Nunarsuarmi aternik isertuussilluni nalunaarsinnaalerneq annertusiartuinnarpoq aamma kalaallit suliffeqarfiutaat aaqqissugaanerminni pilersikkiartuaarpaat. Aternik isertuussilluni nalunaarsinnaanerit suliffeqarfiit suulluunniit qitiusumik sulisoqarnerminni politikkerilertariaqarpaat suliffeqarfillu angineruppat suli taamatut aaqqissuussineq pingaaruteqarnerulissaaq.
Aternik isertuussilluni aaqqissuussineq imatut ingerlasarpoq, suliffeqarfimmi sulisut tamarmik atii isertuulluullugit ajortuliortoqarsimanerani pasitsaassaqaraangami suliffeqarfiup iluani nalunaaruteqarsinnaapput. Suliffeqarfimmi namminermi inatsisinik unioqqutitsinerit imaluunniit sulisut ilaannit/pisortamilluunniit unioqqutitsinerit.
Aternik isertuussilluni aaqqissuussineq illup iluani imaluunniit avataaniit aqunneqarsinnaavoq sulifffeqarfimmi teknikkikkut atortunik immikkoortillugit aaqqiisimagaanni attaveqaatit eqqarsaatigalugit taakkualu piumasaqaatitaqarput inunnut paasissutissat mianernartut illersorniarlugit. Pingaaruteqarluinnarpoq 100 %-imik inuit atiisa ilisimaneqannginnissaat taamaasilluni suleqataasoq assersuutigalu atorfimmi annaanissaanik ersissuteqarunnaarsillugu imaluunniit inuttut atugaanik nalunaaruteqarsimanini tunngavigalugu. Taakkua pisuugajupput amerlasuut suliffeqarfimmi ajortuliortoqarsimatillugu paasissutissanik ingerlatitseqqittannginnerannik.
Aternik isertuussilluni nalunaaruteqartarnerit akisussaaffimmik pingaarutilerujussuarmik oqariartuuteqarpoq tassalu suliffeqarfiup ingerlatsisuinut sulisuinullu kisianni aamma inuiaqatigiinnut. Tamanna peqatigitillugu taamatut aaqqissuussineq allanut naleqqiullugu ajornarpallaanngilaq – maannakkummi atorneqarsinnaasunik aaqqiissuteqartoqareerpoq. Taamaattumik Sulisitsisut suliffeqarfiit ilaasortaasut tamarmik aternik isertuussilluni nalunaaruteqartarnissamik aaqqissuusinermik peqalersinnaanertik eqqarsaatigeqqullugu, taamatut iliuueqareersimanngikkunik.