Arssarnerit Nuummiittoq ukiuni 50-inngulersunni Sulisitsisuni ilaasortaapput. Immikkoortortaqarfimmi pisortaq, Søren Pedersen, naapertorlugu akissarsianut aamma inatsisilerinermut tamanna tunngaannanngilaq – kisiannili nipi qarsarissoq inuussutissarsiuutillit atugarisaanik tunngassutilinnut oqallittoqartillugu oqariartuuteqartarnera aallaaviulluinnarpoq.
Allattoq: Rasmus Barud Thomsen
Ukioq manna juni-mi Arssarnerit ukiut 50-inngortorsiorluni nalliuttorsiulerpat aamma ukiut taamak amerlatigisungajaat Sulisitsisuni ilaasortaasimassapput.
Immikkoortortaqarfimmi pisortamut, Søren Pedersen-imut ukiuni 35-ini suliffeqarfimmiissimasumut, Sulisitsisunut ilaasortaaneq, queerannguami kaffimik qalarlaamik kaffisoqateqarnertulli pingaaruteqartigaaq.
”Ilaasortaajuaannarsimavugut, tamannalu suliffeqarfiutitta ingerlannerani pinngitsoorneqarsinnaanngitsutut inissisimavoq. Sulisitsisut, taakkuupput akissaatitigut atugassarititaasunik sinnerluta isumaqatiginninniartartuusut. Taakkuuppullumi aamma sulisutta pitsaasumik atugassaqartinneqarnissaanut qulakkeerinnittuusartut”, suliffeqarfik aprilip aallaqqaataanit VVS & El-firmamit Ilulissaniittumik tiguneqartussaq pillugu oqarpoq, - taamaakkaluartoq suliffeqarfiup taaguutini tigummiinnassavaa.
Ullumikkut Arssarnerit 100-ut missaani sulisoqarpoq, 65-illu missarpiaaniittut immikkoortortaqarfimmi Søren Pedersenip pisortaaffigisaani sulillutik.
Inatsisileritooqarnikkut ikiorneqarneq
Inatsisilerinermi apeqqutini, soorlu sulisoqarnermi inatsisini aammalu isumaqatiginninniussutaasartuni, suliffeqafiup Sulisitsisut atorluartarpaa.
”Inatsisilerinermi imaluunniit akissaatitigut atugassarititaasunullu isumaqatigiissusiaasartunut tamakkiisumik pikkoriffeqannginngilagut, taamaattumik tamakkununnga tunngasunik apeqqusernartoqaleraangat Sulisitsisut atortarpagut. Soorlu assigaa, sulisoq kinaluunniit illersorneqarfissaminut kattuffiusumut saaffiginnittaraangat, uagut taamak isilluta Sulisitsisut atortarparput”, Søren Pedersen oqarpoq.
Tamanna periarfissaq pingaaruteqarluinnarpoq, tassami inatsisit maleruagassat isumaqatigiissutaasartullu allat taakkuummata ulluinnarni ingerlatsinitsinni pingaaruteqarluinnartut.
Pikkorissarnerit maleruagassallu ataatsimoorussaasut
Sulisitsisut aamma pisinnaanngorsarnermut peqataasarput, Søren Pedersen oqarpoq. Sulisitsisut peqatigalugit Arssarnerit sulisui, soorlu; AP95-imi, Kalaallit Nunaanni sanaartornerup iluani sulisarnermut aammalu sullissisarnermut piumasaqaataasunut pikkorissartitsisarpoq.
Tassani sulisut inatsisitigut sinaakkutaasut ilisimaarilertarpaat, taakkumi sulisarnermi sullissisarnermilu tunaartarineqarluinnartussaammata.
”Sulisitsisut tassaapput suleqatigilluakkat, arlaannik ikiugassaagutta imaluunniit aaliangersimasumik ilinniassagutta aaqqissuussikkajuttarput” Søren Pedersen oqarpoq.
Taamaasilluni aamma oqaatigaa, Sulisitsisut inatsisit piumasaqaatillu allassimasut Kalaallit Nunaanni pissutsinut tulluussarnerini aammalu paasinarsarnerini pingaaruteqartorujussuusoq.
”Piumasaqaatit tassaakkajuttarput, Kalaallit Nunaanni pissutsinut piviusumullu tulluuttuaannanngitsut. Taamaasilluni Sulisitsisut danskit piumasaqaataat Kalaallit Nunaanni pissutsinut tulluarsarlugit ingerlataqartarpoq.”
Ataatsimoorussamik oqariartuuteqarneq
Søren Pedersenip Sulisitsisut siunnersuisarnerisa saniatigut tamat oqartussaaqataaneranni oqallinnermi pingaarutilittut inissimasarnera aamma naqissuserpaa.
Sulisitsisummi suliffeqarfiit ataatsimuulersittarpai, taamaasillunilu inuussutissarsiuteqartuni unammillernarsinnaasut oqallinnermi ukkataralugit oqariartuuteqarsinnaasarluni.
”Sulisitsisut malinnaalluinnartuupput, taamaasilluni pingaaruteqarluinnarpoq inuussutissarsiuteqartuusuni unammillernarsinnaasut ukkatarineqarnerini tusaaneqarnissaq, taamaasilluni oqallittarnerni illuatungisiorluni inissisimasoqassanngilaq” oqarpoq.
Ilaatigut tikkuarpaa, sanaartornermi pitsaanerusumik pilersaarusiortarsinnaanissaq aammalu illoqarfimmiit illoqarfimmut atugassarititaasartut allaanerusinnaasarneri.
Inuaqatigiit ataqatigiissaarneqarnerat
Søren Pedersenip oqariartuutigaa, inuussutissarsiuteqarnermi unammillernarsinnaasut, inuiaqatigiit ineriartortinneqarneranut annertuumik attuumassuteqartarmata.
Soorlu sulisussarsiornerni aammalu ataavartussamik sulisoqarniarnermi.
”Takusinnaasarparput ilaqutareeqartoq Danmarkimut nuuttartunik, tamanna pikkajuttarpoq, meerarisat meeqqat atorfianni aallartittussanngoraangata. Tamanna sulisut ataavartussamik sulisorinissaanut kalluaasinnaasarpoq”, oqarpoq.
Naqissuserpaa, Sulisitsisut aamma aaqqiissutaasussanik oqallinnermi siunnersuuteqaqataalluni oqalliseqataasarmat – aamma meeqqat atuarfiinut tunngatillugu.
”Tamanna ajunngilluinnarpoq – tassami inuussutissarsiuuteqartuni unammillernatut inuiaqatigiinni umamminnernartullu imminnut ataqatigiilluinnarmata – tamannalu Sulisitsisunit paasilluarneqartarpoq.”
