14/11/2025
Qaammammi matumani suliffeqarfitsialak: Esme Lounge
Qaammammi matumani suliffeqarfitsialak – Esme Lounge: Nuup qeqqani Imaq akullersuarsunnitsutNuup qeqqani, Café Esmeral...
Kalaallit Nunaanni umiarsualivinni ataqatigiissaarisut, nutsernermi aaqqissuisut, assartuinerit quersuarmiitsitsinerillu suliarineratigut Blue Water Greenland Kalaallit Nunaanni attaveqaasersuutini suliaqarnermi pingaarutilittut inissisimavoq. Decembarillu qaammataani Qaammammi matumani suliffeqarfitsialattut nersorniarparput.
Blue Water ulluinnarni Kalaallit Nunaanni Kalaallit Nunaannullu assartukkanik suliaqartarpoq. Danmarkimi quersuarni poortuisoqarlunilu ukioq kaajallallugu assartuisoqartarpoq. Assartukkat Kalaallit Nunaannut tikikkaangata, sulisut nunatsinneersut suliaqarneq nangittarpaat. Nassiussat, ataqatigiissaarinerit kinguneqartitsinerillu nunatsinni siku, anori isorartussuserlu eqqarsaatigalugit eqaatsumik pilersaarusiorneqartarput.
Suliffeqarfimmi imaatigut, silaannakkut nunakkullu assartuineq suliarineqartarpoq, taakkuali saniatigut kilisaatit umiarsuillu takornariartaatit sullillugit umiarsualivinni ataqatigiissaarisoqartarluni. Illoqarfinni arlalinni quersuaateqarput, annertuumillu Nuummi, Ilulissani, Sisimiuni, Aasianni Qaqortumilu takussaallutik.
Pilersuinermi qulakkeerinninneq pingaartitaraat. COVID-19-ip ajornartoortitsinerata nalaani Blue Water nakorsaatinik akiuussutissanillu assartuinermut pingaarutilittut inissisimasimavoq. Suliaqartut pingaarutillit, soorlu Air Greenlandip Royal Arctic Linellu suleqatigineratigut assartuineq patajaatsoq - naak pisuni imaannaanngikkaluani - qulakkeerneqarpoq.
Blue Waterip ukiuni tulliuttuni Kalaallit Nunaanni ineriartorsinnaanertik takorloorpaat. Nuummi umiarsualiviup allilerneratigut, aammalu Qaqortumi Ilulissanilu mittarfittaarnikkut attaveqaasersuineq pitsanngorsarneqassaaq, nunalu tikikkuminarnerulersinneqassalluni.
Suliniutini annertuuni, soorlu timmisartoqarfinnik sanaartornerni immikkullu assartuinerni misilittagaqarluarput. Suliani taakkunani ilisimasat nunatsinneersut nunarsuarmilu pissarsiassat atorluarneqarput - ass. Esbjergimi suliniutinik ingerlatsisugut immikkut ilisimasallit aammalu nunarsuarmi allaffigut allat 80-init ikinnerunngitsut.
Kalaallit Nunaanni aallussineq ersarippoq. Suliffeqarfik Ilulissani nutaamik quersuartaarlunilu allaffittaaqqammerpoq, Danmarkillu avataanut aningaasaliineq aatsaat taamak annertutigisoq pivoq Nuummi Nuuk Imip pisiarineratigut. Taamaaliornikkut takutinniarneqarpoq Kalaallit Nunaat nuna tikitassaaginnarani aallussiffissatut isigineqartoq.
