22/06/2026
Narsaq Auto aamma VVS: ”GE-p ikiortarpaatigut sullitagut akiliinngikkaangata”
Ukiuni 40-ni sinneqartuni Narsaq Auto aamma VVS Sulisitsisuni ilaasortaasimapput. Pisortamut Lisa Hansen-imut ilaasortaa...
Ukiut 60-it Peter Pars A/S Sulisitsisullu qanimut suleqatigiissimapput. Tassunga suliffeqarfimmut Sulisitsisunut ilaasortaaneq tassaasimavoq; suliakkiissutinut pikkoriffeqarneq, anguniagaqarumassuseqarneq aammalu inuiaqatigiinni mikisunnguugaluami sinaakkutassanik pitsanngorsaajuarneq, kiserliorfissaraluamilu toqqammavissaqartuarneq.
Novemberip aappaani 2025-imi innaallagissiutilerisut Peter Pars A/S 60-iliigami, suliffeqarfittut nalliuttorsiornertik kisiat malunnartinnianngilaat. Tassami aamma ukiuni qulikkaani arfinilinni Sulisitsisullu suleqatigiissimanertik kingumut qiviarpaat.
Aallartikkamiilli suliffeqarfiup, Ilulissaniit aallaveqartup, Sulisitsisut ingiaqatigisimavaat – suliffeqarfimmilu siuuttut oqaatigaat tamanna qularutissaanngitsumik patajaakkumassusermik aallaaveqarsimasoq.
”Sulisitsisuni ilaasortaanitsinnut peqqutaalluinnarpoq, Sulisitsisut tigussaasunik aammalu misilittakkaminnik tunngaveqarluinnarlutik sullissisarmata. Sulisitsisut inuussutissarsiuteqarnerup silarsuaani ersarissumik nukittuumillu ataatsimoorussisumik oqariartuuteqartarput aammalumi pikkorilluinnarlutik sinaakkutassiisarput, tamannalu suliffeqarfitsinni kisermaallugu kivissimasinnaanavianngikkaluarput. Sulisisitsisut suliakkiissutaasartunut pikkoriffeqarluarnini nukittoqutigaa, tamannalu takussaasunik tigussaasunillu naammassinniffiulluartartoq nalunngilarput”, Pisortaq Jens-Peter Pars oqarpoq.
Nangilluni itisiliivoq, ilaasortaanermut tunngaviulluinnartoq tassaavoq, tatigininneq. Kattuffiup isiginneriaasii suliffeqarfiit misilittagaannik aallaaveqarluinnarput aammalu paasissutissat misissueqqissaarnerillu tunngaviulluinnartarlutik – tassani aallaavigineqarneq ajorput isumaqarniaannarluni isummersuutit – kisiannili paasisat nalunngisallu tigussaasut. Taamaasilluni qularutissanngilaq, tusarnaarluartoqartartoq, Sulisitsisut inuiaqatigiinni oqalliseqataaleraangata imaluunniit oqartussaasunik oqaloqatiginnileranngata.
Inuiaqatigiinnguani nukittoqatigiilluni inissisimaneq
Jens-Peter Pars-ip tikkuarpaa, Kalaallit Nunaat isorartoorsuugaluarluni inuiaqatigiinnguanik ikittunnguanik inoqarmat. Tamaattumik, inuussutissarsiuteqarneq ersarissumik patajaatsumillu aallunneqassappat, ataqatigiinnerup aaqqiissuussaanerlu pingaaruteqassusaa naqissuserpaa.
”Kattuffimmik ataatsimoorfiusumik peqanngikkutta, suliffeqarfiit politikkikkut allaffissornikkullu aaliangiisarnernut ingerlatsinernullu illuatungiliunnerni oqimaatsorujussuarmik inissisimasimassagaluarput. Sulisitsisut tassaavoq inuussutissarsiuteqarnermi ataatsimoorussamik oqariartortuusartoq, oqariartuutaannik ersarissaajuartartuusoq.” Jens-Peter Pars oqarpoq.
