Qaammammi matumani suliffeqarfitsialak: Verkís Grønland

Nunatsinni ingeniøritut suliffeqarfinni pisoqaanersaat ilaat, Kalaallit Nunaanni sorlaqartoq Islandimilu tunuliaqutaqartoq

Verkís Grønland nunatsinni ingeniøritut suliffeqarfinni innersuisutut amerlanersaannit pisoqaaneruvoq. Suliffeqarfik danskit Spangenberg aamma Madsenimit 1969-imi pilersinneqarpoq, taamaalillunilu Kalaallit Nunaanni ingeniøritut suliffeqarfiisa pisoqaanersaat ilaanniilluni. Tamatuma kingorna piginnittut taaguutillu arlaleriarlutik allanngorsimapput, kingornalu kinguaariit nikinnerannut atatillugu Islandimi ingeniørit suliffeqarfiat Verkísi-mit pisiarineqarluni. Januar 2023-miit Verkís Grønland Islandimi Verkísimit 100 procentimik pigineqarpoq.

„Kalaallit Nunaanni sorlaqartuarnissarput anguniagaraarput, Islandimili pikkorilluinnartunik tunuliaqutaqarluta, nammineq ilisimasatta saniatigut immikkut ilisimasanik pisariaqartitsigaangatta ikiorneqarsinnaalluta,“ pisortaq Michael Karing oqarpoq. Islandimi Verkís Kalaallit Nunaanni erngup nukinganik nukissiorfiliornernut umiarsualiviliornernullu amerlanerpaanut oqaluttuarisaanermi peqataasimavoq.

Ulluinnarni suliffeqarfik inissianik pilersaarusiortarpoq, sanaartornernik nakkutilliisarpoq kiisalu pisortat namminersortullu sanaartortitsineranni siunnersortaasarluni. Aamma suliassat immikkut ittut annertuut suliarisarpai:  Amaroq Minerals-imut Nalunaq pillugu aatsitassarsiorfimmut atatillugu siunnersuineq oqartussanullu attaveqarneq, Sisimiut Kangerlussuullu akornanni aqqusinissamut pilersaarusiorneq, erngup nukinganik nukissiorfiliornerit mikinerusut kiisalu inissiarsuarnik iluarsaassinermut atatillugu mingutsitsinernik saliineq, Renoveringsstyrelsen suleqatigalugu.

Kalaallit Nunaanni sulisut pingasuniit sisamanut amerlassuseqarput. Ingeniørit immikkut ittutigut ilinniagalinnik atorfinitsitsiniarneq ajornakusoortarmat, pingaarutilinnik inissisimasut arlallit Islandimit suliffeqarfiullu Danmarkimi nutaamik allaffeqarfianit ilanngunneqartarput.

Nuummi mittarfissuaq sanaartornerani Verkís Grønland MT Højgaard-imit sanaartornerup ingerlanneqarnerani nakkutilliinermut attuumassuteqartunik suliakkerneqarpoq, taamaalillunilu sanaartorfimmi pisunut malinnaasuulluni nakkutiginnittuullunilu.

„Suliffeqarfiit annertuumik suliniutaanni uagut taamaallaat immikkoortortaq annikittoq isumagaarput, kisianni mittarfittaap pilersinneqarneranut tapiissuteqarnitsinnut tulluusimaarpugut, neriullutalu mittarfittaap nunatsinnut ullumi siunissamilu periarfissanik nutaanik ammaassissasoq,“ Michael Karing oqarpoq. Nuummi atuarfiliornerup nalaani Islandimi immikkoortortaqarfik sanaartortitsisumut Ístak-imut teknikkimut tunngasut arlallit isumagisimavai, Nuummilu sanaartornermi nammineq suliffeqarfimminnit siunnersortitut sulillutik.

Kalaallit Nunaanni sanaartornermi ajornartorsiutaasoq annerpaaq angallassinerunngilaq, ukioq sivisooq, imaluunniit anorersuarnerit. Taakku sungiusimareerpagut. Ukiuni kingullerni unammilligassat ilungersunartut tassaapput sanasut amigaataanerat sanaartornermilu atortussat akitsoriartornerat.

Teknikkikkut ajornartorsiutit amerlanertigut pilersarput Danmarkimi arkitektitut suliffeqarfiit angisuut peqataaleraangata, Kalaallit Nunaanni silap qanoq ittuusinnaaneranik ilisimanninngitsut, qanoq sanimut siallersinnaanera, ukiukkullu qaammatini arlalinni aputaajaatit illup iigaa sinerlugu aputaajaasinnaasariaqarnerat. Illut qalia isaariaata tungaanut sinnernagu ammullu sammiguni qanoq apummik najugaqartunut nakkartitsisinnaanerat, ajornartorsiutinut assersuutissaapput. „Piviusumik kukkunerit nalinginnaalluinnartut pineqarput, uagut taamaattumik kukkunernik naammassisaqarnavianngikkaluarluta,“ oqarpoq.

Akerlianilli Kalaallit Nunaat aamma iluaqutissartaqarpoq, soorlu sila panertuunera qaarsullu qajannartup qaavani toqqaannartumik tunngaviliorsinnaaneq. Ilinniartitaanerullu Arktisk Ingeniør pilersinneqarneratigut Kalaallit Nunaat nammineq ingeniøritaartorsimavoq, nunamik ilisimasaqarluartunik. Michael Karing tamanna nukittuffiungaatsiartutut isigaa. Nunami sorlaqarneq pillugu aperineqarami akissutaa naatsuuvoq: „Nunami sorlaqarneq anguniagarinngilarput. Nunatsinnimi najugaqareeratta.“ Michael Karing nammineq 1995-imi Kalaallit Nunaannut nuuppoq. Teknikeritut ilinniakkaminik naammasserlaajulluni Paamiuni kommunip allaffiani sulilerpoq, ukiuni 30-it sinnerlugit Kalaallit Nunaata kitaani amerlanerpaani sanaartornermik suliaqarsimalluni.

Michael Karingip immineq siunissamut kissaataa inissianut tunngavoq. Nunatsinni inissiat amigaataanerat kiisalu illut isugutammik oqummik eqqugaanikut ajornartorsiutaapput annertuut. „Nunatsinni kikkut ajornerpaamik najugaqarnersut ataatsimoorluta isiginiartariaqarparput, ataatsimoorlutalu najugaqarnermi atugassarititaasut minnerpaaffiat qaffallugu“ Verkís Grønland ukiut tallimat qaangiuppata qanoq inissisimassava? „Soorunami suli maaniissaagut.“ Siunissami anguniagaq tassaavoq piginnaasatigut nukittorsaanissaq, sulisunik amerlanerusunik nammineq atorfinitsitsinikkut, piginnaasaannik qaffassaanikkut ilinniartitseqqinnikkullu.