Sapaatip akunnera qaangiuttoq Naalakkersuisut misilitsinnissamut iliuusissaq nutaaq saqqummiuppaat. PCr-imut misilitsinnissap annertuumik periarfissaqannginnerup malitsigisaanik, Naalakkersuisunut nalunaarutigaat, qanoq ilillutik killilersuinerit aaqqissuutissanerlugit, taamaasilluni misissuinermi iliuusissaq naleqqussarumallugu.
Kisianni killilersuinerit annikillisaanerillu aqqutissaajunnaarput. Inuiaqatigiinnik A-nik B-nillu inissitsiterinermik pilersitsivoq, taakkulu inuttut, socialimut aningaasarsiornikkullu akeqarput. Ilisimaneqalereersut, napparsimanerit ingerlasarneranik aamma tuniluunnermut tunngasut tunngavigalugit, killilersuinerit annersaat atorunnaarsittariaqaraluarput aamma ulluinnarni inuunerput nalinnginaasumut uterittariaqarpoq.
Sulisitsisut isumaqarput, Corona-mut iliuusissaq pingaarnertut allanngortissallugu piffissanngortoq aamma tassunga tunngatillugu siunersuutigaat, tulliutuni ukuusut:
- 1. Kalaallit Nunaanni Coronapasseqarnissaq piumasarivaat. Akiuussutissamik pisimanngitsut Coronapassimik pisinnaanngillat tamanut atuuttumik PCR-imik misilitsinnissamik pisinnaanngimmat, teknikkikkut unammillernartut, boosterimik kapitinnissaq kinguarsarpaat, qallunaat kallaallillu malittarisassaasaq assigiinngissusaasa imatut inissippaatigut, passit amerlasuut qaangiuttoorsimatilerlugit, nappaammut akiuussutissaq aamma Kalaallit Nunaanni misilitsinnerit positiiviusut passimi nalunaarsorneqarneq ajorput aamma nalinginnaasumik scannerinerinertut atuuttut atorneqarneq ajorput.
- 2. Nunat allat suli Coronamut passeqarnissaq piumasarivaat, taakkulu nutaanik ilaartussapput aserfatsaaliorneqarlutillu, taamaasillutik nunap killingata avataanut angalanerni atorneqarsinnaanngorlugit.
- 3. ”Pinngitsaalisamik napparsimanermi uninngatitaaneq” sapinngisamik killilersimaarneqarli. Ullut qulit nalinginnaasumik napparsimanermi uninnganeq naapertuutinngilaq. Inuit sukkanerpaaffissaani suliartortarnissaat anguniassavaarput, soorlu aamma ukiup ilaani nappaatitut atorneqartartutut.
- 4. Kalaallit Nunaannut angalalluni tikinnermi nunallu iluani angalanermi PCR-imik misilitsissimanerit piumasaqaataasut atorunnaarsinneqarlik.
- 5. Katersuunnissamut killilersuinerit aamma Coronapasseqarnissamut piumasaqaatit atorunnaarsinneqarlik. Inuussutissarsiornermik ingerlataqartut apriilip 5-ianut utaqqisinnaanngillat.
- 6. 5-iniit 12-nut ukiullit akiuussutissamik kapitinnissaat annertunerusumik ukkanneqarlit taassumalu sulissutigineqarnera annertusarli.
- 7. Ikiorsiissutissatut killilersuutaasinnaasunut ilanngullugit nalunaarutigineqartarlik – suli maannakkut killilersuutigineqartut killinganiittut atuupput.
- 8. COVID19-ip nappaassuartut inissisimanera nalinnginnaasumik napparsimanertut inissittariaqarpoq, soorlu nunarsuarmi allanik taamatut inissisimatilerlugu aallartissimasut.
- 9. Corona pissutigalugu uninngasut toqukkullu qimagussimasut nalunaarsortarneri naleqqussarneqarlik, taamaasillunilu pisariaqanngitsumik annilaangassuteqarnerit peerlugit. Maannakkut nalunaarsueriaaq eqqunngitsumik assilissamik takutitsisarpoq, taamaasillunilu iliuuserisamik upperinnginninneq pilersinneqartarpoq.
- 10. Attaveqaqatigiinneq aamma attaveqaqatigiinnermut periuseq allanngortinneqarli. Nappaammut annilaanganeq millisinneqartariaqarpoq aamma iliuuserisat inuiaqatigiit eqimattat akornanni allanngortittariaqarput, akiuussuserneqanngitsunut aamma taamaaliornissamut kissaateqartunut.
Naalakkersuisut pissutsit taamaannerisa peerniarlugu akiorniarneranni siuttuusariaqarput, tassanimi innuttaasut piviusumik holdinut marlunnut inissisimatippaat, killilersuutit taakku piumasaqaatillu peernerisigut. Nappaarsuaq ukiuni marlunni inooqataaffigisimavarput. Maanna pisariaqalerpoq ingerlaqqinnissarput.