Sulisitsisut aggustip aallaqqaataaniit Steen Mørup inatsisilerinermut siunnersortitut atorfinitsippaa. Taanna Danmarkimi nunanilu tamalaani akileraartarnermut inatsisit pillugit ukiuni 40-ni misilittagaqarpoq, sulininilu naallugu siunnersuisartutut, sulianik ingerlatsisutut akileraartarnermullu tunngasunik ajornartorsiutinik ajornakusoortumik suliaqartarsimalluni.
Steen Danmarkimi Akileraartarnermut Aqutsisoqarfimmi akileraartarnermik kukkunersiuisutut ilinniagaqarsimavoq Københavns Universitetimilu 1992-mi cand.jur.-inngorsimalluni. Akileraartarnermut Aqutsisoqarfimmit soraarnermi kingorna Steen ilaatigut Veluximut KPMG-mullu attuumassuteqarpoq. Ukiuni kingullerni 25-ni kukkunersiuinermi siunnersuiniarnermilu suliffeqarfimmi BDO-mi akileraartarnermut siunnersortitut sulivoq, kingullermik Tax Legalimi pisortatut.
Steen kukkunersiuisutut sulinermini suliffeqarfiit atugaannik paasinninnissamut, inatsisit paasiuminaatsut pillugit siunnersuinermut aamma sullitami oqartussanut soqutigisaanik illersuinermut kiisalu suliassaqarfimmi allanngorartuaannartumi inatsisinik nutaanik malinninnissamut misilittagaqarluarpoq.
Steenip Kalaallit Nunaat takornartarisimanngilaa. 2024-mi ukiakkut qaammatini pingasuni affaanilu BDO-p Nuummi allaffiani sulisimavoq. Nunatsinniinnermini akileraartarnermut inatsisit aamma kalaallit inuiaqatigiit pillugit ilisimasaqarnerulerpoq. Tamatuma saniatigut uternissamik aamma nunatsinni inuussutissarsiortut soqutigisaannik isumaginninnissamut peqataarusussuseqarnerulerluni.
Sulisitsisuni Steenip ilaasortat siunnersortassavai oqartussanullu soqutigisaat illersortassallugit. Aammattaaq ilaasortat ajornartorsiutaannut unammilligassaannullu tunngatillugu ikiuisassaaq, sulianut ataatsimiititalianut attuumassuteqartussaalluni aamma sulisitsisut ilaasortaannut nutaarsiassanik suliaqartassalluni.
Suleqatigiinnissarput qilanaaraarput Steenilu Sulisitsisunut tikilluaqqullutigu.
