21/08/2026
DALO Industry Days 2026
Ukiuni qulikkaani kalaalllit suliffeqarfiutaasa illersornissaqarfiit sullitariuartarsimavaat. Uani pineqarput danskit aa...
Elise Bruunip angalatitsivini Travel by Heart pilersikkamiuk, siunnersorneqarsinnaanissaq Sulisitsisunut ilaasortanngornissaminut pissutaasut pingaarnerit ilagaat. Kingorna ilaasortaanini takornariaqarnerup ingerlanneqalerneranut sunniuteqaqataanissamut kiisalu suliffeqarfiit allat peqatigalugit suleqatigiinnerup nukittorsarnissaanut periarfissatut aamma atulerpaa.
Elise Bruun angalatitsivimmik Travel by Heart-imik aallartitsigami, amerlasuunik isumagisassaqarsimavoq. Takornariaqarneq angalanerillu pillugit misilittagaqaraluarluni, namminersortutut nutaajulluni inatsisit, isumaqatigiissutit kiisalu suliffeqarfimmik ingerlatsinermut tunngasut assigiinngitsut amerlasuut ilisimasaqarfigisariaqarpai.
Travel by Heart suliffeqarfimmit inummit ataatsimit ingerlanneqartumit angalatitsivinngorsimavoq, Kalaallit Nunaannut angalanernik ataasiakkaanut naleqqussakkanik aaqqissuussisarluni, inuttut siunnersuineq najukkamilu pissutsinik ilisimasaqarneq ingerlatsinermi qitiutillugit.
2021-mi suliffeqarfik Sulisitsisunut ilaasortanngorpoq. Taamanikkut Elise Bruunimut immikkut pingaaruteqartoq tassaavoq ilisimasalinnit siunnersorneqarsinnaanissamut periarfissaq.
”Aallartikkama pingaaruteqartorujussuuvoq siunnersorneqarnissannut saaffissaqarnissara. Paasivara Sulisitsisut aqqutigalugit taamatut periarfissaqarsinnaallunga,” oqaluttuarpoq.
Suliffeqarfiulli ineriartortinneqarnerata ingerlanerani ilaasortaanerup iluaqutissartai amerlanerulersimapput.
Inatsisitigut ikiorserneqarnissaq pisariaqartinneqaraangat
Angalatitsivittut Travel by Heart malittarisassanik assigiinngitsunik malinnittussaavoq, ilaannikkullu apeqqutit nalinginnaasumik inuussutissarsiummik annertunerusumik ilisimasalimmit pisariaqartitsiffiusut saqqummertarput.
Elise Bruunip ilaatigut tikeraartunut akileraarutip akunnittarfinni atuutilersinneqarnera eqqaavaa. Tamatumani akunnittarfiit akitsuummik angalatitsivimmut ingerlatitseqqikkaangata qanoq isumagineqarnissaa pillugu suliffeqarfik siunnersorneqarnissamik pisariaqartitsisimavoq.
”Piffissap ingerlanerani ilaannikkut pisariaqartittarpara uannit ilisimasaqarnerusunut tulaavissaqarsinnaanissaq” oqarpoq. Assersuutissatullu alla eqqaavaa, tassani sullitamut tunngasumik suliaqarnermi Sulisitsisut inatsimmi aalajangersakkamik paasinninnissamut ikiuussimasut, tamannalu suliap qanoq naammassineqarnissaanut pingaaruteqarsimasoq.
”Inatsimmi aalajangersagaqarpoq nammineq maluginngitsoorsimasannik, Sulisitsisulli ilisimasaqarfigisaannik. Tamanna pissutigalugu suliaq itigartissinnaasimavarput. Sulisitsisut tunuliaqutaralugit tapersersorneqarsinnaanera assut qujamasuutigaara,” Elise Bruun oqarpoq.
