Sulisitsisut Kalaallit Nunaanni siullerpaamik akissarsiat pillugit indeksimik pilersitsiniarput –tamatumanngali ikiorneqartariaqarpugut!

Ilaasortatta suliffeqarfiutaasa arlallit Kalaallit Nunaanni suliffeqarfinni akissarsiat qaffasissusiannik ataatsimoortumik sanilliussisinnaanissaq kiisalu akissarsiat pillugit paasissutissat ersarinnerunissaat kissaatigisimavaat. Pisariaqartitsineq tamanna naammassiniarlugu Sulisitsisut Rambøll suleqatigalugu suliniut annertooq aningaasalersimavaat, Kalaallit Nunaanni siullerpaamik akissarsiat pillugit indeksimik pilersitsinissamut tunngaviliisussaq.

Siunertaavoq suliffeqarfiit akissarsiat qaffasissusiannik sanilliussisinnaanissaannut kiisalu akissarsiat atorfinitsitsinermilu atugassarititaasut pillugit paasissutissanik pitsaanerusunik tunngaveqarlutik aalajangiisinnaanissaannut ataatsimoortumik nutarterneqartuartumillu sanilliussissutissamik pilersitsinissaq.

Akissarsiat pillugit indeksimi aallaqqaammut allaffinni sulisut kiisalu funktionæritut atorfillit ilaatinneqassapput. Kisitsisitigut paasissutissat piviusorsiortuullutillu atorneqarsinnaanissaat qulakkeerniarlugu suliffeqarfiit sapinngisamik amerlanerpaat akissarsiat pillugit paasissutissanik tunniussinissaat pingaaruteqarluinnarpoq.

Peqatigitillugu paasissutissat tamanut saqqummiunneqarsinnaassappata, paasissutissanik naammattumik annertussusilinnik katersisoqarnissaa pisariaqarpoq. Taamaaliornikkut paasissutissat ataatsimoortillugit saqqummiunneqarsinnaassapput, sulisut ataasiakkaat kinaassusaat paasineqarsinnaajunnaarsillugit.

Taamaattumik sapaatip-akunnerata tulliani suliffeqarfinnut pineqartunut peqataaqqusinermik kiisalu paasissutissanik nalunaaruteqarnissamut immersugassamik nassiussissaagut.

Neriuppugut suliffeqarfiit sapinngisamik amerlanerpaat suliniummut peqataajumaartut, taamaalillutik Kalaallit Nunaanni suliffeqarfinni akissarsiat pillugit paasissutissat ersarinnerulernissaannut peqataaqqullugit.