Amaroq Minerals, Kalaallit Nunaanni aatsitassarsiornermi pingaarnertut inissisimasoq, aatsitassarsiornerup iluani piujuartitsinermik tunngaveqarluni misissuinermi ineriartornermilu ingerlaarpoq. CEO Eldur Olafssonip suliffeqarfiup ingerlaarsimanera siunissamilu sumiiffimmi ineriartortitsinissamut piujuartitsinissamullu anguniagai allaatigisami atuarneqarsinnaapput.
Amaroq Minerals, siornatigut Alopex Gold Inc.-imik ilisimaneqartoq, 2017-imi pilersinneqarsimavoq, pilersitsinermi Kalaallit Nunaanni aatsitassarsiornerup iluani pingaarnertut inissisimanissaq anguniarneqarsimavoq. Suliffeqarfik aallartikkamili Nalunami kuultisiornikuunerup aallarteqqinneqarnissaa anguniarsimavaa, tamatumali kingorna suliarineqartut annertusarneratigut Kalaallit Nunaata kujataani aatsititassanut arlalinnut akuersissutinik pissarsisimapput. Suliffeqarfik ”Amaroq Minerals”-itut 2022-mi rebranderneqarnermini suliffeqarfiup Kalaallit Nunaanneernini naqissuserniarpaa. Suliffeqarfiup taaguutimini ”Amaroq” tunngavigalugu piujuartitsinermik inuiaqatigiinnullu attuumassutilinnik ingerlatsinini takutinniarpaa.
“Aallartikkattali Kalaallit Nunaanni kingornussassanik pitsaasumik pilersitsinissaq akisussaassuseqartumik aatsitassiornikkut anguniarparput, tassanilu najugaqavissunut suliffissanik pilersitsiniarsimavugut aammalu piginnaasanik ineriartortitsiniarsimalluta,” taama oqarpoq Eldur Olafsson, Amaroq Mineralsimi CEO.
Unammilligassat nutaaliornikkut qaangerneqartut
Amaroq Minerals aallartinnerminiilli assigiinngitsunik unammilligassaqartarsimavoq, tassunga ilanngullugit COVID-19-ip ajornartoortitsinera. Angallannermi killilersuineq peqqutaalluni suliffeqarfiup tunisassiassatik kinguartittariaqarsimavaat, piffissamili pineqartumi geologiskimik misissuisoqarlunilu tunisassiat annertusarneqarsimapput. ”Aalajangiussassaq imaannaanngitsoq, tassa tunisassiornissap kinguartinneqarnissaa, aalajangiiffigisimavarput, tamannali peqqutaalluni akuersissutinik allanik pissarsinissarput sulissutigisimavarput, taamaalilluta siunissaq ungasinnerusoq isigalugu ineriartorfissarput sulissutigisimallutigu,” Olafsson nassuiaavoq.
Kalaallit Nunaanni avinngarusimasumi sulineq angallannikkut unamminartortaqarpoq, Amaroq Mineralsilli eqaatsumik ingerlariuseqarneq nutaaliornerlu aqqutigalugit iluatsitsilluarsimapput. Suliffeqarfik geofysikkimi geokemiskimilu teknologiinik atuivoq taamaalilluni aatsitassiorneq nutaaliaasoq ingerlanneqarluni. ”Pingaarnertut anguniakkatta ilagisimavaat Kalaallit Nunaanni aatsitassiornerup iluani kiffartuussinermik pilersitsinissaq, tassanilu suliagut kisimik pitsanngorsaaffigineqaratik suiffeqarfinnik allanik suleqateqarneq pitsanngorsarniarneqarsimavoq,” Olafsson aamma oqaluttuarpoq.
Ineriartorneq sumiiffimmilu aallussineq
Suliffeqarfiup Nalunami aatsitassiornermik aallartinnissaminut suliaqaqqaarnissaminullu piareersarnermini, Amaroq Minerals suliarisinnaasaminut pikkoriffimminnullu ineriartungaatsiarsimavoq. 2024-p qeqqani suliffeqarfik agguaqatigiisillugu ullormut 96-nik sulisoqarpoq, taakkualu affai sinnerlugit kalaaliupput. Najugaqavissunik sulisoqarnissamut iliuuseqarnerat tunngavigalugu Amaqqup Kalaallit Nunaanni inuiaqatigiinni aningaasaqarnermilu ineriartortitsiniarnera takuneqarsinnaavoq.
Aamma Amaroq Mineralsimi misissuinermi ingerlatat annertusingaatsiarnikuupput, suliffeqarfillu maanna akuersissutigineqartut saniatigut ingerlataat arlaqarput. Ingerlatsinermi naammassissaqarsinnaassuseq tunngavigalugu suliffeqarfimmi misissuinerit arlallit suliarineqarsimapput, taakkualu tunngavigalugit sumiiffimmi aatsitassarsiorfiusinnaasut ilisimaneqarnerulerlutik. ”Ingerlatsiffimmi ataatsimi misissuiffimmik 40-nik sulisoqarsinnaasumik pilersitsisimanitta takutippaa sulisutta tunniusimallutillu eqaatsumik suleriuseqarnerat,” Olafsson oqarpoq.
