Oqaluttuarisaanermi aatsaat taamak amerlatigigunartunik Kalaallit Nunaannit Torontomi, Canadami nunat tamalaat akornanni aatsitassat pillugit saqqummersitsinersuarmi PDAC 2022-mi ulluni makkunani peqataasoqarpoq.
Saqqummersitsinersuarmi Sulisitsisut – Grønlands Erhverv aamma Aatsitassanut Naalakkersuisoqarfik peqatigiillutik Kalaallit Nunaat pillugu ulloqartitsinermut Greenland Day-imi qaaqqusisuupput, tassani suliffeqarfiit, oqartussat nunarsuarlu tamakkerlugu soqutigisaqaqatigiit periarfissinneqarput Kalaallit Nunaanni suliffissanut periarfissavut pillugit tusarnaariarnissamut, saqqummiisuusarput Nunatsinni suliffeqarfiutillit nunat tamalaat akornanni suliaqartunut kiffartuussisartut, aammattaaq suliffeqarfiit Kalaallit Nunaanni aatsitassanik ujaasinermut qalluinermullu misilittagallit.
Aatsitassat pillugit Naalakkersuisoq Aqqaluaq B. Egede ulloqartitsinermi ammaasuuvoq, ilaatigullu ima oqaaseqarpoq:
“Aatsitassarsiornermut suliniutit nunaqavissunut suliffissanik pilersitsisarput – aatsitassarsiortut aamma pisataannik pilersuisartut iluanni. Aatsitassarsiornerup qalluisarnerullu iluani pitsaaqutissat suunersut nu-naqavissunut pitsaanerusumik qaammarsaassutigisariaqarparput. Taamatuttaaq aatsitassarsiortut nuna-qavissunik sulisoqarnissaq ajornannginnerulersittariaqarpaat iluaqutissat annertusarneqassappata. Aatsi-tassarsiortut piumasaqaataat malillugit sulisut ilinniagaqartut akornanni ilinniarsimasunik sulisoqarnissaq ilaatigut qulakkeertariaqarparput.”
Christian Keldsen, Sulisitsisut – Grønlands Erhvervip pisortaa isumaqataavoq:
“Aatsitassarsiortut Kalaallit Nunaanni aningaasarsiornikkut siuariartortissinnaalluarpaat. Taamaammat Nunatsinnut pingaaruteqarpoq sapinngisamik tamatigut ataavartumillu suliniutit pillugit nunanit tamalaanit aningaasaliisartut pitsaanerpaamik periarfissinneqarnissaat. Tamannalu qulakkeersinnaavarput sanaartukkatigut, aningaasaqarnikkut politikikkullu aalaakkaasumik sinaakkutissanik pilersitsinikkut – taamaattoq aamma angusassat pillugit toraagaqarluta aatsitassarsiortut ilinniarsimasut pisariaqartitaat ilinniartinneqarnissaat isumannaartariaqarparput. Nunaqavissunik sulisoqarnissaq pingaartittorujussuuaat, nunaqavissullu akornanni toqqammaveqarnissaq taakkununnga isumalerujussuulluni. Tamanna selskabinut, uagut nammineq najugaqarfinni suliffeqarfiutitsinnut inuiaqatigiittullu tamatsinnut atuuppoq.”
Nunatta Ullua – Greenland Day ussagarfioqaaq, Kalaallillu Nunatsinni ilimanaateqarluartut pillugit soqutiginnittoqartorujussuuvoq. Sulitsitsisut – Grønlands Erhverv aamma Naalakkersuisut suliffeqarfippassuillu Kalaallit nunaanniittut saqqummersitsinersuarmi PDAC-mi juunip 13-iannit 15-iata tungaanut ingerlanneqartumi peqataapput.
Assit
Greenland Day-imit video uani takuuk
