18/01/2023
Ukioq nutaaq aallartiguk Sulisitsisunut eqqortumik ilaasortaanermut akiliisarlutit
Assilinerara A-10/aningaasarsianullu nalunaajaammik imalimmik Sulisitsisut allaffeqarfiannut nassiuguk ilaasortaanermull...
Suliffeqarfik Uummannami septembarip aallaqqaataa 1973 Harald Larsenimit Ole Sørensenimillu pilersinneqarpoq. Harald Larsenili 1980-ikkut qiterpaarnerisa nalaani tunuarsimavoq. 1991-imi Ole Upernavimmukarluni suliffeqarfimmik nutaamik aallartitsiartorsimavoq, suliffeqarfiillu taakkua marluk 2005-mimi kattunneqarsimallutik. LASØ A/S ukiut ingerlanerini ineriartungaatsiarsimavoq, naak ullumikkut sulisorisartagaat suliassaqarfiup nalaani 150-ioriarlutik 50-nnarnut appartaraluartut, sumiiffiup nalaani LASØ A/S suliffeqarfinni sunniuteqarnerpaat ilaanniippoq.
Uummannap Upernaviullu nalaani silaannaap pissusaa immikkuullarissoq LASØ-mik ingerlatsiniarnermut piumasaqaatitaqarpoq. Piffissami aalajangersimasumi sulisariaqartarneq, silapiluttarnera attaveqaatillu killillit peqqutaallutik eqaatsumik ingerlatsisoqarnissaa anguniarlugu pilersaarusiorluartariaqartarsimapput. Tamanna isumaqarpoq suliffeqarfik unammilligassaminik naammassinnissinnaajumalluni immikkut ilisimasaqalersimasoq.
Ukiut ingerlanerini LASØ-mit kiffartuussissutit annertusiartorsimapput. Siullermik sanaartornermut attuumassuteqartuunerusunik suliaqariarlutik, maannakkut aamma biililerineq, Upernavimmi pisiniarfeeraateqarneq kiisalu Uummannami inissianik attartortitsineq ingerlanneqarpoq. Suliffeqarfiup allanngorartuunissaa anguniarlugu assigiinngisitaartunik suliaqartariaqarsimapput, aningaasaqarnikkullu inissisimaffiit assigiinngitsut nalimmassarfigineqartariaqartarsimallutik.
LASØ A/S-ip sumiiffimmut tunniusimasuunerat malunnaqaaq. Sumiiffinni najugaqartunik sulisoqarnissaq pingaartinneqarsimavoq saniatigulli Danmarkimit tikisitsisarlutik, sumiiffinneersunillu sulisoqarneratigut sumiiffinnut tapersersuinerat takuneqarsinnaavoq. Sumiiffinni aaqqissuussanut tunniuttagaat sumiiffinnilu oqalliffiusinnaasuni oqaatigisartagaasa takutiinnarpaa suliffeqarfik suliffeqarfiinnaanani sumiiffimmut tunniusimasuusoq.
Avatangiisit eqqarsaatigalugit LASØ A/S-imi suliniutini piujuartitsineq ilaatinneqartuaannarpoq. Illuni sanaartugaanni nukissap atorluarnissaa aningaasaliiffigineqartarpoq, suliaqarnermilu avatangiisinut sunniutit eqqumaffigineqartarlutik.
LASØ A/S-imi ilinniarneq sulisunillu ineriartortitsineq qitiutinneqarpoq. Sulisut piginnaanngorsarniartuarpagut taamaaliornikkut sanasoorusuttunik soqutiginnilersitsiniaaneq naqissuserniartarpagut. Sumiiffimmi suliassaqarfimmi pitsaassuseq qaffasissumiinniarpat ineriartortinniarneqartariaqarpallu tamakkua iliuuserineqartariaqarput.
Siunissaq eqqarsaatigalugu LASØ A/S-imi ineriartornissaq alliartornissarlu eqqarsaatigineqarput. Niuerfik annertusarniarneqarpoq niuerfinnilu allaanerusuni suliaqarsinnaaneq eqqarsaatigineqarluni. Pissutsini unamminartuni suliaqarsinnaanerat nutarterinernillu suliaqartarnerat peqqutaalluni siunissami unammilligassanut piareersimapput.
Suliffeqarfiup oqaluttuassartaa sulinerup iluani iluatsitsinerinnaanngilaq, kisiannili nunatta avannaani immikkuullarissumik inissisimanitsinnut paasinninnermik aamma takutitsivoq. LASØ A/S-ip takutippaa suliffeqarfik unamminartumiikkaluarluni eqaatsuuneq, nutaaliorsinnaaneq pissutsinullu nalimmassarneq aqqutigalugit qanoq ingerlalluartigisoqarsinnaasoq.
LASØ A/S pilluaqqorujussuarparput. Suliffeqarfiup ukiuni tulliuttuni ineriartornissaata ingerlalluarnissaatalu malinnaaviginissaa qilanaaraarput.
