Oqallisigineqarsinnaavoq qaqugukkut pisoq oqaluttuarisaanermut ilanngunneqassanersoq, piviusorli unaavoq Naalakkersuisunut siulittaasunngortup Jens-Frederik Nielsennip aamma ministeriunerup Mette Frederiksenip sivikitsumik Nuummiinnerani Sulisitsisut suliffeqarfiillu ilaat pulaarnissaat pingaarnerpaatimmassuk. Oqaluttuarisaanermut ilanngunneqarpoq qallunaat ministeriunerat siullerpaamik Sulisitsisunut pulaarmat. Taamaattumik siulersuisuni siulittaasoq Krissie Winberg aamma pisortaq Christian Keldsen maniguullutik pissangaqalutillu Inuussutissarsiortut Kalaallit Nunaata siunissaannut isiginnittaasiat pillugu oqaloqatigiinnissamut qaaqqusipput.
Siunissamullu naatsorsuutigisagut Inatsisartunut qinersinermit qanittukkut pisumit sunnerneqarluinnarput. Peqatigiiffiup ilaasortaasa siornatigut isertuutinngilaat ukiuni kingullerni sisamani inatsisit inuussutissarsiornermut akerliusut takusatik pakatsissutigisimallugit. Naalakkersuisut siulersuisunngortussaannut isumalluartoqangaarpoq, tamannalu tunngavigalugu saqqummiussavut isumalluarnartuusinnaapput.
Takornariartitsineq suli siuariartorpoq neriuutigineqarlunilu aatsitassarsiorneq nutaamik isummerfigineqarsinnaasoq, pingaartumik Kalaallit Nunaanni aningaasaliinissamut periarfissat nukittorsarneqarnissaannut tunngatillugu. Aalisarneq suli avammut tunisatta isertitattalu pingaarnersaraat, taamaattumillu inatsisit killilersuisut piaartumik naleqqussarneqartariaqarput. Siunissami Illersornissaqarfimmut pilersuinerit amerlanerit Kalaallit Nunaanni inuussutissarsiornermut iluaqutaanissaat upperaarput, tamannalu aamma pisortat attaveqaatinut pingaarutilinnut (fiberkabelinut, erngup nukinganik nukissiornermut il.il.) aningaasaliinerannut saniatigut nutaanik periarfissaqalersitsisinnaavoq.
rseqqissarparput inuussutissarsiorneq nukittooq inuiaqatigiinni pitsaasumik ingerlanissamut tunngaviusoq. Tamanna Danmarkimi talerperlernit saamerlernillu paasineqarpoq, uagulli politikkikkut aqutsisunit taamaani politikkikkut siuttunit taamatut paasineqarnissaq angujuminaatsittarparput. Naalagaaffeqatigiinneq nukittooq inuiaqatigiinnut inuussutissarsiortunullu pingaaruteqarpoq, taamaalillutalu inuiaqatigiit ineriartornissaannut akisussaaffeqarluta, ilaatigut inuiaqatigiinni inuit arlaannik pissuteqarlutik imminnut isumaginnissinnaanngitsunik ilaqaratta.
Naalakkersuisullu siulittaasuat ministeriunerullu tikeraartup peqatigalugit inuussutissarsiornermi pisartut pissanganartut nuannaarutigisinnaavavut. Suliffiit nalinginnaanerusut ingerlatiinnarpavut inuussutissarsiornermilu suliffeqarfinni nutaanerusuni suliat, suiaassuseq inuiaassuserlu assigiinngiiaarnerutillugit. Sammisat nutaat sammivavut soorlu filmiliortarneq, ilusilersuisartut aamma pinngortitami tunisassianik soqutiginartunik isumassarsiat, soorlu aalisakkat perlukuinik qimminut nerisassat, amermut tarngutit naasunik qaleruanillu akullit, aammattaaq illu naatitsivik aqqutigalugit imminut pilersornerulernissamut periarfissat. Ikittuinnaat eqqaassagaanni.
Peqatigiiffimmit Naalakkersuisut siulittaasuat atorfilittaalu inuussutissarsiornermik pingaartitsinerat pillugu qutsavigingaarpagut. Tamanna ukiuni aggersuni ingerlalluarnissamut ilimasaarutaavoq tassani… ”Inussutissarsiorneq piunngippat inuussutissarsiorneq taaneqarsinnaanngilaq”