Piujuartitsinermik ingerlatsineq tunngaviusumik ingerlariusitut
Piujuartitsinermik ingerlatsineq Amaroq Mineralsip ingerlanneqarneranut tunngaviuvoq. Suliffeqarfik aallartikkamili piujuartitsinermik tunngaveqartumik ingerlatsinissani aallartisarsimavaa, tassunga ilanngullugu aatsitassanut eqqagassanut panersiiviit, taakkualu avatangiisinut mianerinninnerpaatut isigineqarput. Taakkua saniatigut Amaroq Mineralsip ataavartumik nukissiorfiusinnaasut misissorpaat, taamaaliorsinnaalerunillu sumiiffigisaminni generatorit dieselitortut kisiisa naatsorsuutigineqarunnaassagaluarput. Tamanna ingerlatsinerminnut iluaqutaaginnarani sumiiffinni ataavartumik nukissiortoqarsinnaaneranut aamma qulakkeerinneqataassagaluarput.
Ukiup ingerlanerani suliffeqarfiup Nalunami avatangiisinut sunniutit pillugit nalilersuisitsineq (EIA) aammalu inuiaqatigiinnut sunniutit pillugit nalilersuisitsineq (SIA) naammassivaat, taakkunanilu sumiiffimmi soqutigisallit ineriartortitsinissamut peqataatinneqarnissaat qulakkeerneqarpoq. ”Kalaallit Nunaanni inuiaqatigiinni aqutsisut aammalu suliffeqarfiit Innovation South Greenlanditut, Siu-Tsiutullu ittut suleqatigaagut, taamaaliornikkullu qulakkeerniarparput suliagut sumiiffinni pisariaqartinneqartut naatsorsuutigineqartullu naapertorlugit ingerlanneqarnissaat,” Olafsson naqissusiivoq.
Siumut isigaluni anguniagaqarneq
Amaroq Mineralsi Kalaallit Nunaanni aatsitassarsiornerup iluani periarfissanik angisuunik takunnissinnaavoq. Aatsitassat mianernartut, soorlu kanngussat, nikkelit pissarsiariuminaatsullu allat nunarsuarmi piumaneqarneri annertusigaluttuinnarput, Kalaallit Nunaannilu pisuussutsit atorneqanngitsut peqqutaallutik nuna nunarsuarmi kitaaniinnerusunut pilersuisunngorsinnaavoq pingaarutilittut inissisimalluni. ”Kalaallit Nunaat nunarsuarmi niuerfimmi pingaarutilittut inissisimaleriaannaavoq, ingammik nunarsuarmi aatsitassanik mianernartunik pilersuisunik assigiinngisitaartunik atuerusuttunut,” Olafsson maluginiagaqarsimavoq.
Amaroq Minerals ineriartornermi qitiusumik inissisimanissaminut piareersimavoq, aammalu Kalaallit Nunaani aningaasaqarnermut suleqataarusulluni minnerunngitsumillu mingutsitsinnginnerusumik nukissiuteqarnissamut nunarsuarmi ineriartortitsinissamut aamma suleqataarusulluni. Kalaallit Nunaanni aatsitassat annertuut atorneratigut suliffeqarfiup pilersuisunik ataasiakkaanik naatsorsuuteqarneq annikillisarusuppaat, aammalu nunarsuarmi mingutsitsinngitsumik nukissiornermi teknologimut pilersuinermut pisariaqartinneqartumut peqartitsinissamut qulakkeerinnikkusulluni.
Amaroq Mineralsip anguniagaa ersarippoq: Kalaallit Nunaanni aatsitassarsiornermi kingornussassanik piujuartitsinermik tunngavilimmik pilersitsineq, taannalu nunaqavissunut iluaqutaallunilu nunarsuarmut iluaqutaassaaq. ”Suliffeqarfinnut Kalaallit Nunaanni ingerlalluarusuttunut allanut siunnersuutigerusutarput pisariitsunnguuvoq – nunaqavissut soqutigisaat salliussigit. Nunaqavissut qanimut suleqatigikkit, aammalu suliffeqarfimmi ingerlatsininni avatangiisit eqqarsaatigalugit piujuartitsinermik tunngaveqarnissaq pingaartillugu,” Olafsson siunnersuivoq.
Suliffeqarfik suli ineriartorpoq, Kalaallit Nunaannilu naleqarnerulersitsiartuinnarluni aammalu Issittumi siammasinnerusumik inuussutissarsiutinik ineriartortitsinissamut tapersersuilluni.