”Sukkasuumik-sulisussarsiorneq ingerlavoq”, taamatut Naalakkersuisut tusagassiutinut nalunaarumminni allapput ulloq 17. januar 2022. Tamanna inuussutissarsiornermik ingerlataqartunik isumaqatigineqanngilluinnarpoq, suli sulianut tunngatillugu ataatsimut isigalugu annertuumik ajornartorsiortoqartorujussuuvoq, naak Namminersorlutik Oqartussat akissarsianik- aamma sulisunut atugassarititaasut ilumoortumik aningaasartuutit millisinneqaraluartut.
Sulisitsisut 2006-imiili Namminersorlutik Oqartussanut noqqaassuteqarput Savalimmiormiut aaqqiissuussannut assingusumik aaqqiissuteqaqqullugit, kisianni nunarsuarmut tamanut atuuttumik EU kisiat pinnagu. Maannakkut aaqqissuussineq atuutilersumi suli EU-miit sukkasuumik-aaqqissuussineq pinngilarput aamma nunarsuarmut tamanut atuuttumik pinngilluinnarpugut. Tassami suli qaammatip ataatsip missaani EU-p iluani sulisussarsiornermi suliamik ingerlatsineq aatsaat aallartittarpoq aamma nunarsuup sinneraniit sulisussarsiorneq qaammatit 3-5 missaani sulisussarsiornerup suliarineqarnissaa ingerlasarpoq.
Aaqqissuussinerup taassuma pilersinneqarsimasup taamasilluni inuussutissarsiornermik ingerlataqartut kissaataat sukkasuumik-aaqqissuussineq aaqqiivigineqanngilluinnarpoq, tassami ilimasuutigineqarsimagaluarpoq, sulisussat nunamut maanga tikisinneqarsinnaanerat, suliassatik aallartinniassammatigit, danskit pisortaannut suliakkiunneqartup ingerlannerani. Sulisoq akuerineqassanngikkaluarpat, taava sulisitsisup isumagisussaavaa sulisoq pineqartup sukkanerpaamik angerlartinnissaa.
Naalakkersuisut isumaat malillugu nunami allamiunut inatsisip 2001-imeersup allanngortinnissaa pisariaqarpoq, inuussutissarsiornermik ingerlataqartut unammillernartuutaat naammassissagaanni, oqartoqarsimanera malillugu qallunaat pisortaannik oqaloqatiginninnerit aallartissimapput. Inatsimmik allanngortitsinissaq pisariaqarsimappat, taava Sulisitsisut sakkortunerpaamik Naalakkersuisut kaammattussavaat suliap sukkanerusumik suliarineqarnissaa qulakkeeqqullugu, tassani inatsimmik allannguineq sukkanerpaamik ingerlanissaa eqqarsaatigalugu.
Inuussutissarsiornermik suliaqartut sulisussanik amigaateqarnerat nukinginnartuuvoq aamma iliuuseqarnissaq massakkut pisariaqartinneqarpoq.