26/02/2026
Frederikshåb Betoncentral: ”Ataatsimoortariaqarpugut, taamaanngippat ipisinneqassaagut”
Ukiuni 60-inngulersuni Betoncentral Paamiut Sullissisuni ilaasortaavoq. Tamassumani tunngaviulluinnarpoq: Namminersorlut...
Sulisitsisut suliniutinut nutaanut, suliffeqarfiit nunatsinneersut periarfissaasa pitsaanerulernissaannik siunertaqartunut, tapersersuivoq. Arctic Excursions-ip nutaamik suliniutaa tamanna pillugu assersuutissaalluarpoq.
Tallimanngornermi juunip ulluisa 5-anni Nuummi Hotel Hans Egedemi tikilluaqqusilluni aaqqissuussinermi Sulisitsisut peqataavoq, tassani Arctic Excursions-ip nittartakkani nutaaq kiisalu takornariartunut paasissutissiisartut inniminniisarfissallu nutaaliaasut saqqummiullugit. Suliniutip siunertaraa takornariat misigisassanut nunatsinneersunut takussutissaqarluarnerulersinnissaat kiisalu taakku toqqaannartumik inniminnernissaannik ajornannginnerulersitsineq, taamaalillunilu nunatsinni takornarialerinermik ingerlatsisut amerlasuut iluaqutissarsitinneqarlutik.
Nunami takornarialerinermik ingerlatsisut tunisaqarnerulernerat
Standerit nutaat aqqutigalugit takornariat misigisassanik neqeroorutigineqartunik sukkasuumik takunnissinnaapput ingerlaannartumillu inniminniillutik. Platformip nukittuffiisa pingaarnerit ilagaat paasissutissat ataavartumik nutarterneqartartut, tassani angalanissat suut periarfissaasut kiisalu inissaqarfiit qanoq amerlatigisut suli atorneqarsinnaanersut takuneqarsinnaallutik.
Tamanna takornarialerinermik ingerlatsisunut iluaqutaavoq, pissutigalugu pilersaarusiorneq pitsaanerusumik ingerlanneqarsinnaammat aammalu angalanermi ataatsimi isertitaqarnerunissaq anguneqarsinnaalluni, inissaqarfiimmi pitsaanerusumik atorneqarsinnaammata.
Takornarianut platformi nutaaq angalanermik eqaannerusumik periarfissiivoq, assersuutigalugu Nuummiittoq Ilulissani angalanissaminik minutsialuit ingerlaneranni pilersaarusiorsinnaalluni inniminniillunilu.
Standerit maanna HHE Express-imi, Nuummi Hotel Hans Egedemi kiisalu Ilulissani Hotel Arctic-imi ikkussuunneqareerput, angalanissallu siulliit inniminnerneqareerlutik.
Maannakkut takornarialerinermik ingerlatsisut 41-t platformimut ilanngutereerput, taakkulu katillutik nunatsinni tamarmi angalanissanik 200-ngajannik neqerooruteqarlutik.
Greenland Travel-imi pisortaq Mikkel Søndergård ima oqarpoq:
“Standerit nutaat aqqutigalugit takornariat naapinnerisa kiisalu digitalikkut inniminniisarnerit akornanni attaveqarnermik pilersitsivugut. Peqatigisaanillu paasissutissat ataavartumik takuneqarsinnaasut ammasumik ingerlatsinermik pilersitsipput, taamaasilluni tikeraat aalajangiisinnaanerat sukkanerulersillugu – aammalu suleqatitsinnut nunamiittunut toqqaannartumik iluaqutaasumik.”
Nunap immikkoortuini periarfissat nutaat
Sulisitsisut pitsaasutut isigaa suliniutip nutaap illoqarfiit anginerpaat avataanni ineriartortitsinermik aamma nukittorsaammat. Taamatuttaaq suliniut Naalakkersuisut aammalu Visit Greenland-ip Takornariaqarnermut Sektorplanianut 2025-2035-mut toqqaannartumik tapertaavoq, tassani siunertarineqarmat “takornariaqarneq pitsaanerusoq takornariaqarnerunermit pingaarneruvoq.”
