21/08/2026
DALO Industry Days 2026
Ukiuni qulikkaani kalaalllit suliffeqarfiutaasa illersornissaqarfiit sullitariuartarsimavaat. Uani pineqarput danskit aa...
Sulisut nunanit allaneersut pillugit kingullertigut oqallinneq inuussutissarsiortut akornanni amerlasuuni ernumalersitsivoq. Tassami suliffeqarfippassuarnut unamminartoq tassaanngilaq sulisut nunanit allaneersut Kalaallit Nunaannut tikittartut amerlavallaarnerat. Unamminartoq tassaavoq sulisussat amigaataanerat.
Sulisitsisuni Inuussutissarsiutit Immikkoortuannut Akunnittarfinnut Neriniartarfinnullu Ataatsimiititaliap aamma Nioqqutissanik Amerlasuunngorlugit Tuniniaasartunut Pisiniarfinnullu Ataatsimiititaliap Qeqqata Kommuniani borgmesterip Malik Berthelsen-ip sulisut nunanit allaneersut pillugit oqallinnermi isummat ungasinngitsukkut saqqummiussai taperserpaat. Oqallinnermi suliffeqarfinni pissusiviit suliffeqarfiillu pisariaqartitavii aallaavigineqartariaqarput. Inuussutissarsiutit Immikkoortuannut Akunnittarfiit Neriarniartarfiillu Ataatsimiititaliami siulittaasoq Lisbeth Hansen uparuaavoq:
”Sulisut nunani allaneersut pillugit isummat borgmesterip Malik Berthelsen-ip oqaatigisai ilisarilluarpagut. Inuussutissarsiutit immikkoortuini akunnittarfinni neriniartarfinnilu, nioqqutissanik amerlasuunngorlugit tuniniaasartuni pisiniarfinnilu sulisut nunatsinneersut kisimik sulisussarsiarineqarsinnaannginnerat aamma misilittagaraarput. Aamma suliffeqarfippassuit nunatsinneersunik sulisussarsiornermik annertuumik suliniuteqartareerput, peqatigitilluguli sulisut naammattut pisariaqartinneqartut pissarsiarineqarsinnaanngitsut misigisarparput.”
Taamaammat suliffeqarfiit pisortalluunniit nunanit allaneersunik sulisussarsioraangata, sulisunik nunatsinneersunik taarsiiniarnissaq aallaavigineqarneq ajorpoq, pissutaavorli atorfiit sulisunik nunatsinni pissarsiarineqarsinnaasunik inuttalerneqarsinnaannginnerat.
Taamaammat sulisut nunatsinneersut tunulliutillugit sulisunik nunanit allaneersunik sulisussarsisoqartarneranik isumaqarnerup politikkikkut oqallinnermi aallaavigineqannginnissaa pingaartuuvoq. Inuussutissarsiortunut apeqqut salliutillugu tassaavoq, suliffeqarfiit ammatinniarlugit, pisisartut sullinniarlugit siuariartortitsiniarlunilu sulisussanik pisariaqartunik sulisussarsisinnaanissaq.
Suliffeqarfiit sulisussarsisinnaanissaat killileqqinneqassappat kinguneri inuiaqatigiinni tamani misigineqarsinnaassapput. Tamassuma kingunerisinnaavaa ingerlatsinerit ikilinerat, ikinnerisunik aningaaliisarneq piffissat ammasarfiit killeqarnerat sullissinerullu ajornerulernera. Suliffeqarfiit unammillersinnaassusiat inuiaqatigiinnilu naleqalersitsineq tamarmiusoq naggataatigut ajornerulersinneqariaannaapput.
Kalaallit Nunaat ilaatigut takornariaqarnermi, sanaartornermi, nukissiuuteqarnermi attavilersuuteqarnermilu ineriartortitsinissamut annertuunik periarfissaqarpoq. Aatsaat sulisut naammattut pissarsiarineqarsinnaappata periarfissat tamakku piviusunngortinneqarsinnaapput. Sulisitsisut taamaammat isumaqarput, sulisussarsisinnaanerup qanoq pitsanngortinnissaa aamma suliffeqarfiit pisariaqartinneqartunik piginnaasalinnik qanoq pissarsisinnaanissaat sammineqartariaqartut. Inuit amerlanerit sulinerat, sulisut nunatsinneersut amerlanerit sulinerat aamma nunanit tamaneersunik sulisussarsisinnaaneq imminnut akerleriinngillat. Tamanna Kalaallit Nunaanni siuariartornerup, ineriartortinnerup nunaanik aningaasaliisarnerit attatiinnarnissaannut pisariaqarpoq.
Taamaammat sulisut nunanit allaneersut pillugit oqallinnermi killilersuinissat pineqarnerat annikinnerusariaqarpoq, kisiannili sulisussanik amigaateqarneq suliffeqarfippassuani ulluni tamani malugineqartareersoq pineqarnerusariaqarluni.
