Suliffeqarnermut Naalakkersuisoqarfik aamma SIRI nunanit allaneersut akissarsiaannut sulineranilu atugassarisaannut najoqqutassianik nutaanik saqqummiussipput.
Siunnersuutit saqqummiunneqarput apeqqutit pingaarutillit arlallit piffissami aalajangersimasumi erseqqissaareerlugit. Apeqqutit qitiusut ilagaat soraarnerussutisiaqarnissamut pisussaaffiit, maannalu naalakkersuisoqarfiup Sulisitsisullu isumaqatigiissutigaat sulisitsisut nunanit allaneersut soraarnerussutisiaqarnissaannut pisussaaffeqanngitsut, sulisitsisussatut isumaqatigiissummi allamik isumaqatigiissuteqartoqanngikkaangat.
2025-mi juulip aallaqqaataanit sulinermut uppernarsaammut inatsit nutaaq atuutilerpat soraarnerussutisiaqarnissamut atugassarititaasut – kiap akiliisimanera aamma qanoq annertutigisumik akiliisoqarnersoq ilanngullugit – sulinermut uppernarsaammi allassimassapput.
Akissarsianut atugassarititaanullu najoqqutassiat nutaat UANI atuarneqarsinnaapput.
Paasisaqarnerorusukkuit allattoqarfik saaffigisinnaavat.
