Ullorsiutini nalunaarsuigit: Isumasioqatigiinnissaq “The Green Future of Maritime Operations” peqataasussanit nalunaarfigineqarnissamut ammarpoq

Isumasioqatigiinnissaq ”The Green Future of Maritime Operations” 5.–6. Oktobari 2022-mi Nuummi ingerlanneqalerpat siunissami mingutsitsinngitsumik umiarsuit angalasalernissaat oqaluuserineqassaaq. Maanna isumasioqatigiinnissaq, nunatsinni nunanilu tamalaani sullissisut mingutsitsinngitsumik umiarsuit angalanissaannut soqutiginnittunut katersuuffiusussamut peqataaniarluni nalunaartoqarsinnaalerpoq

Nunatsinni CO₂-mik aniatitsisut annersaasa mingutsitsinngitsunut nuukkiartornissaannut siuarsaanissaq Naalakkersuisunit kissaatigineqarpoq; tassanilu pineqarput imarsiorlutik inuussutissarsiortut. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik suleqataasullu arlallit, taakkununngalu Royal Arctic Line, Kommuneqarfik Sermersooq aamma Nunani Avannarlerni Nukissiornermut Ilisimatusarfik ilanngullugit, nunatsinni nunanilu tamalaani sullissisut mingutsitsinngitsumik umiarsuarnik ingerlatsineq pillugu katersuutsinniarpaat.

• – Imarsiornermik inuussutissarsiuteqartut mingutsitsinngitsunut nussornissaannut Kalaallit Nunaat ingerlatsisutut pingaarutilittut inississinnaavoq. Erngup nukinganut isumalluutinik angisuunik peqarpugut, inuiaqatigiinnit pigineqartunik umiarsualiveqarpugut aammalu imaatigut angallavinnik aalajangersimasunik, mingutsitsinngitsunik nutaanik misileraaffigisinnaasatsinnik peqarluta, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund ataatsimeersuarnissaq sioqqullugu oqarpoq.

– Sullissisut najugaqartut nunanillu tamalaaneersut aisumasioqatigiinnissamut peqataanissaat Naalakkersuisunut pingaaruteqarpoq. Isumasioqatigiinnissamut soqutiginninneq annertoreerpoq, tamannalu nunatsinni nunarsuarmilu allannguiniarnermut piareersimasoqarneranik takutitsivoq. Oqaluuserisassagut ilisimasallu nutaat isumasioqatigiinnermi pissarsiarisinnaasagut qilanaaraagut, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund naggasiivoq.

Isumasioqatigiinnissamit nalunaarnissaq

Site-mi uani Isumasioqatigiinnissamut pilersaarut takuneqarsinnaavoq aammalu isumasioqatigiinnissamut akeqanngitsumik peqataanissamut nalunaartoqarsinnaalluni: Tilmelding til The Green Future of Maritime Operations

Isumasioqatigiinneq kalaallisut tuluttullu akornanni toqqaannartumik oqalutseqartoqassaaq.

Attaveqarfissaq

Annertunerusumik paasisaqarusunnermi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup Pinngortitamut Imminullu Pilersornermut Immikkoortortaqarfiani pisortaq Mettelise Fritz Hansen tlf.: 345257/252878-imut imaluunniit e-mail: mtha@nanoq.gl imaluunniit pan@nanoq.gl aqqutigalugit attaveqarfigineqassaaq.