Kalaallit Nunaata siunissaa qanoq ililluta qulakkiissavarput, atuilluartuunermik ineriartornermigut, sumiiffinni tunngaveqartoq sumiiffinnilu piginneqataasoq? Visit Greenland-imi pisortaagallartup, Anne Nivika Grødem-ip tamanna isummaminiitsittorujussuuaa – aamma tassunga annermik tunngavigaa, Future Greenland-imi ataatsimeeqataanerminut. Tassami Kalaallit Nunaata siunissaa pillugu allamik pitsaanerusumik eqqartuiffissaqarpaa?
Anne Nivika Grødem-ip Kalaallit Nunaata siunississaa pillugu takorluukkanik nutaanik pissarsiaqassalluni qilanaarivaa. Tassani nammineq saqqummiissaaq, suna eqqumaffigineqassanersoq, peqatigiilluta Kalaallit Nunaata siunissaata sammivissaa eqqartulerutsigu.
Siunissatta aalajangersarnissaanut aaliangeeqataarusukkutta, taava oqaloqatigiittariaqarpugut. Ajornanngitsutut immaqa nipeqaraluarpoq akikinaarinnippalaarlunilu. Kisianni suut taamaasa katikkaanni, inuiaqatigiinni ineriartorneq inunnit pilersinneqartarpoq. Uagut. Taamaattuminguna immitsinnut alapernaasissasugut, suna ataasiakkaarluta eqqarsaatiginerlutigu. Aamma paasinerullugu, tamatta ataatsimoorluta siunissarput qanoq isikkulik takorloorneripput.
Ataatsimiinnermi oqaluttarfimmut qaqiguma, oqariartuutigissavara ”Najugaralugu nuannarisara, tikeraassallugu nuannersuuvoq.” Tassami sinnattoraara, Kalaallit Nunaata siunissaani takornariaqarneq inuiaqatigiittut ineriartornitsinnut ilaajumaartoq nalituunillu pilersitseqataalluni. Takornariaqarneq inooqataanitsinnut ilaalluinnarpoq, maani inuunitsinni, tassami sumiiffinni inuuneq, tikeraartitta misiginissaat piumasaraat piffissallu ilaani peqataaffigerusullugu.
SUNNIUTTAASOQ
Nunarput nunarsuarmut nittarsaanniarlugu pilersaarusiorutta, taava eqqarsaatigilluassavarput, qanoq ittunik tikeraartoqarniarnerluta. Peqatigitillugulu isiginiartariaqarparput, Kalaallit Nunaat nittarsaakkutsigu ilisaritillugulu, immikkut illuinnartuusoq ornissallugulu pisanganartunik misigiffiusussaasoq, tikeraartussanik kajungerilersitsiniarnerinnaanngilaq, kisianni aamma sulisussanik piukkunnaatilinnik nutaanillu aningasaliissuteqartussanik pissarsiniarneruvoq.
Allatut oqaatigalugu, nittarsaassinerput sunniutaasussanik pilersitsissaaq, inuiaqatigiinnut tamanut iluaqutaasussanik. Taannarpiaq erseqqissaassuteqarpoq, inuiaqatigiittut oqallittariaqarnitsinnik, pineqartoq pillugu, siunissarput qanoruna ittoq pilersinniaripput kissaatigalugulu – taamaalilluni sammivik qanoq ittoq ineriartornitsinnut tunngavigissavarput.
TAKORNARIAQARNEQ ATUILLUARTUUNERMIK TUNNGAVEQARTOQ
Visit Greenland-imi misigisassarsiorlutik takornarissat nittarsaassinitsinnut atatillugu kajungilersinniarlugit sulissutigaarput. Tikeraat taamatut ittut ilaatigut ilisarnaatigaat piffissamik aningaasanillu ornitaminni atuisarmata, pinngortitaq klimallu allanngoriartornera soqutigisaraat, aamma soqutigivaat piviusut sumiiffinnilu najugallit. Ilisarnaatit, atuilluartuunermut tunngasut aamma tassunga ilaapput aningaasaqarneq-, inooqatigiinnermut tunngasut- avatangiisinullu tunngasut.
Misigisassarsiorlutik takornarissat amerlasuutigut tikeraartuupput, ornitaminni inooqataagallartutut misigissallutik kissaateqartut, aamma uagut pingaartitatta ilaannut avitseqataarusuttut. Taamatut ittunik nittarsaassinitsinnut atatillugu tikeraanik ”toqqaagutta”, peqatigitillugulu ornitassaanni tikilluaqqunissaannut piareersarluta – taava Kalaallit Nunaanni ineriartorneq atuilluartuunermik tunngavilik qulakkeerniarlugu suliniuteqarnerput naleqqussassavarput.
Inuttut siunissamik eqqartuinitsinni ingerlatsisora tassaavoq, uannut takorusukkama, qitornakka ernuttakkalu isaatigut isigisinnaanngorlugit, ukiut 25-it qaangiuppata kingumut qiviarutta, nuna suup tungaanut ingerlatissimanerlutigu. Najugaqarfigissallugu nuannersoq aamma tikeraassallugu nuannersoq. Taamaattumik Future Greenland 2022-imi peqataanissara qilanaaraara.