05/04/2024
Sulisitsisut siulersuisuini kiinnat nutaat
"Siullermik, kiinnat nutaat tikilluaritsi aammalu qinigaanissinnik pilluaritsi. Nuannaarutigilluinnarpara oqarsinnaagama...
Qaammammi matumani Sulisitsisunit Anori A/S ukkatarineqarpoq, suliffeqarfik Issittumi minguinnerulernissaq anguniarlugu anorisaatit atorlugit immikkuullarissumik suliniuteqarpoq. Suliffeqarfiup taaguutaa suliffeqarfiup Kalaallit Nunaanni minguinnerusumik innaallagissiornissamut anguniagaqarnermut tulluartuuvoq. Palle Christiansen Anori A/S-imeersup suliffeqarfiup anguniagaa ima nassuiarpaa, ikummatissat uuliameersut aamarsuarneersullu atorunnaarlugit ingerlaavartumik nukissiulernikkut inuit CO2-mik aniatitsinerannik annikillisaaneq. Suliniummik ingerlatsivissatut Sisimiut toqqarneqarsimavoq, illoqarfillu Christiansenimut pingaaruteqaannarani, suliffeqarfiup sumiiffinnut naleqqussarusunneranut naqissusiisuuvoq.
Qeqqata Kommuniata tapersiineratigut Anorimit Kalaallit Nunaata piujuartitsinermik tunngaveqarluni ingerlatilernissaanut alloriarneq siulleq tiguneqarpoq. Kalaallit Nunaanni aningaasaqarneq ineriartortinneqassappat, nutaanik aningaasarsiorfissarsiortoqartariaqartoq Christiansenip eqqaavaa, taamaattumik minguitsumik sanaartornissaq aammalu nukissiuuteqarnermi piujuartumik tunngaveqarnissaq periarfissatut isigaa. Christiansenip naatsorsuutigaa sumiiffimmi CO2-mik aniatitsineq annikinnerulissasoq, nunarsuarli isiginiaraanni tunisassiassaq - ammoniakki qorsuk – avammut tunisassiassani sunniuteqarnerussasoraa.
Anorisaateqarnermi amoniakki qorsuk tunisassiariniarneqarpoq, taannalu anorisaatit atorlugit tunisassiarineqassaaq. Tunisassiorniarnermi nukissaq 1,5 GW vindfarm elektrolysefabrikkimi atorneqassaaq, tassanilu silaannarmiittoq nitrogen immamiittorlu hydrogen atorlugu ammoniakki pilersinneqassaaq. Tunisassiassap nunarsuarmi nukissiuuteqarneq allanngortissinnaavaa CO2-millu aniatitsineq appartissinnaallugu.
Suliniut aallaavigalugu Kalaallit Nunaanni suliffissanik pilersitsisoqarnissaa naatsorsuutigineqarpoq, suliffissat anorisaateqarnerup iluani toqqaannartumik pilersinneqassapput, toqqaannanngikkaluartumillu suliassaqarfinni allani suliffissanik aamma pilersitsisoqassalluni. Christiansenip oqaatigaa sanaartornissamut pilersaarusiaq Kalaallit Nunaanni pilersaarusiaasuni annerpaasoq, qilanaaralugulu ilinniartitaanerup piginnaasaqarnerullu iluani inerisaanissaq, pilersaarutillu aallaavigalugit sumiiffimmeersut Norgemut ilinniariarnissaat naatsorsuutigineqarpoq.
Kalaallit Nunaanni sumiiffinni assigiinngitsuni anorisaatit atorlugit ingerlatsinissaq Christiansenip periarfissaqarsoraa, takorluugaralugulu Kalaallit Nunaanni avammut tunisassiassani nukissaq minguitsoq annerpaanngorumaartoq. Issittumi anorlertarnera inissisimaffillu eqqarsaatigalugu ataavartumik nukissiortoqarsinnaavoq, Anori A/S-illu neriuutigaa suliniuteqarnini ineriartornermut aallarnisaataassasoq. Suliniummi aningaasartuutit annertupput, aningaasaliinissarlu nunat tamalaat akornanni aningaasaliisartunit pissarsiarineqarnissaa naatsorsuutigineqarpoq. Anori A/S-ip takorluugai aallaavigalugit Issittumi minguitsumik ingerlatsisinnaaneq takutinniarneqarpoq, Kalaallit Nunaannullu aningaasatigut periarfissaasoq ersersinneqarluni.
