”Allat qanoq-iliortarneri” paasisaqarfigalugit soqutiginartuaannarpoq. Taamaattumik qaammatit tamaasa Sulisitsisunit suliffeqarfik illoqarfigisamini immikkuullarissumik iliuuseqarsimasoq aammalu piujuaannartitsineq, naligiinneq, assigiinngissuseq, ilinniarneq, aallarnisaaneq pillugu arlaatigulluunniit allatigut angusaqarsimasut saqqummiunneqartalissapput.
Isumassarsiaqarsimaguit, suliffeqarfik siunissami sorleq qaamatip suliffeqarfiatut taaneqarsinnaasumik, taava uagutsinnut allanniarina.
Qaammami uani Malik Vahl Rasmussen, ExploGreenlandimeersoq oqaloqatigaarput.
ExploGreenland suliffeqarfiuvoq kisimiilluni ingerlataq, tassani sanaartornermut aatsitassarsiornermullu siunnersortitut sullissisinnaasoq, ersarinnerusumik oqaatigissagaanni piginnittup, Maliup, illoqarfimmi ingeniørinut allanut sanilliullugu ilisimasaqarfii tassaanerupput qillerinermut qaartiterinermullu aammalu aatsitassarsiornermut tunngatillugu misissuinissamut attuumassusillit.
Maliup oqaluttuassartaa
Malik mikigallaramili suliassaqarfik maanna attuumassuteqarfigisani soqutigisarisimavaa.
“Ataatarput kujataani inuussutissarsiortunut aatsitassarsiortunullu Attuumassuteqarnikuuvoq. Aasaanerani atuanngiffeqarnerup nalaani Nalunami kultisiorfimmi peroriartorpugut, tassanilu ataatarput ulloq naallugu malittarisarsimavarput igasorlu igaassaqarniassammat kuummi igaassanik pisaqarniartarsimalluta.
Maskiinaqqaarpiarpunga Nalunami, taamani 8-9-nik ukioqarpunga, ataatannut sarliartillunga. 13-inillu ukioqalerama ataatamma sannaviani sanertutut allanillu suliaqarlunga aallartillunga. Taamani suliffeqarfik GMS-imik (Greenland Mining Services) taaguuteqarpoq, tassanilu maskiinat, mekanikkimut attuumasut aatsitassarsiornermilu misissuinerit pillugit soqutigisaqalerpunga.”
Malik helikopterertartunngorusuttuaannarnikuugaluarpoq, qalipaatinilli immikkoortitsisinnaannginnini peqqutigalugu tamanna angusinnaasimanngilaa, tamannalu peqqutaalluni sanaartornerup iluani ilinniarfissanullu soqutigisaqalerpoq.
Ingeniøritut ilinniassaguni ilinniarnertuunngorniaqqaartariaqarnini paasigamiuk ingerlappaa, taassumalu kingorna DTU-mi Arktisk Teknologimut ingerlaqqippoq (Arktisk Ingeniøritut ilisimaneqarneruvoq), taannalu soqutigisaanut tulluarnerpaasimavoq.
Maliup Sisimiuni Arktisk ingeniøritut ilinniarnini Sisimiuni 2016-imi aallartippaa, semesterit pingasut siulliit Sisimiuni ingerlanneqarput, semesterillu tullii marluk Københavnimi DTU-mi ingerlanneqarlutik.
Tamatuma kingorna nunanut allanut ilinniariarpoq, NTNU-imilu Norgemi Thondheimimiittumi semesteri ataaseq ingerlassimallugu, tassanilu ujaqqat erngullu nukinganik nukissiorneq sammisimalluni. Tamassuma kingorna Nuummi Kalaallit Airportsimi suliffimmik misiliivoq, tassanilu Nuummi mittarfiup allilerneqarnissaanut tunngasunik suleqataalluni. Ilinniarnermi naammassilernerani immikkut ilisimasaqarfissatut pikkorissarnermini Munck-Gruppenimi pikkorissarsimavoq, qaartiterisarnerullu pitsanngorsarneqarsinnaanera pillugu allaaserinnilluni.
Munckimiinnermi nalaami Malik qaartitsisut aqutsisuattut, AP95-imi kiisalu dronersinnaanermut pikkorissarsimavoq. Munckimi qillerisut qaartiterisullu akornanni aqutsisutut qaartitsinerup qillerinerullu iluani suliassanut tamanut akisussaasuusimavoq. Piffissami tassani 3 mi. Kubikmeterit missaat qaartinneqarsimapput.