Takornarialerinermik ingerlatsisut ilaat qanittukkut anguniakkamik taassuminnga malinnilersussat ilagaat Qaqortumi suliffeqarfimmik nutaamik aallartitsisoq, Marco Bendt Geisler Sikemsen, NOMAD Expeditions ApS-ip piginnittua. Sulisitsisut tikilluaqqusilluni aaqqissuussinermi Marco naapinnissaa nuannaarutigaa, suliffeqarfimmillu piginnittunngoqqammersup nuannaarnera ersarilluinnarluni.
NOMAD Expeditions Arctic Excursions-imut suleqatigiinnissamik isumaqatigiissuteqaqqammerpoq, qanittukkullu angalanissanik neqeroorutini platformimi tuniniaanermut ilanngutissallugit.
Marco, NOMAD Expeditions ApS-ip piginnittua, ima oqarpoq:
“Qaqortumi suleqatigiinneq taanna uatsinnut pingaaruteqarpoq, takornariat innuttaasullu maanna angalanissagut ajornannginnerusumik nassaarisinnaallugillu inniminnersinnaammatigik. Tamanna takuneqarsinnaassuserput nukittorsarpaa aammalu tikeraarnernut amerlanerusunut periarfissiilluni.”
Takornariaqarnikkut inuussutissarsiutinik ineriartortitsinermut alloriarneq pingaarutilik
Sulisitsisut tungaanit Arctic Excursions-ip suliniutaa takornariaqarnikkut aningaasaqarnikkut aaqqissuussaanerusumik pissarsiarinissamullu ajornannginnerusumut pitsaasumik tapertaasutut isigineqarpoq.
Misigisassanik nunamiittunik inniminniineq ajornannginnerulerpat, naliliisarfiit tamakkerlugit iluaqutaasussaavoq – ingerlatsisoq ataasiakkaaq tikitassarlu tamakkerlugu.
Sulisitsisuni pisortaq Christian Keldsen suleqatigiinnerup pingaaruteqassusia pillugu ima oqarpoq:
“Tamanna suliffeqarfiit angisuut mikisullu suleqatigiillutik qanoq angusaqarsinnaanerat pillugu assersuutissaavoq pitsaasoq. Platformi ingerlatsisunut nunamiittunut periarfissanik nutaanik ammaavoq aammalu nioqqutissatik tikeraanut saqqummiunnissaat ajornannginnerulersillugu. Tamatuma kingunerisaanik takornarialerinermik ingerlatsisut piginnaasaminnut pingaarnerpaamik, tassa Kalaallit Nunaata kusanartup takutinnissaanut, annertunerusumik ukkatarinnissinnaapput.”
Arctic Excursions-imut tuniniaanermut platformi nutaaq kiisalu standerit kusanartut pillugit pilluaqquagut. Taamatuttaaq nunatsinni takornarialerinermik ingerlatsisut tamaasa sulilluarnissaannik kissaappagut.
Arctic Excursions pillugu Greenland Travel-ilu
Arctic Excursions Greenland Travel-imut ilaavoq, taanna Kalaallit Nunaanni angalanernik aaqqissuussisartut annersaraat. Ataatsimoorlutik sulissutigaat takornariaqarnerup ineriartortinneqarnissaa, nunanit allaneersunik tikeraartunik aammalu misigisassanik neqerooruteqartunik nunamiittunik pitsaanerusumik ataqatigiilersitsinikkut.
Arctic Excursions-ip platformi ataatsimoorussaq aqqutigalugu angalanissanik nunamiittunik katersisuuvoq, takornarianut misigisassanik nassaarniarneq inniminniinerlu ajornannginnerulersillugu. Taamaaliornikkut suliffeqarfiit nunamiittut ineriartortinneqarnerat tapersersorneqarluni.