Ersarissarpaalu, ilaasortaaneq tassaammat nunami naalakkersuinikkut, kommunini, naalakkersuisoqarfinni aammalu ataatsimiititaliani aaliangersimasuni aaliangiisarnermut sunneeqataasinnaanissamut aqqut – taamak inissisimaneq pisinnaasimassanngikkaluarpoq suliffeqarfik kisiartaalluni illuatungiliuttuulluni inissisimasuuppat.
Atugassarititaasut aaliangersimasut sulissutigineqarput
Taamaattumik Peter Pars A/S-imut tunngaviit eqqumiiginarsinnaasut aallaaviunngillat, kisiannili sinaakkutissat tunngavissaqarluartut aaliangiisuupput, taakkuuppullu ulluinnarni suliffeqarfimmut pitsaasumik sunniuteqartartut. Sulisoqarneq, ilinniarneq, suliaqarneq, sanaartornissamut akuersissutit, nalimmassaanerit, assartuinerit, assartuinissamut pilersaarusiornerit aammalu nukissiuutitigut aammalu pilersuinikkut inissisimanikkut pissutsit, tassaalluinnarput aaliangiiffigineqartarneri ingerlatsinermi malunnaateqarluinnartartut.
Tassanilu Sulisitsisut pingaarutilimmik inissisimavoq, tassami misissueqqissaarluni naliliisarnerit, tusarniaanerit aammalu sukumiisumik siunnersuisarnerit ingerlattaramigit, oqallinnermi peqataaginnarani. Aammalumi unamminarsinnaasuni aaqqiissutissarsiorneq pikkoriffigaat, tamannalu Jens-Peter Pars malillugu tassaavoq ilaasortaanissamut aaliangiisuulluinnartoq.
”Sulisitsisut saqqummiigaangata tusarnaartoqartapoq, ilisimasat aallaavigalugit tunngavilersorluartarmata. Saniatigut Sulisitsisut aaliangiisarnernut ”qanimut peqataasittarpaatigut”, tassatuaallutillu inuussutissarsiutinik suliaqartuusut soqutigisaannik suaaruteqarsinnaasartut aammalu maleruagassanik sinaakkutassanillu ilaasortaminnut pitsanngorsaasinnaasut.”
Ukiuni qulikkaani arfiniliusuni misilittakkat
Ukiuni qulikkaani arfiniliusuni inuussutissarsiuteqarnermik suliaqareerluni aammalu Sulisitsisuni ilaasortaareerluni,Peter Pars A/S unamminarsinnasunik qanimut misilittagaqartarsimavoq. Misilittakkamini una maluginiarsimavaa; piujuartitsinissaq, suleqatigiinneq, tusarnaarsinnaaneq aammalu illuatungeriilluni paaseqatigiissinnaaneq pisariaqarluinnartusut ineriartornermik pitsaasumik ingerlatsisoqassappat – suliffeqarfinni kisimi pinnani, kisiannili inuiaqatigiinni tamaginni.
Jens-Peter Pars-ittaaq naqissuserpaa, inuussutissarsiuteqartut taakkuummata inuiaqatigiinni aningaasatigut inuiaqatigiit inuussutissaannik isaatitsisuusut. Taamaattumik tamanna aallaavigissagaanni, pingaaruteqarpoq sinaakkutassat piviusorsiortuunissai eqqarsaatigilluagaasimanissaalu.
Peter Pars A/S-imut ilaasortaaneq piumasaqaataaginarani pissusissamisoortuuvoq, tassami suliffeqarfinnut atugassatigut aammalumi Kalaallit Nunaat tamaat isigalugu pitsanngorsaataasumik inissisimassagaanni, ilaasortaanissaq pingaaruteqarluinnarpoq.
”Taamaattumik isumaqarpugut pingaaruteqarluinnartuusoq, suliffeqarfiit sapinngisamik amerlasuut Sulisitsisuni ilaasortaanissaat”, Jens-Peter Pars naggasiivoq.
