FN nunarsuaq tamakkerlugu anguniagai aammalu Parisimi isumaqatigiissut annertuumik oqallisissanik alloriartitsipput soorlu piujuaannartitsinissaq, silaannaap pissusaata allanngoriartornera, naligiinnginneq aammalu uumassutsit assigiinngiiaarnerinut tunngasut inuussutissarsiornermi periusissianut ilaalluinnaleqqapput. Oqallinnermi eqqortumik peqataanissaq inuussutissarsiortutut pingaartunngorsimavoq piunermut aammalu atuutsinneqarnermut tunngavileeqataalersimallutik.
Suliffeqarfittut mingutsitsinnginnissamut qanoq peqataaneq sukkasuumik naatsorsuutigineqaraluttuinnarpoq aammalu suliffeqarfittut nunap avataaniit aningaasaliisoqarnissamut periarfissaqarniaraanni imaluunniit piginnaasaqarnerpaat aallerfiginiaraanni aningaasatigut imminut napatilluarneq naammakkunnaartussaavoq. Kalaallit Nunaanni Sulisitsisut inuiaqatigiinni inissisimanerput naapertorlugu oqallinneq tamanna peqataaffiginiarparput taamatuttaarlu pisinnaasagut naapertorlugit qanoq tunniussaqarsinnaanerluta takutilluarniarlutigu.
Taamaattumik ukioq 2023 ingerlanerani aaqissuussaanerput aammalu suliniaqatigiiffitsinnut ilaasortaasut mingutsitsinnginnissamik periusissiassamut ersarissunillu anguniagaqarnissamut aaqqiissummut suliniuteqarnissatsinnut atorniarparput. Periusissiamik (piffissarlu ungasinnerusoq eqqarsaatigalugu nalunaarusiamik) takutissinnaasatsinnik peqarata soqutigisalittut minguitsuunissamik oqallinnermut tigussaasumik ilaasinnaanngilagut.
Suliffeqarfiit amerlanerit minguitsuunissamut oqallinnerup pingaassusaa nalunngilaat aammalu tunniussaqarnissartik ammaffigalugu. Kisiannili tamarmik qanorpiaq peqataaffigissanerlugu ilisimaqqissaanngilaat – imaluunniit silaannaap pissusaata allanngoriartorneranut kisimi tunngannginnera taamaattumillu oqallinnermut allatigut peqataanissamut periarfissatsialaqartoq paasisassaqarfigissallugu. Imnugitsitsinnginnissaq aamma inuiaqatigiittut akisussaaffeqarnermut aammalu ataavartumik aqutsinissamut tunngavoq, taamaattumillu ullumikkut pingasunik tunngavinnik peqassooq, ESG, aningaasatigut tunngassuteqartut: Environmental (E), Social (S) aamma Governance (G).
Sulisitsisut taamaattumik 2025-mut periusissiamini minguitsuunissaq / ESG peqatigiiffinni suliaqarnermi ilaasortanut iluaqutaasussamik immikkut isiginiarsimavai. 2023-mi periusissiaq killiffissiorneqassaaq, minguitsuunissamut tigussaasumik suliniutissatut pilersaaruteqartussamik. Anguniagaassaaq periusissiaq aammalu suliniutissatut pilersaarutit paasiuminartuunissaat, tunngaviit, anguniagassat aammalu suliniutit aaliangersimasut aallaaviussallutik, suliffeqarfiit angissutsit tamarmik piginnaasaat malillugit minguitsuunissamut suliarisinnaasaannut iluaqutaasussanik.
Suliffeqarfiit anginerit minguitsuunissamut suliniuteqarnerat annertuunngoreersimavoq. Taamaattumik periusissiaq sammisamut ataatsimoorussamik paaseqatigiiffigineqarnissaa aammalu ilaasortanut ajornanngitsumik peqataaffigineqarsinnaanissaa, ingammik SMV-saaffissanut (mikisut akunnattumillu angissutsillit suliffeqarfiit) pineqartillugit. Sulisitsisut tungaanniit minguitsuunissamut periusissiornissamut ineriartortitsinerminni tunngaviit ataani eqqaaneqartut aallaavigineqassapput.
- Minguitsuunissaq tamanut atuuttoq: Minguitsuunissamut suliniuteqarneq suliffeqarfiit ilaasortaasunut tamanut atuutissaaq – taamaattumillu suliffeqarfiit angissutsit tamanut atorsinnaassaaq aammalu atortussatigut suliffeqarfiit atorsinnaasanut tulluarluni.
- Minguitsuunissamut siunertaqarneq eqqarsaat isumatusaartuuvoq pingaartoq: Ingerlatsinermut ajornarsaarinissaq imaluunniit atuinermut annertusaanissaq siunertaanngilaq, taamaattorli minguitsumik aaqqiinerit siunertamut aaqqeeqataasinnaassalluni.
- Minguitsuuneq 360: Sulisitsisut uuttuutit assigiinngitsut attuumassuteqartullu aallaavigalugit minguitsuunissaq immikkut suliaqarfigissavaa. Uumassusillit, inuiaqatigiit, aningaasatigut aammalu silaannaap pissusaata/avatangiisit eqqarsaatigalugit minguitsuunissaq.
- Oqaaserineqartut timitalerneqassasut: Minguitsuunissamik suliaqarneq qanoq iliornerluta oqaluuseriinnarlugu pissanngilaq – anguniagaqarluni naleqqussarlunilu suliniuteqarneq aallunneqassaaq.
- Ammasumik ingerlatsineq: Sulisitsisut inuussutissarsiortut minguitsuunissamut oqallinnermut akuunera ammasumik attaveqaatitigut ingerlatissavaa. Iliuutsigut tanngassimaarutigalugillu saqqummiuttariaqarpagut ilutigisaanillu pissutsit pitsanngorsaavigisinnaasagut unneqqariffigisassallugit.