq.

Akissaatit allallu tungaatigut siunnersorneqarneq
Niels Pedersen-imut Sulisitsisunut ilaasortaanissami tunngavilersuutaasut pingaaruteqarluinnartullu ilagaat; kattuffiup akissaatitigut allatigullu isumaqatiginniartarnerni inissisimasarnera.

Tassami Sulisitsisut aamma SIK, taakkuupput isumaqatigiissutaasussanik isumaqatiginniniartartuusut, isumaqatigiissutaasartullu taakkuusarput suliffeqarfimmi akissarsiat atugassarititaasullu tungaatigut sinakkutaaliisartut.

”Uagutsinnut pingaaruteqaqaaq, akissarsiat aammalu atugassarititaasut allat ajunngilluinnartumik ingerlanissaat, tassanilu Sulisitsisut aaliangiisuulluinnartarput”, oqarpoq.

Taakkua saniatigut suliffeqarfiup kattuffik isumasioqatigiinnertigut atorluartarpaa, soorlu maleruagassat tungaasigut apeqquteqaatini imaluunniit isumaqatigiissutaasut qanoq paasineqassanersut inissinniartarnerini.

”Inatsisitigut apeqqutinut tunngassuteqarsinnaapput imaluunniit allarluinnarmut tunngasuusinnaalluni, sianerfigigaangatsigit erngertumik akisarpaatigut. Tamanna iluarluinnartuusarpoq, taamaasilluta uagut piffissaq pitsaanerusumik atorsinnaalersarparput, taamaasillutalu ingerlaqqipallassinnaasarluta”, Niels Pedersen oqarpoq.

Nipi pingaarutilik
Niels Pedersenimut toqqaannaq siunnersorneqarsinnaaneq kisiartatut ilaasortaanermi iluaqutissatut naleqartinneqanngilaq.

Tikkuarpaami Sulisitsisut suliffeqarfiit sinnerlugit suliarisartagai, soorlu nutaamik inatsisiliortoqassatillugu suliffeqarfinnut sinniisuusarneri aammalu suliassat tungaasigut ersarissumik qulaajaasinnaasarnerat, taamatullu aamma maleruagassiaasunut tunngatillugu, taakkuuppummi suliffeqarfiit ulluinnarni ingerlanneqarini sunniisinnaasartut.

Pingaarnertut aamma taava kattuffiup tusarniaanerni peqataasarnera aammalu tamat oqartussaanerini oqallinnermi peqataasarnerat. Taakkunanimi inuussutissarsiuteqartut isumaat isinngeriaasaallu saqqummiuttarpaat. Taamaasilluni sinnerluta pisortaqarfinnut politikerinullu isummatsinnik apuussisuusarlutik.

”Inuussutissarsiortunut pitsaasuuvoq, avataatungerisatsinni qanoq pisoqarnersoq malinnaaffigisinnaallugu. Tamannalu suliassaq pingaaruteqaqaaq, tamannalu Sulisitsisunit kivilluarneqartarpoq”,  oqarpoq.

Maleruagassat Kalaallit Nunannut tulluutissapput

Assersuut piviusoq unaavoq, aqqusinikkut angalassissutinik misissuinerit. Qanittukkut Godthåb Transportservice aqqusinikkut angallannermi aqutsisoqarfimmik ataatsimeeqateqarpoq. Ataatsimiinnermilu eqqartorneqarput inatsisisat lastbilinut atuutilersussat.

Tassanerpiaq Sulisitsisut suliffeqarfiit aammalu pisortaqarfiit akornanni attaveqaatitut inissisimasimavoq.   

”Maleruagassat Danmarkimiit EU-milluunniit nunatsinnut nuuginnarsinnaanngilagut atuutsinneqlersillugillu. Taamaattumik aqqusinikkut angallannermi aqutsisoqarfik marloriarluta ataatsimeeqatigilluarsimavarput, tassani Sulisitsisut akunnermuliuttuulluarsimapput, taamaasillutalu tusaaneqarsimalluta. Tamanna uatsinnut pingaaruteqarpoq”, Niels Pedersen naggasiivoq.