Qaammatip suliffeqarfia

Septembari 2023
Qaammatip suliffeqarfia / KJ GREENLAND  

Qatanngutigiit marluk Karl aamma Jens Jensen entreprenørimik suliffeqarfik KJ Greenland A/S Kangaatsiami 1992-imi pilersippaat. Taamani pilersaarutaavoq ilaqutariinnut ataatsinut illut ukiumut sisamat sananeqartassasut, angusaqarusussuserli ingerlaqqippoq kaaviiaartitallu amerliartupallallutik, tamannalu pissutigalugu sullivitsik siulleq sananissaanut periarfissaqalerlutik.

Ukiut tulliisa ingerlaneranni niuerneq ineriartortuarpoq, illoqarfinnilu nunaqarfinnilumi amerliartuinnartuni ammaallutik. Oqaluttuaq nunami periarfissarpassuarnik tunniussassaqarneranik takutitsilluartoq.

Allat qanoq iliornersut tusassallugu isumassarsinartuaannarpoq. Sulisitsisut taamaammat qaammatit tamaasa suliffeqarfimmik najukkami avatangiisinik, piujuartitsinermik, naligiissitaanermik, assigiinngisitaarnermik, ilinniartitaanermik, aallarnisaanermik imaluunniit immikkut ittumik angusaqarsimasumik oqaluttuartarput.

Qatanngutigiit marluk Kangaatsiami suliffeqarfimmik aallartitsinerannit ukiut sisamat qaangiummata Aasianni entreprenørimik suliffeqarfik pisiaraat ukiorlu taanna Qasigiannguanut aamma siammarlutik. 1998-imi Ilulissani annertunerusumik suliakkinneqarput, tamannalu tassaniilersippaat kingornalu Uummannamut, Upernavimmut Qaanaamullu anngullutik.

Suliffeqarfik ullumikkut 300 missaannik sulisoqarpoq, kujataani Attumiit avannaani Qaanaamut sanaartornermik immikkullu sulianik suliaqarluni.

Qanorluunniit angitigileraluaruni niuernermi anguniakkat attanneqarnissaat qatanngutigiinnut pingaarnerpaavoq. Kangaatsiami, Aasianni Ilulissanilu immikkoortortaqarfiit najukkani inuit qitiusut tunngavigalugit sanarfineqarput, ulloq manna tikillugu suli sulisuusunik, kingornalu ilaqutariinni meeqqanik ernuttanillu sulisoqalersimallutik.

KJ Greenland najukkani inuiaqatigiinni takutitsilluarnissap pingaaruteqarneranik takutitsivoq, suliffigiumaneqarnissamik toqqissisimaffissaanissamillu pingaartitsisuulluni.

Najukkani sulisut ukioq naallugu suliassaqarnissaat qulakkeerniarlugu suliniartuupput. Ilutigitillugu illoqarfinni immikkoortortaqarfigisaminni timersornermut kulturimullu tamanut tapersersuisuulluni.

Sulisut pitsaanerpaamik atugassaqartinneqarnissaannik ukkataqarneq sulisut tatiginninnerannik suliffeqarfimmiiginnarusussuseqalersimanerannik takussutissaqarpoq. Aqutsisummi amerlasuut naqqanit aallartissimapput. Sulisummi akisussaaffimmik tunineqartarput, kajumilersitseqataasunik iluatsilluartumillu takutitsisunik.

Aasianni immikkoortortami aqutsisoq Erne L. Olsen assersuutigilluarneqarsinnaavoq, taanna 17-inik ukioqarluni suliffeqarfimmi nukappiaraatitut aallartippoq. Kingorna immikkoortortami aqutsisunngorpoq, angutaa Aasianni allaffimmi aqutsisuulluni Ernellu ernera 15-inik ukiulik saniisartuulluni. Ilutigitillugu ningaavi marluk suliffeqarfimmi aamma atorfinitsinneqarsimapput.

KJ Greenlandimi neriuutigineqarpoq oqaluttuat assingusut ukiorpassuarni uteqattaarneqarumaartut.

Soorunami neriuutigaat assassorluni ilinniarfiit inuusuttunut siunissami pissanganarnerullutillu soqutiginarnerulersinneqarnissaat sulissutigineqarumaartoq, ilinniartunik pikkorissunik siunissami sulisussarsiuaannarsinnaajumallutik. Oqaluttuarpummi inuusuttunik sulisussarsiniarneq ukiuni makkunani ilungersunartoq.

KJ Greenland siunissamut takorluugaat pillugu aperigatsigu ataaseq qularnanngilluinnarpoq:

”Annerpaajunissarput pinnagu pitsaanerpaajunissarput anguniagaraarput” issuaaneq, Jens Jensen.

Piginnittut ullumikkut tassaapput Karl aamma Jens Jensen, Palle Bendtsen, nutaallu ilannguteqqammersut Mads Nørgaard aamma Bjarke F. Cortsen, suliffeqarfimmi kinguaariit nikinnissaannut eqqarsaataasut.

KJ Greenlandip sananeqaataa tupinnartoq isumassarsinartorlu, inuusuttunit aallartisaasunit Kalaallit Nunaanni suliffeqarfimmik ingerlatserusussinnaasunit isumassarsiffigineqarnissaa neriuutigisarput.

Qaammatip suliffeqarfia KJ Greenland A/S pilluaqquarput. Suliffeqarfiup siunissami ineriartornissaata malinnaaffiginissaa qilanaaraarput.