Sapaatip akunnerata siuliani Aalisarneq pillugu ataatsimiitsitaliarsuup sivisuumik utaqqinneqareersup isumaliutissiissutini tamanut saqqummiuppaa. Aalisarneq inuussutissarsiutitta ilumut annerpaartaraat nunatsinnilu aningaasarsiornitta tunngavigilluinnarpaa. Taamaattumik pingaaruteqarpoq isumatuumik piujuaannartitsisumillu aqussagipput taamaasillunilu pisuussutitta pingaarnersaat siunissami kinguaarit atorluarniassammassuk. Ataatsimiititaliarsuup nalunaarusiaat annertuumik ernumanartumik atuagassartaqarpoq aamma saqqummiutaat ersaripput:
- Siunissami pisuussutit suliffissaqartitsiniarneq, aningaasarsiornermut atugarissaarnissarlu pillugit attatiinnarlik
- Aalisarnermik inuussutissarsiortut aalajangersimasunik siumullu nalunanngereersunik sinaakkuserlik suli inerisaanissamut aningaasaliissuteqarnissaq ingerlaannaqqullugu aamma siunertalimmut tapiissutit naleqqussarlugit aalisarneq pillugu politikki tunngaviliisuusoq malillugu.
- Aalisarnermik aqutsineq aaqqissuunneqarli taamaasillutik aalisartut ataasiakkaat aningaasarsiorluarniassammata pisuussummillu pissarsiat annertusisillugit tamannalu tunuliaqutaralugu pisuussutininik agguaaneq ajunngitsumik ingerlallugu pisuussummik akileraartitsineq naleqquttumik atorlugu.
- Aqutsinermi politikkikkut aqutsineq immikkoortinneqarli ersarissumik naligiissitsinermillu ingerlatsineq qulakkeerumallugu
- Pisuussutinik piginnittussaatitaaneq annertusisilli umiarsuuatilinnut naleqqiullugu kisiannili aalisarsinnaaneq annertusisinnagu
- Suliffissaqartitsiniarneq – ilinniartitaanermilu politikkikkut suliniutit iliuuserineqartut aalisarnermi politikkimi allannguutissat atorluaaneq tunngavigalugu innuttaasut qulakkeerunniarlugit ingerlanneqarli
Massakkorluinnartut isikkoqartillugu sinerissamut qanittumi qaleralinnik aalisarnerup biologit innersuussutaat 70 procentinik qaangeqqavaat aamma saarullinnik aalisarnermut tunngatillugu 300 procentinik annertussusilimmik. Aalisapiluppugut, allatut oqaatigalugu pisuussutigut annertoorujussuarmik atornerluppagut taamaasilluni meerartatsinnut ernuttatsinnullu aalisagaqassanersoq nalorninarsilluni. Ukiut arlalialunnguit qaangiuppata ajutooratarsinnaanerup tungaanut ingerlavugut. Taamaattumillu tamanna isiginngitsuusaarsinnaanngilarput.
Qalerallit ikiliartorput aamma annertunerusumik aalisartoqartariaqarpoq ukiut ikittuinnaat qaangiuttut pisarineqartartut anguniaannarlugit. Aalisarnermik ingerlataqartut amerlavallaarput piviusumik pisariaqartitsinermut naleqqiullugit – aamma piujuaannartitsinissaq eqqarsaatigalugu. Umiatsiaararsorluni aalisartup missiliorlugu qalerallit 33 tonsit imaluunniit sarulliit 67 tonsit ukiumut pisarisariaqarpai ilaquttami pilersornissai qulakkeerniarlugit kisianni nalilerneqarpoq aalisarnissamik akuersissutinik peqartut 80 procentiisa qaleralinnik aalisartut saarullinnillu aalisartut 65 procentii taakkua ataallugit aalisartartut.
Inuiaqatigiittut taamatut ingerlaneq ingerlaannartissallugu attassinnaanngilarput aningaasarsiornikkut periarfissat annertunerujussuit suliassaqarfinni allani piutillugit taakkunanimi sulisussaaleqisorujussuupput. Ullumikkut aalisarnikkut imminut pilersorsinnaanngitsut inuussutissarsiutinut allanut ilinniagaqalernissaannik periarfississavagut. Taamaasilluni ilaqutariippassuarnut pitsaanerusumik inuunissaannut periarfississavagut ataatsimullu isigalugu inuiaqatigiinnut iluaqutaasussamik.
Taamatut pisoqarnera attassinnaanngilarput Sulisitsisullu politiikerit kaammattussavaat ataatsimiititaliarsuup innersuussutai tusaaniaqullugut siunissamilu aalisarnerup iluani aqutsinermi ilaatequllugit – aalisarneq pillugu inatsisissami aalisarnermi pilersaarutissanut ilanngullugit. Ukiorpassuarni siunissatsinni aalisarneq pisuussutigisarput inuussutigissavarput soorlu kinguaassatta aamma iluaqutiginiassammassuk.