Kalaallit Nunaata naatsorsuutigisamiit ajunnginnerusumik Coronamik ajornartoorneq atorpaa aamma nunanit assigiinngitsuniit naleqqiulluni ajornartoornermi aningaasarsiornikkut siuariartornermik pilersitsisimavoq. Taamatut Aningaasaqarnermut Siunnersuisoqatigiit nalunaarusiaminni inerniliipput. Kalaallit Nunaata aningaasarsiornera siuariartorpoq, suliassat amerlapput aamma tamanna inuussutissarsiornermik ingerlataqartunut ajunngilaq. Kisianni nangillugu inuussutissarsiortutut ingerlataqartut amerlasuut ajornartoornerup kingunerisaanik qaqeqqinnissaminnik pisariaqartitsipput. Takornariaqartitsinermik inuussutissarsiortut ilaatigut annertoorujussuarmik aningaasatigut annaasaqarsimapput killilersuinerit amerlasuut peqqutigalugit, nunarsuup ammariartorneqarnera ilutigalugu aamma angallanneq annertusiartortillugu, Kalaallit Nunaata avammut nittarsaanneqarnera nunat assigiinngitsut akornanni takornariarfissatut annertuumik nukittorsissallugu pisariaqarpoq.
Tamanna peqatigitillugu ingammik sanaartornermik suliaqartut annertuumik ilinniarsimasunik sulisussaaleqipput suliassat amerliartorneri toqqammavigalugit. Sukkasuumik avataaniit sulisussanik tikisitsinissamut aaqqissuussineq pitsaasup tungaanut alloriarneruvoq kisianni piffissaq ungasinnerusoq eqqarsaatigalugu nunatsinni soorlu ilinniartitaanermik suliniuteqarneq eqqarsaatigalugu annertunerusariaqarpoq. Tamannalu aamma Aningaasarsiornermik Siunnersuisoqatigiit erseqqissarpaat. Naak ukiuni amerlasuuni suliniuteqartoqaraluartoq suli inuusuttut amerlavallaat piginnaasaqalersitsisumik ilinniagaqarneq naammassineq ajorpaat aamma siunnersuisoqatigiit naatsorsuutigisaat mumikkaanni, ajornartorsiutaasup taassuma qaavatigut, 2050-imi innuttaasut amerlassusiat 48.000-iinnarnut appariarnissaa, ukiut arlalinnguit qaangiuppata annertoorujussuarmik ajornartorsiuteqalissaagut, tamannalu qaangerniarlugu aaqqiissuteqarnissaq massakkut pisariqarpoq.
Taassuma saniatigut Aningaasaqarnermut Siunnersuisoqatigiit erseqqissarpaat, Kalaallit Nunaata aningaasarsiornera suli annermik aalisarnermik tunngaveqartoq, tamatuma saniatigut (naalagaaffimmit tapiissutit) annermik isertitaqarfigaavut. Kalaallit Nunaanni Sulisitsisut siunnersuisoqatigiit innersuussutaannut isumaqataapput tassa qulakkeerneqassasoq sunniuteqarluartumik piujuaannartitsisumillu tunngaveqarluni aalisarnermik ingerlatsisoqassasoq aalisapilunnertaqanngitsumik aamma pisassiissutit ikinnerusunut agguaanneqassasut taamaasillunilu annertunerusumik inuiaqatigiit aningaasarsiornerannik annertunerusumik pilersitsilluni – aamma kinguuaariinnut aggersussanut. Peqataasut amerlavallaarput aamma amerlasuut, ullumikkut aalisarnermik inuussutissarsiortut inuttut aningaasaqarniarnerminni ilungersorput. Inuiaqatigiinnut ataasiakkaanullu taanna iluaqutaassaaq tamakku sulisussat inuussutissarsiutinut allanut nuunneqartuuppata. Aningaasarsiornitsinnut tunngatillugu siammasinnersumik isertitsivissanik tunngavissanik pilersitsiniarutta taava pisariaqarpoq allanik inuussutissarsiutigineqarsinnaasunik ineriartortitsinissaq. Ilaatigut Aningaasaqarnermut Siunnersuisoqatigiit tikkuarpaat aatsitassarsiornermik periarfissat kisianni tassani – suliassaqarfiit allat assigalugit – nunat assigiinngitsut akornanniit aningaasaliisussanik pisariaqartitsipput tamatumanilu pisariaqavippoq patajaatsumik politikkikkut toqqissisimasoqarnissaa inuussutissarsiortut sinaakkutissatut piumasaqaataat eqqarsaatigalugit ajunngitsumik suliassaqarfiup iluani ineriartortitsisoqassappat.
Naalakkersuisut Aningaasanut inatsisissamut 2022-mut siunnersuumminnut atatillugu nalunaaruteqarput Attanneqarsinnaasumik- aamma Aningaasaqarnerup pilersaarusiorneqarnissaanik nutaamik suliaqarniarlutik pineqartut taakkua unamminartut iluarsiissuteqarfiginiarlugit. Aaqqissuusseqqinnermi pineqartut ataasiakkaat qanoq imaqassanersut amerlanngillat kisianni qulequtarineqartut imaat nalunngilagut: Aningaasaqarnermi- akileraartarnermullu tunngasut atamasumik aaqqissuuteqinnissaat, ilinniartitaanikkut- suliffissaqartitsiniarnermullu iliuusissat inuiaqatigiit piariaqartitaat tunngavigalugit, inuussutissarsiutinik ineriartortsitsineq suliffissanillu pilersitsineq, ersarissoq nalitsinnullu piffissarlu ungasinnerusoq isigalugu inissaqartitsinermut politikki aamma qitiusumik allaffeqarfiup aaqqissuunneqarnissaa kiisalu pitsaanerusumik pisortat ingerlatsiviini sulianik suliarinnittarneq.
Aningaasarsiornermi Siunnersuisoqatigiit assigalugit, Sulisitsisut tapersersorpaat maannakkut sivisuumik utaqqineqarsimasoq tassalu aaqqissuusseqqinneq aamma qilanaaraarput suliami peqataatinneqarnissarput, taassuma ataani oqaloqatigiinnerit, qanoq ililluta ilinniartitaaneq pillugu suliniutinut inuussutissarsiornermillu ingerlataqartut pisariaqartitaat ataqatigiissaassallugit kiisalu qanoq ililluta namminersortutut inuussutissarsiornermik suliaqartut ineriartornissaannut aningaasarsiornissaannullu periarfissinneqassanersut, taamaasilluta annertunerusumik assigiinngitsunik atuilluartuusumillu aningaasaqarnerput pillugu ineriartornissatsinnut.
Uani Aningaasaqarnermut Siunnersuisoqatigiit nalunaarutaat atuaruk