24/09/2026
Nunatsinni inuussutissarsiornermi suliffeqarfiit suleqatigiinnissamut Narsarsuullu ineriartornissaanut piareersimapput
Helle Binzer-imitAmerikarmiut Narsarsuarmi sakkutooqarfissaannik nutaamik pilersaarutit oqallisigineqalerput. Kisian...
Ukiuni 40-ni sinneqartuni Narsaq Auto aamma VVS Sulisitsisuni ilaasortaasimapput. Pisortamut Lisa Hansen-imut ilaasortaaneq tassaavoq, paasinnissinnaasumik isummersoqateqarsinnaanissaq, ulluinnarni suliffeqarfiit mikinerit unammillernartuni nalinginnaanngitsuni annikilliorfigisinnaasaanni.
Rasmus Barud Thomsen-mit allataq
Lisa Hansen kinguaariit nikinnerannik ingerlatsileruttorpoq, tassami suliffeqarfik ataataminit tigusussanngoramiuk.
Taamaasilluni ukiorpaalunngortuni Sulisitsisuni ilaasortaasimaneq aamma ingerlateqqittussanngorlugu, tamannami ilaasortaasimaneq 1980-ikkunnili aallartissimavoq.
Suliffeqarfik soorlu VVS-imik suliaqartartuuvoq aammalu mekanikerit suliassaannik ingerlataqartarluni. Ukiorlu kaajallallugu sulisoqartarluni.
Lisa Hansen nammineq suliffeqarfimmi 2007-imili sulilersimavoq, taamaasillunilu ukiuni taakkunani Sulisitsisut iluaqutigilluartarsimallugit.
”Iluartuaannarpoq siunnersorneqartariaqartilluni sianerfissaqartuarsinnaanissaaq. Annermik apeqqutinut inatsisilerinermut, sillimasersimanermut, ilinniartunut atorfinititsisarnernullu tunngasuni. Tamakkunani Sulisitsisunit ikiorserneqarluartarsimaqaanga”, oqarpoq.
Nammineq pikkoriluinnarfiginngisanut ikiorserneqarsinnaaneq.
Ilaasortaanerup naleqassusaa Lisa Hansen-imut uaniippoq; sukkasuumik oqaloqatigisinnaasamik paaseqatigiiffiusumik isummersoqatigiissinnaanissaq, tamannami suliffeqarfittut angivallaanngitsutut pisariaqarluinnarsinnaasarpoq – suliffeqarfiarannguullutami sutigut tamatigut pikkoriffeqarneq ajoratta.
”Pikkorilluinnaqqissaarfiginngisagut amerlaqaat. Sullitanut tunngassuteqarput aammalu soorlu piffissaq eqqorlugu akiliineq ajortut assigisaallu. Taava qanoq isiortoqassava?” Oqarpoq.
Taamaattumik toqqissisimanartilluinnarpaa Sulisitsisut attagivineqarsinnaanerat aammalu akissutissanik eqqortunik pissarsiffigisinnaasarneri. Naak, nammineq akissutaa nalunngilluinnareeraluarlugu:
”Sullinneqaqqittariaqanngillat taava”, illariarluni oqarpoq.
Nuup avataani atugassarititaasut
Ataatsimut isigalugu Lisa Hansen isumaqarpoq Sulisitsisut suliffeqarfinnut tamaginnut nunami tamarmi pingaaruteqarluinnartuusoq – aamma Nuup avataani.
Ilanngullugu taavaa, suliffeqarfippassuit piffinni sivisusinnaasartumi suliassaqarniarneq aammalu politikkikkut soqutigineqarneq assoralisimaarfigisaraat.
”Pisariaqarpoq, Nuup avataani unammillernartut ukkatarineqarnissaat. Inoqarfiit amerlaqaat ineriartorfiujunnaarsimasut”, oqarpoq.
Lisa Hansen malillugu ineriartorneq piffissap ingerlanerani pissusissamisoorunnaarsimavoq.
”Siornatigut suliffeqarfiit amerlanerusimagaluarput, illoqarfiillu mikinerit uummaarinnerusimagaluarlutik, kisiannili suliffinnik matooraanerit ingerlanneqarsimaqaat imaluunniit Nuummut nuussorneqarsimallutik. Suna tamarmi annikillisimaqaaq, illorpassuillu inoqaratik”, oqarpoq.
Uummarissaasoqarnerunissaa kissaatigaa.
Lisa Hansen nammineq Narsami peroriartortuusimavoq, neriupporlu tamaani ineriartorneq ilorraap tungaanut ingerlajumaartoq.
Soorlu suliniutit, suliffeqarfiillu Nuup avataani pinngorarnissaat ujartorpaa.
”Neriuppunga politikerertatta paarilluarnerulerumaaraatigut, nunatsinnilu uagut najugarisatsinni annerusumik uummarsaasoqarumaartoq”, oqarpoq.
