Tamalaat: ”Suliffeqarfik mikinerutillugu Sulisitsisunik pisariaqartitsineq annertunerusarpoq”

Tamalaat: ”Suliffeqarfik mikinerutillugu Sulisitsisunik pisariaqartitsineq annertunerusarpoq”

Eva Damimut, kukkunersiuisoqarfik Tamalaat ApS pingasunik sulisullip ingerlataanut, Sulisitsisunut ilaasortaanikkut inatsisilerinikkut siunnersorneqarsinnaaneq, sulianut tunngatillugu isumasioqatigiinneq kiisalu inuussutissarsiuteqartunik allanik attaveqateqarneq periarfissaapput. Tamakkulu suliffeqarfinnut mikinerusunut immikkut pingaaruteqarput.

Allattoq: Rasmus Barud Thomsen

Suliffeqarfimmik mikisumik ingerlatsigaanni malittarisassat pisinnaatitaaffiillu pillugit nalornisoqartillugu, sulisoqarnermut immikkoortortaqarfimmik imaluunniit inatsisilerinermik siunnersortimik aperisinnaasamik peqarnissaq tamatigut periarfissaaneq ajorpoq.

Tamanna Eva Damip Sisimiuni kukkunersiuisoqarfik Tamalaat-imik ingerlatsisuusup ilisimalluarpaa. Naatsorsuuserinermi ukiut 20-t missaanni misilittagaqarpoq, ullumikkullu suliffeqarfimmik pingasunik sulisulimmik ingerlatsivoq, suliassaqarluarlunilu.

”Suliassanik amigaateqanngilagut. Allaat ima ulapitsigaagut, ilaannikkut suliassanik tigusinissamut itigartitsisariaqartarluta,” oqaluttuarpoq.

Tamalaat ilaatigut suliffeqarfiit allat naatsorsuutaannik akissarsialerinerannillu suliaqartarpoq, taamaattumillu eqqortumik siunnersorneqarsinnaaneq pingaaruteqarluinnarpoq.

Taamaattumik Eva Dam ukiorpassuarni Sulisitsisunut ilaasortaasimavoq – siullermik pisiniarfiuteqarnermini, kingornalu Tamalaat aqqutigalugu.

”Pingaaruteqarpoq aaqqiagiinngissuteqartoqalissagaluarpat kisimiinnginnissarput qulakkeerniarlugu. Soorunalumi aamma attaveqatigiiffimmik pitsaasumik peqarnissaq, tassani isumasioqatigiissinnaagatta” oqarpoq.

Malittarisassanik paasinninnissamut ikiorneqarneq

Sulisitsisutut sulisunut tunngatillugu pisussaaffiit pisinnaatitaaffiillu paasiniarlugit ikiorneqarnissaq pisariaqartinneqarsinnaavoq. Eva Damimulli pisariaqartitsineq nammineq suliffeqarfianut tunngasuinnaanngilaq. Tamalaat suliffeqarfiit allat 20–30-t missaanniittut akissarsialerinerannik naatsorsuutaannillu suliaqartarpoq, taakkunanilu isumaqatigiissutit malittarisassallu pillugit apeqqutit akulikitsumik saqqummertarput.

”Akissarsiatigut sulinermilu atugassarititaasunut isumaqatigiissutit uteqattaartumik atortarpagut. Suliffeqarfiit isumaqatigiissutinik malinninnissaannik ingerlaavartumik kajumissaarisarpagut, taamaaliornikkut illuatungeriit tamarmik – sulisut sulisitsisullu – illersorneqarsinnaammata,” oqarpoq.

Assersuutigalugu apeqqutit sulinngiffeqarnersiutinut, tapinut imaluunniit aalajangersakkanut sukumiinerusumik nassuiarneqartariaqartunut tunngasinnaapput.

Siornatigut Eva Dam nammineq akissutissanik ujarlertariaqartaraluarpoq, ullumikkulli Sulisitsisunit siunnersorneqarsinnaavoq.