Tamatuma kingorna ataatani peqatigalugu 60° North Greenlandimi pisortaanerusimavoq/COO. Tassani aqutsisoq peqatigalugu ulluinnarni sanaartornerup iluani ingerlatsineq periarfissanillu inerisaaneq suliassaqarfigisimavai.
“Taamani ilaatigut qillerussuarmik pisivunga/vugut, GreenRocimullu Kujataani Amitsumiittunut qilleringaatsiarluta, taannalu aqqutigalugu suliffeqarfiup ineriartornissaa aqqutissarsisimallugu,” Malik nassuiaavoq.
Nutaaq pissanganartorlu
Maanna Malik nutaamik suliffeqarfimmik ExploGreenlandimik pilersitseqqammerpoq, taannalu 2020-mi novembarimi pilersippaa. Maliup suliassaqarfimmi attaveqaatini aqqutigalugit paasisimavaa, sumiiffimmi qillerinermut, qaartiterinermut aatsitassanillu misissuinermut tunngatillugu siunnersortimik amigaateqartoqartartoq. Taamaattumik tamanna eqqarsaatigisimaqaa, maannalu Kalaallit Nunaanni inuussutissarsiorfiit ineriartortinnissaat avammullu tunisassiornissamut periarfissanik pilersitseqataaniarluni suliffeqarfimmik pilersitsisimalluni.
“Suna tamarmi nutaajuvoq, inuusoqaagullu, suliassaqarfiup iluani inissisimaffissara suli ujartorujoorpara,” Malik paasissutissiivoq.
Suliffeqarfiit arlallit ExploGreenland tusareersimalerpaat. Suliffeqarfiit nunatsinneersuinnaanngitsut, kisianni aamma suliffeqarfiit nunat tamalaat akornanniittut Kalaallit Nunaannilu arlaatigut suliaqarusuttut aamma suliffeqarfik pillugu tusagaqareerput.
Canadami Torontomi PDAC
Maliup anguniagarisimavaa ukioq manna PDAC Torontomi, Canadamiittumi ingerlanneqalerpat peqataanissani, taannalu tassaavoq nunarsuarmi aatsitassarsiornerup iluani misissuisartut ineriartortitsisartullu naapiffiat. Maliup peqataanerminut anguniagarisimavaa ilisimasani pillugit takutitsinissaq kiisalu suliassaqarfiup iluani suliaqartunut kiinarsitsitsinissani minnerunngitsumillu attaveqaatimi pitsanngorsarnissai.
Peqataanissani iluatsissimavaa, Kalaallit Nunaannullu uterami suliassaqarfiup iluani inissisimaffini ajorinngitsorujussuuaa;
“Kalaallit Nunaanni soqutiginninnerup annertusiartornera malugaarput, tamannalu aamma suliassaqarfiup iluani siunissami suliassaqarnerulernissamik neriuuteqalersitsivoq.”
ExploGreenlandip siunissamut takorluugaa
ExploGreenlandip siunissamut ungasinnerusumut takorluugaasa ilagaat minnerpaamik 100 %-imik kalaallinit pigineqartumik aatsitassarsiorfimmik pilersitsisoqarnissaa, taannalu aqqutigalugu nunarsuarmi minguinnerusumik ingerlatsisoqarnissaa suleqataaffigineqarsinnaavoq, kiisalu imeq nukissarlu power-to-x atorlugu avammut tunisassiarineqarsinnaalernissaa. Ataatsimut isigalugu suliffeqarfiup Kalaallit Nunaannit avammut tunisassiortoqarnerunissaq suleqataaffigerusuppaa, tunisassiassallu aalisarnermut takornariaqarnermullu attuumassuteqassanngillat, suliarineqartussalli Kalaallit Nunaanni najugallit inuussutissarsiornerannut iluaqutaassaaq nunarsuullu sinneranut allanngueqataassalluni.
Piffissaq qaninnerusoq eqqarsaatigalugu periuseq one-door atorlugu suliniutini ineriartortitsinissaq suliniuteqarsinnaanissarluunniit pillugu siunnersuisinnaanini kissaatigaa aammalu/immaqaluunniit suliffeqarfinnut avataaneersunut aatsitassarsiorneq pillugu misissuinissamut kiffartuussisinnaanissaq aammalu pisariaqartinneqartunik allanik sullissisinnaanissaq kissaatigalugu.