Naalakkersuisut aammaarlutik Corona pillugu tusagassiortunik ataatsimiisitsipput, inuussutissarsiornermik ingerlataqartut aammaarlutik minitaallutik misigaat. Killilersuinerit, inuiaqatigiit inuussutissarsiornermillu ingerlataqartut ukiuni marlungajanni naleqqussarsimasut maanna ima annertutigisumik oqilisaanneqanngillat, maanna suliffeqarfiit pisumi ajornartoorfimmi inissisimaneranni. Inuussutissarsiornermik ingerlataqartut naalliupput aamma sivisoorujussuarmik naalliupput – maanna pisoq ajorluinnarpoq. Ingammik takornariartitsinermik-, unnuissarfinnik neriniartarfinnillu ingerlataqartunut.
Sulisitsisut qaammaterpassuarni politikkikkut iliuuseqartoqarnissaa ujartorsimavaat, ilaatigut ikiorsiissutinut tunngatillugu, aamma taakku suliffeqarfiit kaaviaartitassanik annaassaannut, aqqissukkanik pisussaagaluit taamaatiinnarneranut tunngatillugu, anigaasartuutinut aaliangersimasunut sulisullu akissarsiaannut killilersuinerit malitsigisaannik. Tamaviaarluta ikiorsiissutit atuutitilernissaat pillugit sulisimavugut aamma killilersuisoqalissagaluarpat peqatigitillugit nalunaaruteqartarnissat pillugit. Kisianni aammaarluni akerlianik pisoqarpoq, politikkimik suliaqartut taamaasiortoqarnissaannik neriorsorneqarsimagaluarluta. Sakkukitsumik oqaatigalugu pakatsinarpoq.
Anigaasatigut ikiorsiissutit maanna ikimut ammasumut taamaallaat mattutaannannguupput. Inuussutissarsiornermik ingerlatqartuutigut nappaalanersuaq taanna ajunngitsumik qaangissagunikku, taava killilersuinerit siumut ingerlariaqqinnissamut aqqutissaajunnaarnikuupput. Inuiaqatigiit A-t B-llu pilersippaat, inuttut, socialikkut aningaasarsiornikkullu annertoorujussuarnik nalillit. Aamma taassuma qaavatigut pineqartunut tunngatillugu equngasorjussuarmik eqquipput. Nappaatip atuunnerani ilisimasarilersimasat tuniluunneranullu tunngasut tunngavigalugit taava killilersuinerit amerlanerpaartaat taamaatinnartariaqaraluarput, taamaasillutalu ulluinnarnut nalinnginnaasunut peqqissagaluarpugut, ilaatigut imatut iliorluta:
- Katersuunnissanut killilersuutit atorunnaarsillugit – taakku kukkulluinnartumik eqquipput.
- Kalaallit Nunaanni Coronapasseqarnissamik atorunaarsillugu – tamatumanimi siunertaa atuutinngilaq.
- Attaveqaqatigiinnermut iliuuseq allanngortillugu, taamaasilluni nappaat pillugu annilaanganeq millisillugu.
Tamanna pitinnagu, aaliangiisuulluinnassaaq, naammattunik ikiorsiissuteqarnissaq massakkut aaqqittariaqarpoq. Killilersuutit suliffeqarfinni sulisitsisut kisiisa annertuumik eqqunngilaat. Aamma sulisut eqqorpaat, inuussutissarsiornermik namminersortuni atorfillit, akissarsiaqartinnagit angerlatiinnartariaqartartut napparsimanerat peqqutigalugu imaluunnit ajornerpaaffiani suliffitsit annaaratarsinnaavaat, suliffeqarfiut isertitai naammagunnaarmata atorfilittamik aningaasarsitinnissaannut.
Inuussutissarsiornermik ingerlataqartut allanngortiterinissaminnut piareersimallutik takutereerpaat aamma nappaalarnersuup atuunnera tamaat paasinnipput, kisianni naammagittarnerat naammatilluinnalerpoq. Soorunami iliuusissatut malittarisassat pisariallit atuutissapput, tassami peqqinnissaqarfik sanngeereersoq illersorniarlugu aamma innuttaasut taakku, immikkut ittumik nappaammit sakkortuumik eqqugaanissaminnut qaninnerusut. Kisianni maannakkut killilersuutit anguniarneqartoq sanioqquppaat aamma piviusunut naleqqutinngilluinnarpoq aamma suliffeqarfiutitta sinnattupilorisaat ukiup aappassaanni attuuttup, qeqqaniipput.
Politiikerertatta inuussutissarsiornermik ingerlatqartut ilaginnarpaat – tamatumalu qaavatigut peqqutissaqanngilluinnartumik.