Arfininngormat ulloq 26/2 Nuummi Sulisitsisut Nuummiittumi Hotel Hans Egedemi ataatsimeersuarnertik ingerlappaat, ilaatigut inuussutissarsiornermi periarfissat, mittarfissaq nutaaq, eqitertitsineq aamma pisortat namminersorlutillu inuussutissarsiortut pillugit oqallipput.
”Nunarsuarmioqatitsinnut matut ammangajalerpagut. Mittarfiliortitsernerit aallunneqarluarput aamma taakku malitsigisaanik periarfissat annerpaamik pissarsivigissagutsigut maannangaaq piareersarluta aallartereertariaqarpugut. Nuuk 2024-imi nunanit allanit tikeraartunit tikikkuminarnerulerpat, inuussutissarsiornermik ingerlataqartutut piareersimasariaqarpugut. Takornariartitsisuinnaanngitsut, maanna tikeraartussanut amarlasuunut piareersarlutik ingerlallualereerput, kisianni suliassallit allat, tikerartussarpassuarnik iluaquteqarsinnaasut, illoqarfitta tikerarneqarneranik misigisaqaratarsinnaasut” taamatut nalunaarusiamini oqarpoq siulittaasup tullia Jens Paulsen.
Naggataagut nalunaarusiamini politiikerinut kaammattuuteqarpoq
”Siunissaq isigalugu nunatta pilersaarusiornera suliarilerussiuk, soorunami pilersaarusiassani qanoq ililluni nunarput tamakkerluni pitsaanerpaamik ineriartorsinnaanersoq – tutsuiginarluinnartumik aamma ineriartortitsinissamik iliuuseqarnissaq nunarput tamakkerlugu pisariaqarpoq – kisianni ineriartortsitsinissamut iliuusissami nunatsinni illoqarfiit pingaarnersaat qitiulluinnartumik inissisimavoq. Nunarput tamaat pillugu nunamut politikkimi immikkut ittumik iliuusissamik Nuummut tunngatillugu pisariaqarpoq nunatsinnut tamanut iluaqutaasussamik. Nuummi Sulisitsisut akerliunngillat- kisianni tassunga tunngatillugu nipilersoqataapput. Tamanik pisinnaasarput tamaat taperseerusuppugut. Tassami aamma uagut soqutigisaraarput, Kalaallit Nunaat tamakkerluni aningaasarsiorfiulissasoq. Iluaqutiginiartigummi!”
Ataatsimeersuarnermi Bo Eriksen siulittasutut nutaatut qinerneqarpoq. Sulisitsisut siulittaasunngorlaaq pilluaqqorujussuarpaat aamma peqatigitillugu siulittaasoq Nungo Pedersen, tunuartoq qujaffigerujussuarparput ukiuni amerlasuuni soqutiginnilluarluni suleqataaneranut.
Aamma annertuumik Jens Paulsen qujaffigaarput, siulersuisuni ukiorpassuarni suleqataareerluni tunuartoq.
Naggataatigut minnerunngitsumik Britta Keldsen, Artic Law-imeersoq qutsavigissavarput ataatsimiinnermi eqqissisimasumik torersumillu aqutsisutut pitsaalluinnartumik qulakkeerinninneranut.