Sulisitsisut Future Greenland arfineq marlussaat ingerlappaat – Kalaallit Nunaanni inuussutissarsiorneq pillugu ataatsimiinnerit annersaat.
2022-imi ataatsimiinneq illu ulikkaavillugu 420-it sinnerlugit nunanit allaneersut 11-it peqataasoralugit aamma Nuummi Katuami ingerlanneqarpoq aamma taassuma saniatigut KNR-ip aallakkaatippaa taamaasillutik innuttaasut ataatsimiinnermi saqqummiunneqartut oqallinerillu malinnaaffiginissaanut periarfissinneqarput.
”Iluarusussimaartorujussuuvunga, ingerlanneqarluarsimaneranut aamma ataatsimiinnerup inerneranut. Inuit assigiinngitsorpassuit katersortissimavagut aamma oqallinnerit pitsaasut ingerlanneqarput, inersuarmi aamma saniatigut pisussatut ingerlanneqartunut. Aatsaat taamak nunanit assigiinngitsuniit ataatsimiinnermut peqataasut amerlatigipput, aamma isumaqarpunga, pisussat pitsaalluinnartumik aaqqissuussimagigut, nunaqavissunit saqqummiiffiusoq nunanillu assigiinngitsuneersunit qanittumeersunit ungasissuneersunillu saqqummiisoqarluni,” oqarpoq Christian Keldsen, Sulisitsisut pisortaat.
”Isumaqarpunga, ataatsimiinnermi assigiinngitsunik sammisaqartitsinerput saqqummiisitsisimanerpullu pillugu nersualaarneqartugut aamma sammineqartunut ilaapput ilinniartitaaneq, ingerlatseriaatsit assigiinngisitaartut, aatsitassarsiornermik sammisaqartut, nunanit assigiinngitsunit suleqateqarneq, takornariartitsineq allarpassuillu. Isumaqarpunga iluatsilluarsimasoq, aamma 2024-imut piareersarneq aallartereerpoq assigiinngitsorpassuarnik ilanngussiviusussaq aammalu isumassarsiassanik amerlasuunik tunisiffiusimasoq.”
Ataatsimiinnermi annertut inerniliineq tassaavoq, kalaallit tungaanniit akisussaaffimmik tigusisimagatta aamma oqariartuutigut paasinartut ersarissullu anguniakkagut pillugit, taava nunarsuarmi avatangiisitta tusarnaarpaatigut kiisalu naammmassisaqarluarluta. Kisianni aamma piumasaqaataavoq pingaarutilinnut amerlasuunut sammineqartunut suleqateqarluarnissaq, kiisalu pisariaqarpoq assigiinngitsunik qinikkanik suliassaqarfinnut ukkassissasugut assersuutigiinnarlugu atuilluartuunissamik pinngaartitsinissarput. Peqatigitillugulu maani angerlassimaffitsinni paasinnittariaaserput unammilligassaavoq, sooq nunat assigiinngitsut akornanniit aningaasaliiffigineqartariaqartugut, annertuumik ineriartortitsinissami ingerlatsissagutta assersuutigiinnarlugu aatsitassarsiornermik takornariartitsinermillu ingerlatanut, maannakkorpiaq sammisanut annertuunut ilaasut.
”Ataatsimiinnermi pissarsiagut amerlasuut maanna katersorpagut taassumalu kingorna isumassarsialatsiarpassuit taaneqartullu piareersarlugit ingerlatissavagut, ullut marluk ingerlaneranni takkussorsimasut. Suliareqqitassarpassuaqarpugut, minnerunngitsumik atuilluartuunissamik oqallisaasimasut aamma assigiinngisitaartut samminneqarsimasut, siunissami annertuumik sammineqartussat aammalu maannangaaq tapiissutissatut iliuuseqarfissagut,” taamak oqarpoq Christian Keldsen.
Sulisitsisut saqqummiisunut, ilisimasalittut oqalliseqataasunut, tapiissuteqartunut, iluatsittumik ingerlatsinitsinnut tapeeqataasunut annertuumik qujassuteqarpugut, neriuutigaarput 2024-imi aamma taamatulli angusaqarluarumaartugut, tulliani ataatsimiinnissami.
Nalunaarusiaq
Pisussat
Assit
Sponsor
