Arfininngorneq 30/10 Sulisitsisuni Kalaallit Nunaat tamakkerlugu suliffeqarfiit ilaasortaasut aallartitaat ataatsimeersuarnermi katersuupput. Ataatsimiinnerup kingorna politikkikkut oqallinnermut qaaqqusisoqarpoq, Naalakkersuisuniit illuatungiliuttuniillu peqataasoqarluni. Sulisitsisut ilaasortaaniit politikkeriniillu oqallinneq kusanartumik ataqqeqatigiinnermillu tunngaveqarluni ingerlavoq, politikkikkullu isumaqatigiissutigineqarpoq pisortaniit suliassaasoq sinaakkutit eqqortut, namminersorluni inuussutissarsiortut namminneerlutik ineriartuutigisinnaasaat aammalu aningaasatigut isaatitsissutaasinnaasut nutaat pisariaqartinneqartut aningaasarsiornerput ataavarnerusumik tunngavissikkumallugu. Sulisitsisuni siulittaasunngoqqittoq Henrik Leth 2019 aamma 2020-mut nalunaarutinittaaq saqqummiuppaa. Oqariartuutimini pingaarnerit uku ilaatippai: – Sulisitsisut Naalakkeruisunut oqaloqateqarnertik ingerlalluarpaat. Kisiannili inuiaqatigiit ataavartumik ineriartornissaminnut sinaakkusersorneqarnerini peqatigiiffiit siusinnerpaamik peqataatinneqartarnerat pisariaqarpoq. – Sulisitsisut oqalliseqatigiinneq tikilluaqquaa tassanilu aamma nammineq pingaartutut inissilluni, kisiannili nunarsuarmioqataanitsinnut innuttaasutsinnullu pingaartorujussuuvoq Kalaallit Nunaat nukittuutut demokratiilu nutaaliaasutut saqqummertarnissaa. – Sulisitsisut nunatta avataaniit aningaasaliisartunut sinaakkutit aalajaatsuunissaat sulissutigineri ingerlatiinnassavaat. Ujartugaraarput Naalakkersuisut oqaatsitik timitalernissaat, taamatuttaarlu aalajangigassallu allatut ajornartut Kalaallit Nunaanni suliarineqarsinnaasut tigusarnissaat nunatta avataaniit aningaasaliisartunut kajuminnarnerulersitsisinnaasut. – Sulisitsisut ineriartorpoq, tamannalu takussutissaavoq inuussutissarsiortut ataatsimoorsinnaanerinik – suliffeqarfiittaaq soqutigisaqaqatigiinneq tamanna naammassisanik takutitsisoq malugaat. Ataatsimiilluarsimanitsinnut takkuttunut tamanut qujassutigingaarparput!
- +299 32 15 00
- GA@GA.GL