Takornariaqarneq nukittunerusumik nipeqartariaqarpoq
Siunnersorneqarsinnaaneq aallaqqaammut ilaasortanngornissamut pissutaasut pingaarnerpaagaluartoq, piffissap ingerlanerani inuussutissarsiutip ataatsimoortumik soqutigisaasa sulissutiginissaat pingaaruteqarnerulersimavoq.
Elise Bruun ullumikkut Sulisitsisut brancheudvalgiisa ilaannut peqataavoq, tassani takornariaqarnerup annertunerusumik eqqumaffigineqarnissaa sulissutigalugu.
Tamanna immikkut pingaaruteqarpoq, takornariaqarneq Kalaallit Nunaata aningaasarsiornikkut ineriartortinneqarneranik pingaaruteqarnerulersinneqarmat.
”Namminersorlutik Oqartussat takornariaqarneq inuussutissarsiornermi pingaarnerit ilaattut inissinniaraangassuk, pingaaruteqarpoq uagut aamma oqaaseqarsinnaanissarput aammalu isummatsinnik saqqummiussisinnaanissamut aqqutissaqarnissarput,” oqarpoq.
Suliffeqarfiit ataasiakkaat ineriartortitsinermut tunngatillugu isummersinnaagaluartut, inuussutissarsiut ataatsimoorussamik soqutigisaminik Sulisitsisut aqqutigalugit saqqummiussisinnaagaangami nukittunerusumik inissisimasarpoq.
”Tamanna aamma takornariaqarnerup atugassarititaanik aalajangersaasartunut aalajangiisartunut toqqaannarnerusumik ataatsimoortumillu attaveqarnissamut periarfissiisarpoq.”
Suliffeqarfinnut minnernut ataatsimoorfiusoq
Siunnersorneqarsinnaanerup sunniuteqaqataasinnaanerullu saniatigut Elise Bruunip ilaasortaanermi ataatsimoorneq iluaqutit pingaarnerit ilaattut aamma erseqqissarpaa.
Sulisitsisut aqqutigalugit suliffeqarfiit assigiinngitsut, assigiinngitsunik atugassaqarlutik unammilligassaqartut, ilisimasanik avitseqatigineqarsinnaapput.
”Ataatsimoorluta nukittunerusinnaavugut, ilisimasanik avitseqatigiissinnaavugut aammalu qanoq ikioqatigiissinnaanerluta paasiniarsinnaallugu. Tamanna nuannerluinnarpoq,” oqarpoq.
Suliffeqarfinnut minnernut nutaamillu aallartittunut ilaasortaanissaq annertuumik iluaqutaasinnaasoq isumaqarpoq.
Travel by Heart pilersikkamiuk eqqarsaatigisimavaa Sulisitsisut pingaartumik akunnittarfinnut angisuunut, timmisartuutileqatigiiffinnut suliffeqarfinnullu angisuunut pilersinneqarsimasunut kattuffiusoq.
”Eqqarsaatiginikuunngilarali uanga aamma oqaaseqarsinnaasunga, tusarneqarsinnaasunga siunnersorneqarsinnaasungalu,” oqaluttuarpoq.
Misilittakkani taanna suliffeqarfimmik aallartitsinissamik eqqarsartunut ingerlateqqikkusuppaa. Tassami nammineq inuussutissarsiutigalugu suliarisaminik pikkoriffeqarneq inatsisitigut allaffissornikkullu pissutsinik tamanik ilisimasaqarnermut naapertuutinngilaq.
”Suliffeqarfiit nutaat ilaasortanngornissaat innersuussutigaara. Arlaannik pisoqassagaluarpat saaffissaqarluni tunuliaqutaqartuarnissaq toqqissisimanarpoq. Suliffeqarfiit tamarmik piffissap ingerlanerani inatsisilerituumik imaluunniit eqqartuussissuserisumik oqaloqateqarnissamik pisariaqartitsilersarput,” Elise Bruun oqarpoq.
