Qaammatip suliffeqarfia: Galleri Glas og Ramme

Nuup qeqqaniippoq Galleri Glas og Ramme, suliffeqarfik Kalaallit Nunaanni eqqumiitsulianik sinilersuinermillu suliaqaannarani, piunini tamakkerlugu suliarisartakkaminut kulturimullu soqutiginnivissortoq. Suliffeqarfik 1973-imi Roar Chritiansenimit pilersinneqarpoq, suliffeqarfik niuernermik tunngaveqarluni ingerlataavoq, pilersitsisoq nunat kulturillu assigiinngitsut najoreerlugit Kalaallit Nunaannut nunnippoq.

Roar Christiansenip inuunermini oqaluttuassartaa Samsømi, Kolby Kaasimi, aallartippoq, 1939-imi inunngornerminit. Peroriartornera allanngorarsimaqaaq, ilaatigut sorsunnersuup aappaata nalaani kingornalu Danmarkimi Frankrigimilu najugaqartarsimavoq. Aasaanerani akkaminut nuliaanullu Frederiksbergimi tikeraarnermini igalaaminilerinermik aatsaavissuaq misilittaavoq. Naak siunissamut suliassaminut sunniutaa ilisimanngikkaluarlugu, suliariligassaanut tunngaviliisuusimavoq.

Misigisassarsiorusussuseq ilisimanngisanillu misilittaarusussuseq aallaavigalugu Roar 1961-imi aalajangerpoq Frankrig qimallugu ilaquttani nassarlugit Kalaallit Nunaannukarniarluni, tassanilu sakkutuujuniarluni. Aalajangerneq nunamut attuumassuseqarfigiligassaanut aallarniutaavoq. Roar sakkutuuni suliassani naammassigamiuk Kalaallit Nunaanniiginnarpoq, taamanilu pequsiortartut assigiinngitsut suliffigisimavai, naggataatigullu Nuummi nammineerluni sannavittaarlunilu pisiniarfiutitaarpoq.

Galleri Glas og Ramme sinilersuisartutut aallartippoq, sivitsunngitsorli eqqumiitsulianik takutitsivittut aamma atulerpoq, tassanilu kalaallit eqqumiitsuliaat pisiassaallutik. Suliffeqarfik alliartupallappoq, 1985-imilu Tuapannguit 8-mut, massakkut inissisimaffigisaminut, nuuppoq, eqqumiitsulianillu takutitsivittut takorluugaqarnini piviusunngortillugu. Ineriartorneq malunnaateqarsimaqaaq, eqqumiitsuliornerullu iluani ineriartornissamut aallussinissamullu periarfissanik nutaanik ammaassilluni.

Roarip eqqumiitsulianik soqutigisaqarnera uani qitiusimavoq. Eqqumiitsulianik takutitsivimmi eqqumiitsuliortut nunatsinneersut nunanit tamalaaneersullu eqqumiitsuliaat takuneqarsinnaapput, eqqumiitsulialli tamarmiullutik Kalaallit Nunaannik takutitsisuupput. Eqqumiitsuliat assigiinngitsorpassuupput, ilaat nunamut attuumassuteqarput, ilaat kulturimik pinngortitamillu takutitsiniartuullutik siammasissuullutik. Roarip kalaallit eqqumiitsuliaannik piujuartitsinissap siaruarterinissallu pingaassusaa naqissuserpaa, uani eqqumiitsuliorneq Kalaallit Nunaanni kulturikkut kingornussassatuinnaq isiginagu, siunissamut aningaasaliinertut isigaa.

Roarip ukiut 50-it sinnerlugit misilittagaqareerluni siunissamut isumalluarpoq. Niuernermi pissutsinut nutaanut nalimmassarsinnaalluarpoq, kalaallillu eqqumiitsuliaannik suliaannillu suli tapersersuiniarluni. Suliani ingerlatiinnassamaarpaa inuiaqatigiillu najugaqarfini aallukkusullugit aammalu eqqumiitsuliortut nutaat pinngorartitsinerup iluani periarfissaminnik misilittaarusuttut tapersersorniarlugit.

Roar Christiansenip inuunerata suliffeqarfiatalu takutippaa, inuup soqutigisaminut kulturikkullu kingornussassanut aallussinera. Galleri Glas og Ramme eqqumiitsulianut sulianullu attuumassuteqaannanngilaq; nunarsuarmiilli kinguaariit assigiinngitsut akimorlugit oqaluttuat ataatsimoorfigaat piuffigalugulu.