Aalisarneq tassaavoq inuussutissarsiutitta annersaat nunattalu aningaasaqarnerata sukarsuisa nappataat. Taamaattumik pingaaruteqarpoq allaffissornikkut isumatusaartumik ataavartumillu sulissutigissallutigu, taamaasillutalu pisuussutitta pingaarutillip kingulissatta aamma iluaqutigisinnaasussanngorlugu. Ataatsimiitsitaliarsuup nalunaarusiaa ernummassuteqartuusoq oqariartuutai ersarissuupput:
- Siunissami pisuussutit suliffissaqartitsiniarneq, aningaasarsiornermut atugarissaarnissarlu pillugit attatiinnarlik
- Aalisarnermut inuussutissarsiorneq ataavartunik malikkuminartunillu sinaakkusersigit ineriartoqqinnissamullu angusaqaluarnissamut aalisarnermullu politikkimi anguniakkat annernut aningaasaliissutigineqartussatut pingaartitaralugu.
- Aalisarnikkut allaffissorneq aaqqissuussiuk, aalisartoq ataasiakkaaq isaatitsilluarsinnaanngorlugu ataatsimullu pisuussutit erniaa annertusisinnaanngorlugu, taamaasilluta pisuussutit erniaata akileraaruserneqarnerata aqqutigalugu akuersaarneqarsinnaasumik agguataarnerasigut pisuussutit ernianik agguaasoqarsinnaanngorlugu.
- Aqutsinermi politikkikkut aqutsineq immikkoortinneqarli ersarissumik naligiissitsinermillu ingerlatsineq qulakkeerumallugu
- Pisuussutinik atorluaanermi ingerlatsisuusuni piginnittuussusueq annertusineqarli aalisarsinnaasut amerlinagit
- Sulisoqarnikkut ilinniartitaanikkullu politikkut aaqqissuussinerit ingerlassigit aalisarnikkut politikki allanngornerisa ilutigisaanik, isumaginninnikkut ataavartitsineq qulakkeerumallugu
Maannakkut imatut isikkoqartillugu sinerissap qanittuani qaleralinniarnerup pinngortitarsiuup innersuussutaanit 70 %-mik qaangerneqartarput saarullinniarnermilu ingasammik 300 %-mik qaangerneqartarluni. Aalisapilunneq ima ernumanartigisumik annertutigivoq meeqqagut ernuttagullu aalisagaateqassanersut nalorninartumiilluni. Suna tamarmi ajornartooratarsinnaanerata tungaanut ingerlavugut, ukiut arlaqanngitsut iluanni. Tamanna pimoorullugu tigusariaqarparput.
Qaleraleqassuseq kinguariartorsimavoq aalisarnerusoqalersimavoqlu ukiualuit kingulliit annertussuserineqartarsimavoq anguniarlugu. Pisarineqarsinnaasunut sanilliullugu ingerlatsisut amerlavallaarput – aammalu ataavartitsineq eqqarsaatigalugu. Umiatsiaararsortoq 33 tons missingerlugit qaleralissinnaavoq immaqaluunniit 67 tons ilaquttani pilersorsinnaajumallugit, kisiannil nalilerneqarsimavoq akuersissummik peqartuni qaleralinniat 80 %-ii aammalu saarullinniat 65 %-ii taaneqartumiit appasinnerunissaat.
Inuiaqatigiittut inissisimaffik tassaniitsiinnarsinnaanngilagut, branche allat aqqutigalugit aningaasatigut inissisimanerisa pitsanngoriaateqartissinnaavagut, taakkuami sulisussanik amigaateqarput. Ullumikkut aalisarnikkut imminnut pilersorsinnaanngitsut inuussutissarsiutit allat iserfigalugit ilinniarnissaannut periarfissiisariaqarpugut. Ilaqutariit amerlasuut inissisimaffigissarnerulersissinnaavagut inuiaqatigiinnullu tunniussaqarnerulersillugit.
Inissisimaffik taamaaginnarsinnaanngilaq, Sulisitsisulli politikkerertagut piumaffigerusuppaat ataatsimiitsitaliarsuup innersuussutai pimoorullugit tigussagaat siunissamilu aalisarnikkut allaffissornermut atuutilersillugit – piffikkaartumik pilersaarusiamut aammalu aalisarnermut inatsisissamut. Aalisarneq siunissami ungasissumittaaq inuussutissarsiutissaraarput, soorlu aamma kingulissagut iluaqutigisassarissagaat.