Ullortuneq

Ulloq 21. juni ukiup ingerlanerani ulloq takinermi Kalaallit Nunaanni tamarmi qaamanermut, inuunermut ataatsimoornermullu ilisarnaataalluartumi Sulisitsisut sinnerlugit pilluaqqusivugut.

Ullormi tassani pinngortitami pisoq malunnartinneqaannanngilaq, aamma ileqqunit tunngaveqarluarluni kalaallit kultuuriisa ilaat pingaaruteqartoq. Nuna akimorlugu sumiiffippassuarni piniartut ileqqoq malillugu puisimik pisaqaqqaanniuullutik unammisarput. Tamassi iluatsitsilluarnissassannik kissaappassi – piniarluarisi immissinnillu paarigisi!

Ullortuneq aamma tassaavoq ulloq nunatsinni inuussutissarsiortut pinngortitap allanngorarneranut qanoq qanitsigisumik atassuteqartiginerannik ersersitsisoq. Ullortunermi takornariartitsineq eqqarsaatigalugu piffissap takornariaqarfiulluartartup aallartilluarnera takutinneqartarpoq. Tikeraat nunanit tamaneersut unnuani qaamasuni, asimi immikkuullarissunik misigisassarsiortarput, sumiiffinnilu misigisassarsiortitsinermut, unnuisarfinnut, assartuinermut kulturimillu oqaluttuartarnermut najukkani suliffeqarfinnut periarfissiisarlutik.

Linda Kleist, Visit Greenland-imi pisortaq tamanna pillugu oqarpoq:

“Ullortuneq nunatsinni immikkuullarissuuvoq pingaartuuvoq. ullormi tassani qaamaneq ataatsimoorneq ileqqullu pingaaruteqartut nunarput akimorlugu atassuteqartitsisumik ataatsimoorfiusarput, kulturerput nunami tamani nalliuttorsiutigineqartarpoq – ilaqutariinni, najukkani najugaqartuni, immami ileqqunilu kinguaariit kingornuttagaanni. Ullortuneq peqatigitillugu inuiaqatigiittut ullorsiorfiuvoq – ulloq kinaassutsitsinnik, suminngaaneerfitsinnik ataatsimoorfigisatsinnillu tamanik nalliortorfiusartoq.

Takornariartitsineq ukiup taamaalinerani aallartilluareertarpoq, tikeraarpassuillu maanga angalasut nunatta neqeroorutigisinnaasaanik misigisassarsiorniarsarisarput: pinngortitaq kusanaqisoq, najukkani oqaluttuat paasisaqarfiulluartartut piviusullu. Pingaartumik misigisassarsiorlutik takornarissat pinngortitaq kisiat takorusunneq ajorpaat – nuna misiginiarlugu, inuunerup ingerlaarnera paasisaqarfiginiarlugu inunnik, ileqqunik sumiiffinnilu innuttaasunik ataqqinnillutik alapernaallutillu angalasarput.

Taamaammat ullortuneq takornariartitsisartut tikeraarsaariaasissamik kissaatigisaannut naleqqulluartuuvoq. Visit Greenland-imi uagutsinnut pineqartoq tassaavoq, najukkani naleqarnerulersitsisarnermut akuulluarluni tikeraanik piffissami sivisunerusumi nunatsinniititsinissamut tapersiinissaq – takornariartitsisarneq peqatigitillugu nunatsinni pinngortitamik, kulturimik ataatsimoornermillu tunngaveqarluni illersuillunilu akisussaassuseqartumik ineriartortinneqassaaq.”

Aasaq peqatigitillugu nunatsinni tamani sanaartornermi suliaqarfiunerpaajusarpoq, tamanna aamma Maniitsumi atuuppoq.

”Ullut takisut, qaamasut sanaartornitsinni siuariartornissamut pitsaanerpaamik atugassaqartitsisarput, taamaammat assersuutigalugu imermut ruujorinik ikkussuinitsinni tamatigut ajornakusoortitsilersartumik  apeqqinnginnerani  aamma ulapittarpugut”. Maniitsumi Sulisitsisut immikkoortortaqarfianni ilaasortaq aamma Arctic VVS-imik piginnittoq oqarpoq

Ullortuneq taamaalilluni ileqqunik, inuiattut ullorsiorfimmik nalliuttorsiorfiuvoq, inuussutissarsiortullu ingerlatsinerannut periarfissaannullu pingaaruteqartumik naleraalluni.

Sulisitsisut kikkut tamarmik Ullortunersiorluarnissaannik kissaappaat!

*Asseq Aningaaq R. Carlsennimit assilisaavoq.