21/05/2026
Nikuillutik inuusuttunut ersaattaapput
Ukioq manna Future Greenlandimi peqataasut 575-it inersuarmi angisuumi inimilu mikisumi inuusuttut marluk Uiloq Ba...
Sapaatip-akunnerani kingullermi Sulisitsisut inuusuttut 370-it Qaqortumi Campus Kujallermi inuusuttut inuussutissarsiornermut ataatsimeersuarnerannut Future of Greenland-imut katersortippaat. Ullormi tassani inuusuttut ilinniartitaaneq, inuussutissarsiorneq, kulturi inuiaqatigiillu ineriartornerat pillugit isumaat sammineqarlutik, qulequtaq "The Future is Greenland – Issittumi ukiut qulikkaat inuusuttut" aallaavigineqarpoq.
Ataatsimeersuarneq Kalaallit Nunaata siunissaa inuusuttut peqatigalugit ilusilersorneqarnissaa tunngavigalugu aaqqissuunneqarpoq. Taamaattumik angajullerni atuartut, ilinniagaqartut, suliffeqarfinni aqutsisut, politikerit kattuffiillu ataatsimoorlutik ullormi isumassarsiorfiusumi, oqaloqatigiiffiusumi oqalliffiusumilu peqataapput. Tassani Kalaallit Nunaata ukiuni makkunani ineriartornerani periarfissat unammilligassallu eqqartorneqarput.
Ullormi saqqummiunneqartunut ilaatigut ilaapput namminersorlutik inuussutissarsiuteqarneq, kulturi, takornariaqarneq, aatsitassarsiorneq, pilersitsiviusumik inuussutissarsiorneq kiisalu nunat tamalaat akornanni inuussutissarsiornikkut ineriartortitsineq. Tamatuma saniatigut inuusuttut kommunalpolitikerinik oqallinnermi eqeersimaartumik peqataapput, apeqquteqarsinnaallutik Kalaallit Nunaatalu siunissaanut kissaatitik saqqummiussinnaallugit.
Ullormi oqallinnerit arlallit inuusuttorpassuit soqutigisaannut sammipput: ilinniagaqarnissamut periarfissat, kalaallisut oqaatsitta attatiinnarnissaat, kulturip inuiaqatigiinni pingaaruteqarnera, najukkani suliffissaqartitsinerup ineriartortinneqarnissaa kiisalu kinguaariit aggersut pillugit sinaakkutissat nukittuut patajaatsullu pisariaqartinneqarnerat.
Sulisitsisunut inuusuttut oqaloqatigisarnerat nunatsinni tamarmi inuussutissarsiornikkut ineriartortitsinermik nukittorsaanermi sulinermut pingaarutilimmik ilaavoq.
"Inuusuttut pillugit aalajangiisoqassanngilaq – inuusuttut peqataatinnagit" tassaavoq Future of Greenland-imi tunngaviit pingaarnerit ilaat. Inuusuttut ataatsimeersuarnermi isummersuutaat oqariartuutaallu Kalaallit Nunaata siunissaa pillugu oqallinnerni, Future Greenland-imi ataatsimeersuarnermi kiisalu inuussutissarsiornermi ataatsimut ingerlaqqittuni, oqallinnerit pitsaanerusumik tunngaveqarnissaannut iluaqutaassapput.
Qaqortumi ulloq iluatsilluartumik ingerlanneqarsinnaanngortillugu peqataasunut tamanut, saqqummiisunut, suleqatigisanut, aningaasaliisunut kajumissutsiminnillu ikiuuttunut tamanut qujanaq.
