Sulisitsisut aamma Vinnuhúsið Atlantikup Avannaani suleqatigiinnertik nukittorsarpaat

Nuuk, 1. oktobari 2026

Sulisitsisut (GE) aamma Savalimmiuni sulisitsisut inuussutissarsiortullu kattuffiat Vinnuhúsið nutaamik suleqatigiinnissamik isumaqatigiissuteqarput. Isumaqatigiissutip siunertaraa Kalaallit Nunaata Savalimmiullu akornanni inuussutissarsiornikkut ineriartortitsineq aamma inuussutissarsiornermut politikkikkut suleqatigiinneq nukittorsassallugit. Isumaqatigiissutikkut kattuffiit marluk Atlantikup Avannaani unammilligassat periarfissallu ataatsimoorussat pillugit qaninnerusumik suleqatigiinnissaat aalajangersarneqarpoq.

Kalaallit Nunaat Savalimmiullu nunatut aningaasaqarnerat mikisuuvoq nunarsuarmullu ammasuulluni, aalisarnerlu, avammut tunisassiorneq, assartuineq aamma avammullu niuerfiit annertuumik pingaaruteqarlutik. Suleqatigiinnissamik isumaqatigiissut nutaaq aqqutigalugu illuatungeriit ilisimasanik avitseqatigiinneq, misilittakkanik paarlaasseqatigiinneq aamma suliassaqarfinni nunat taakku marluk assingusunik unammilligassaqarlutillu periarfissaqarfiini ataatsimoortumik soqutigisanik aallussineq nukittorsarniarpaat.

Suleqatigiinnermi ilaatigut pineqarput aalisarneq, sulisinnaasut aamma ilinniartitaaneq, sanaartorneq, attaveqaasersuutit, assartuineq aamma logistikki, illersornissaq aamma upalungaarsimaneq, digitaliseringi aamma qarasaasiatigut silassorissuusiaq (AI), takornariaqarneq kiisalu inuussutissarsiornermut soqutigisat allat ataatsimoorussat, soorlu qarasaasiatigut isumannaallisaaneq aamma piujuartitsineq.

Sulisitsisuni pisortap Christian Keldsenip isumaqatigiissut nunat taakku marluk akornanni attaveqatigiinnerup nukittup ineriartortinneqarnerani pissusissamisoortumik alloriarnertut isigaa:

"Kalaallit Nunaat Savalimmiullu imminnut ilinniarfigisinnaasaat amerlapput. Unammilligassarpassuit assingusut nalaattarpavut, aammali periarfissarpassuaqarpugut. Isumaqatigiissut manna aqqutigalugu inuussutissarsiortut akornanni suleqatigiinneq nukittorsassavarput, Atlantikullu Avannaani inuussutissarsiornikkut ineriartortitsinissamut tunngavik suli nukittunerusoq pilersissallugu."

Christian Keldsenip aamma erseqqissarpaa inuussutissarsiornermut politikkikkut suliassat aalajangersimasut pillugit nukinnik ataatsimoortitsineq immikkut pingaaruteqartoq:

"Sulisinnaasut, attaveqaasersuutit, digitaliseringi aamma upalungaarsimaneq pillugit misilittakkanik paarlaasseqatigiinnermi ataatsimoortunillu aaqqiissutissanik ineriartortitsinermi periarfissarujussuaqarpoq. Atlantikup Avannaa tamakkerlugu suleqatigiikkaangatta suliffeqarfiutivut nukittunerusumik inissisimalertarput, peqatigiillutalu siuariartornissamut ineriartortitsinissamullu sinaakkutinik pitsaanerusunik pilersitsinissamut tapersiisinnaavugut."

Isumaqatigiissummi aamma niuernermut delegationenik, avammut niuernermik siuarsaanernik, inuussutissarsiornermik siuarsaanermut suliniutinik kiisalu Kalaallit Nunaanni Savalimmiunilu suliffeqarfiit akornanni attaveqaqatigiinnernik annertunerusumik suleqatigiinnissamut periarfissat ilaapput. Suleqatigiinneq kattuffiit marluk akornanni ukiumoortumik killiffik pillugu ataatsimiinnerit aqqutigalugit malitseqartinneqartassaaq.

Sulisitsisunut suleqatigiinneq Atlantikup Avannaani attaveqaqatigiinnernik nukittorsaanermut aamma kalaallit suliffeqarfiinut periarfissanik nutaanik pilersitsinermut pingaaruteqartumik tapertaavoq, piffissami nunap immikkoortuani suleqatigiinneq, pilersuinermi isumannaassuseq aamma piujuartitsisumik inuussutissarsiornikkut ineriartortitsineq annertunerusumik ukkatarineqarneranni.

Sulisisut aamma Vinnuhúsið pillugit uani annertunerusumik atuarsinnaavutit:

www.sulisitsisut.gl aamma www.industry.fo