24/06/2025
Qaammatip suliffeqarfia: Kalaallit Forsikring
Qaammatip suliffeqarfia: Kalaallit Forsikring – toqqissisimanartut kalaallinik tunngavillit.Kalaallit Forsikring silli...
Sulisut isumassarsiallu paarlaasseqatigiinnerannut periarfissat nutaat pilersinniarlugit, nunat marluk — Kalaallit Nunaat Danmarkilu — akornanni suliffeqarfiit anginersaasa kattuffiinit isumaqatigiissut nutaaq atuutilerpoq. Sulisitsisut aamma Dansk Industri suleqatigiinnikkut piginnaasanik, ilisimasanik aammalu attaveqaqatigiinnermi periarfissanik paarlaasseqatigiinnermut annertusaaniarlutik suleqatigiillutik suliniuteqassapput.
Sulisut suliffeqarfiillu akornanni Kalaallit Nunaanni Danmarkimilu periarfissat nutaat pilersinneqarnissaat anguniagaavoq.
Felix Stark, DI-miit
Nunarsuarmi politikkikkut nalorninartorsiorfiusup annertusiartornera ilutigalugu Kalaallit Nunaata Danmarkillu suleqatigiinnerulernissaat suli pingaarneruleraluttuinnarpoq. Taamaattumik Sulisitsisut (GE) aamma Dansk Industri (DI) suleqatigiilernissamik atsiugaqarput.
Suliniaqatigiiffiit taakku marluk ukiorpassuarni suleqatigiilluarput, tamannalu kingullermik 2022-mi isumaqatigiissutigineqartumik aalajangersarneqarpoq. Isumaqatigiissut maanna annertusineqarpoq suliassaqarfiit pingaarnerusut soorlu piujuartitsineq, digitalinngortitsineq, isumannaallisaanermut upalungaarsimanermullu tunngasut kiisalu ilinniartitaanermut politikki uukkatarineqarlutik.
- Isumaqatigiissutip piginnaasanik, ilisimasanik attaveqaatinillu paarlaasseqatigiittarneq nukittorsarpaa. Kalaallit Nunaanni Danmarkimilu suliffeqarfinnut sulisunullu periarfissanik nutaanik pilersitsinissaq siunertarineqarpoq, Christian Keldsen, GE-mi pisortaq oqarpoq.
Lars Sandahl Sørensen, DI-mi pisortaanerup ilalerpaa:
- Suleqatigiinnitta nukittorsarneqarneratigut Kalaallit Nunaanni Danmarkimilu suliffeqarfinnut iluaqutaasumik sammisaqarnerulerlutalu iliuuseqarnerulissaagut. Danskit kalaallillu naalakkersuisui qanimut oqaloqatigisarpavut ineriartornerlu pitsaasoq tapersersorniarlugu suleqataajumalluta, aamma naatsorsuutigaarput politikerit sapiillutik aalajangiissasut sinaakkutissanillu pilersitsiumaartut, nunani tamalaani unammillernermi sakkortuumik unammillerfiusumi aniguisinnaaniassagatta, Lars Sandahl Sørensen oqarpoq.
Assip ataani nassuiaat: Isumaqatigiissutip annertusineqarnerata atsiorneranut atatillugu Sulisitsisut suliffeqarfinnut 320-nut, katillugit 8.400-nik sulisoqartunut, tassa Kalaallit Nunaanni sulisinnaasut 30 procentiinut, oqaaseqartartuunertik erseqqissarniarlugu tujuuluaqqanik tunissuteqarput.