”Isumasioqatigineqarsinnaasumik peqarneq nuannernartorujussuuvoq, taamaalilluni nammineq nittartakkani assigiinngitsuni tamani misissuisariaqarnani. Aamma periarfissat suunersut pillugit siunnersorneqarsinnaavugut,” Eva Dam oqaluttuarpoq.

Unammillertigut aamma suleqatigisinnaavagut

Siunnersorneqarsinnaanerup saniatigut Eva Damip inuussutissarsiuteqartunik allanik attaveqaateqarneq Sulisitsisunut ilaasortaanermi iluaqutaasut pingaarnerit ilaattut oqaatigaa.

”Unammillertigiiginnarata aamma suleqatigiissinnaavugut,” oqarpoq, nassuiarlugulu nammineq suliffeqarfini suliffeqarfiillu allat Sulisitsisut aqqutigalugit naapissinnaallutik, misilittakkanik avitseqatigiissinnaallutik aammalu imminnut ilinniarfigisinnaallutik.

Tamanna suliffeqarfinnut mikinerusunut immikkut pingaaruteqarpoq, taakku amerlanertigut sulisut, isumaqatigiissutit aammalu ulluinnarni ingerlatsineq pillugit apeqqutit namminneq suliarisariaqartarmatigik, nassuiaavoq.

Ataatsimoornerup naleqarnera taama annertutigisumik isigigamiuk Eva Dam isumaqarpoq Nuup avataani suliffeqarfiit aamma peqataasinnaanissaat ajornannginnerulersinneqartariaqartoq.

Pikkorissartitsinerit amerlanerusut kissaatigai

Taamaattumik illoqarfinni assigiinngitsuni pikkorissartitsinerit aammalu inuussutissarsiornermut tunngasunik aaqqissuussinerit amerlanerusut ujartorpai, pingaartumik suliffeqarfinnut mikinerusunut aammalu sinerissami sanasunut.

”Sanasut pikkorissorpassuit amerlaqaat, kisianni ilisimasanik nutarterinissamut aammalu piginnaasanik ineriartortitsinissamut pisariaqartitsineq annertoorujussuuvoq. Kissaatiginarpoq illoqarfinni ataasiakkaani pikkorissarnissamut periarfissat amerlanerujussuanngornissaat,” oqarpoq.

Assersuutigalugu pikkorissartitsinerit isumaqatigiissutinut, akissarsiatigut sulinermilu atugassarititaasunut isumaqatigiissutinut aammalu namminersortutut ilisimasaqarfigisariaqartakkanut malittarisassanut tunngasinnaapput, isumaqarpoq.

Suliffeqarfiit mikisut ikiorneqarnissamik pisariaqartitsinerpaapput

Sinerissami suliniutit amerlanerusut kissaatigigaluarlugit Eva Damip ilaasortaanerup naleqarnera qularinngilluinnarpaa. Paarlattuanik isumaqarpoq suliffeqarfiit mikinerpaat ilaasortaanissamik pisariaqartitsinerpaasut.

”Kikkut tamaasa ilaasortanngornissaannik kajumissaarusuppakka. Suliffeqarfik mikinerusumik ingerlatsigaanni pisariaqartitsineq annertunerusarpoq. Kisimiilluni inissisimaneq sanngiinnerusinnaavoq, kisianni quliusimagaanni imaluunniit 20-usimagaanni nukittunerusumik inissisimasoqarsinnaavoq,” oqarpoq.

Suliffeqarfinnut mikinerusunut ilaasortaanikkut inatsisilerinermut aammalu inuussutissarsiornermut tunngasunik immikkut ilisimasalinnit ikiorneqarsinnaaneq periarfissaavoq, taakkulu nammineq ujartariaqarlugillu akiliiffigisariaqassagaluarpaat. ”Sulisitsisunut ilaasortaanera uannut iluaqutaangaarsimavoq. Iluaqutaasunik siunnersuutinik isummersuutinillu amerlasuunik pissarsisimavunga, tamannalu ataatsimut isigalugu suliffeqarfimmik ingerlatsininni toqqissisimanerulersitsivoq,” Eva Dam naggasiivoq.