19/09/2024
Suliffeqarfik issaqartitsisoq - inuussutissarsiortuni pisortanut pisortanilu pisortanut qaaqqusissut
Kalaallit Nunaanni Naligiissitaanermut Siunnersuisoqatigiit Sulisitsisut aamma Dansk Industri suleqatigalugit inuussutis...
Sermeq Helicopters Pilu Nielsenimit Camilla B. Christensenimillu pilersinneqarsimavoq, taakkua Islandimi takornarissanik timmisartuussinerup iluatsilluarneri isumassarsiorfigalugit, periarfissamik pilersitsisimapput. Kalaallit Nunaanni periarfissat, kiisalu angallannermi periarfissat killeqarneri peqqutigalugit Sermeq Helicopters pilersissimavaat.
Sermeq aallaqqaammulli sumiiffimmi takornarissanut aaqqissuisartut, takornariartitsisartullu suleqatigisimavaat, taamaaliornikkut kiffartuussinerat piffimmit piffimmut angallassinerinnarmik imaqanngilaq. Suleqatiginninnerat atuisunut immikkuullarissunik misigisaqartitsipput, ilatigut umiatsiartitsisarput, hestertitsisarput piniariartitsisarlutillu. Suliffeqarfik angallassinernik assigiinngitsorpassuarnik neqerooruteqarpoq, immikkuullarissortaalli tassaavoq sermersuarmut angalatitsineq, taakkunanilu pisiarineqarnerpaat ilagaat 'Glacier Landing'.
Sermeq Helicoptersip iluatsitsilluarneranut peqqutaaqataasoq tassaavoq inunnut eqaatsumik kiffartuussinermik aallussineq. Suliffeqarfiup tikikkuminartuunissaq pingaartippaa soorlu aamma atuisut pisariaqartitaat pillugit pilertortumik akisarnissaq kiisalu ingerlatsineq silamut allanngorartumut naleqqussarsimanissaa pingaartikkaat.
Sermeq Helicopterimi qulimiguullit atorneqartut, timmisartuussinernut assigiinngiiaartunut pisariaqartinneqartunut naleqqussarneqarsimapput. Qulimiguulik mikisoq, ataasiinnarmik motorilik AS350, issittumi atoruminartutut ilisimaneqarluartoq atugaraat, atuisuniillu patajaassusaa eqaassusaalu pillugit iluarineqarluarpoq. Qulimiguulik alla atugaat tassaavoq, Bell 206 Longrader, taanna amerlanerusunik ilaasoqarsinnaavoq, igalaakkaammallu isikkivissiutigilluarneqarsinnaalluni, taannalu takornarissanut tulluarneruvoq, taakkununngami ilorrisimaarnissaq takusassallu immikkuullarissut pingaartinneqarnerummata. Assigiinngitsunik periarfissaqartitsinikkut atuisut pisariaqartitaat matussuserniarlugit Sermeq Helicopters periarfissaqarpoq, takornarissanullu immikkuullarissumik misigititsisinnaallutik.
Sermeq Helicopterimi sillimaniarneq, suliaqarsinnaassuseq, attaveqaqatigiinneq, kiffartuussineq, suleqatigiinneq akisussaassuseqarnerlu pingaartinneqarput, taakkualu ulluinnarni ingerlatsinerminni atugarineqarput. Pingaartitat eqqaaneqartut peqqutaallutik suleqatigiit akornanni qanimut attaveqaqatigiinnissaq suleqatigiinnissarlu aamma pingaartinneqarput, taamaattumik patajaatsumik pitsaasumillu kiffartuussisoqarpoq.
Kalaallit Nunaanni silap pissusaa ilaatigut naatsorsoruminaassinnaasarpoq, tamannalu peqqutaalluni sillimaniarnerup iluani periusissat imartuut pisariaqartinneqarput, kiisalu naleqqussarfigisariaqakkat peqqutaallutik ilinniarluarsimasunik sulisoqartariaqarluni. Unammilligassat allat, soorlu COVID-19, suliffeqarfimmi naleqqussarsinnaassuseq tunngavigalugu nalimmassaaffigineqarsimavoq, ilaatigut atuisut inuussutissarsiuteqarfinneersut kiffartuunneqarsimapput, taamaaliorsimanerallu peqqutaalluni piffissami unamminartumi ingerlatsineq patajaatsumik ingerlatsiinnarneqarsinnaasimavoq. Periuserineqarsimasullu suliffeqarfiup naatsorsuutiginngisamik pisoqarnerani nalimmassarsinnaassusaanik takutitsiinnarput.
Sermeq Helicopteri pilersinneqarnerminit ineriartorluarsimavoq. Ineriartorsimanermik atuisut siammasinnerulersimapput, kiisalu timmisartuussissutaasinnaasunik piareersimasuutitaqalersimapput, angissusaali pingaartitaminnik aallussisinnaaneranik suli periarfissaqartitsipput.
