19/01/2024
2023-mi Kalaallit Nunaat eqqissisimaarfiusoq Nunarsuarmi eqqissiviilliorfiusumi
Sulisitsisuni pisortaaneq, Christian Keldsen 2023 kingumut qiviarpaa. Nuannaarutigaa ilaasortaqarnikkut siuariaateqarsim...
Hotel Qaqortoq, Qaqortumi illoqarfiup qeqqani inissisimavoq, hotelilu 1986-imi ammaqqaarnerminit ingerlasimanera maluginiagassaavoq. Hoteli illoqarfimmi inuussutissarsiortunit pinngortinneqarsimavoq, taakkunanilu Erik Nørskov ingerlatsisuusimalluni. Hoteli ammaqqaaramili ingerlalluarlunilu assoralisimaartarsimavoq, taamaakkaluartoq nalimmassartuarsinnaasimallunilu ineriartortuarsinnaasimavoq. 2007-imi ingerlatsineq Jim Riisimit tiguneqarpoq, nutarterinerlu annertooq ukioq ataaseq ingerlanneqarsimavoq. ”Asuleerluta oqartarpugut sømandshjemi affaannarmik ullorialerneqarsimasoq ingerlatilersimallutigu,” Jim Riis oqarpoq. Persuarsiorpallaarnani ingerlatseriaasiusimasup Hotel Qaqortup ingerlallualerneranut aallussisimaneranullu takussutissiisuuvoq.
Hotelip nutarterneqarnerata kingorna sukkasuumik ineriartortoqarsimavoq, tamassumalu takutippaa illoqarfimmi sumiiffimmilu hotelimi pitsaasumik pisariaqartitsisoqarsimasoq. Siullertut hoteli pingasunik ullorialerneqarnissaminut HORESTA-mut qinnuteqarsimavoq, amerlanerusunimmi ullorialerneqassagunik neqeroorutissanik amigaateqaramik. Piffissap ingerlanerani kiffartuussissutit pitsanngorsarneqareermata sisamanik ullorialerneqarnissamut qinnuteqarsimapput. 2017-imi alliliinermut atatillugu ataatsimiittarfiit aamma pitsaassusaat nalilerneqarsimapput.
Hotel Qaqortoq annertuunik unammilligassaqartarsimavoq, aningaasatigut ajornartoorneq kiisalu coronap ajornartoortitsinera. Aningaasatigut ajornartoortoqarnermi Jim Riisip sulisut pisariaqartinneqanngitsut piiarsimavai, tamatumalu kingorna pitsaassuseq kiffartuussilluarnissarlu pingaarninngortissimallugit. Tamannalu iluatsilluarsimavaa, tassami ajornartoorneq qaangiummat hoteli suli pitsaanerulersimavoq. Isertitat annertuseriarsimapput, sulisullu amerlineqarsimallutik - iliuuserisimasallu eqqortuusimasut tamanna takutitsivoq.
Coronap ajornartoortitsinera nallermat hoteli piareersarluarsimaneruvoq. Jim Riisip suleqatigisartakkani aningaasaateqarfiillu unamminartoqarsinnaaneranik nalunaarfigereersimavai, tamanillu tapersersorneqarsimalluni. Tamannalu suliffeqarfiup ingerlanneqarnissaanut sulisunullumi eqqissinarlunilu toqqissinarsimavoq. Ajornartoorneq qaangiummat hoteli ajorani aniguivoq, hotelillu pisiareqqaarneranit takorlooruminaassimasumik annertuseriaannarsimallutik.
Inuussutissarsiorfiup iluani ilinniarsimanngitsutut misilittakkat nalilersorneqarsinnaasimanngillat. Nammineq pisariaqartitat aallaaviginagit, atuisut pisariaqartitaat aallaaviusimapput, atuisullu oqaatigisartagaat aallaavigalugit ineriartorneq ingerlajuarsimavoq. Oqariartaaseq ”dit hjem – hjemmefra!” – kalaallisut ”Angerlarsimaffivit avataani angerlarsimaffiit” pingaartinneqarsimavoq, taamaattumik hotelimi sulisut pikkorissiartuinnarsimallutik. Igasut saaffiginnittarfimmilu sulisut ilinniarsimasuupput sulilersunullu nutaanut piumasaqaateqartoqartarsimalluni, tamannalu ineriartornermut pingaaruteqarsimaqaaq. Hoteli iluatsitsilluni sulisunik pikkorissunik kajumissusilinnillu sulisoqarpoq, taakkualu hotelip ingerlalluarnerinut pingaaruteqartorujussuupput.
Jim Riis aallerteqqaarami siunnersorneqarami oqarfigitissimavoq, Kalaallit Nunaanni hotelit neriniartarfii aningaasarsiorfiusinnaanngitsut. Neriniartarfik attartortinnagu misilittaarusunnerusimapput, nerisassanillu najugaqartut soqutigisinnaasaannik neqerooruteqarlutik. Tamatuma kingorna caféqalerput, ullumikkullu taanna brasserienngorsimavoq 100-nik isersimasoqarsinnaasoq, tamatumalu takutippaa Kalaallit Nunaanni hotelini nerisassat sassaalliuteqarnerlu aningaasarsiorfiusinnaasut.
Piffissami matumani Hotel Qaqortup ineeqqat amerlineqarnissaat pinerullugit allileqqinneqarnissaanut isumaqatiginninniarnerit ingerlapput. Naak niuerfimmi unamminartoqaraluartoq, sanaartornermilu akit erniallu qaffasikkaluartut siunissaq isumalluarnartorujussuuvoq.
Hotelip illoqarfimmi inuussutissarsiorfimmilu atorneqarnissani anguniartuaannarpaa. Ataatsimiinnerni, workshopini suleqatigiinnernilu peqataajuaannarput, siunissamullu takorluukkat eqqarsaatigalugit suleqatigilluarneqarsinnaasutut isigineqarluni.
Suliffeqarfinnik aallarnisaaneq eqqarsaatigalugu siunnersuinissamut Jim Riisip oqaatigaa, tutsuiginassuseq tatiginninnerlu pingaaruteqartorujussuusut, taakkualu inuussutissarsiortup piginnaasaanni naleqarnerpaasut. Taakkualu tassaapput Hotel Qaqortup ingerlanneqarneranut iluatsitsisimaneranullu tunngaviusut.
Siunissamut takorluukkat arlaqarput, anguniakkallu annertupput Jim Riisilli siunissami unammilligassaasinnaasut iliuuseqarfigisinnaaniarlugit oqaatiginianngikkallarpai suunersut.
