Diskobay Tours suliffeqarfiuvoq Kalaallit Nunaata pinngortitaanut kulturianullu ataqqinnilluni ineriartortinneqarsimasoq. Suliffeqarfik maanna Ilulissani inissisimasoq, ukiorpassuarni misigisassanik pilersitsiffiusimavoq, taannalu aqqutialugu takornariarpassuit Kalaallit Nunaata nunataa immikkuullarissoq kulturikkullu oqaluttuassartaa qanimut misigisassarsiorfigisarsimavaat.
Diskobay Tours Qasigiannguani aallartinneqarpoq, taamanilu qimussiussineq tammaviutsussanillu piniartitsineq ingerlanneqarsimalluni. Piffissap ingerlanerani ingerlatat annertusarneratigut pisuttuartitsineq angallassineq kiisalu Ilimanamut sermersuarmik ulluinnarlugu takornariartitsineq pisalersimapput. Ineriartornermi inissaq sulisullu amerlanerit pisariaqartinneqalersimapput, taamaattumik suliffeqarfik Ilulissanut nuunneqarsimavoq, Tassanilu akulerulluarsimaqaat, maannakkullu takornariaqarnerup iluani ingerlatsisutut pingaartutut inissisimalersimapput, illoqarfimmilu angallassinermik ingerlatsisut pikkoreqisut peqatigalugit pitsaasumik tunngaviliisimallutik.
Suliffeqarfik piujuartitsinermik aammalu sumiiffimmi aallussinissaq tunngavigalugu ingerlariuseqarpoq. Diskobay Toursimi angallassisut nunaqavissuunngikkunik Kalaallit Nunaannut attuumassuteqarluinnartuupput. Tamanna isumaqarpoq angallassisut angallassinerminni namminneq misilittakkatik oqaluttuassatillu atortaraat, tamannalu peqqutaalluni takornarissanut inuunerisimasaq pillugu oqaluttuartoqarsinnaavoq, misigisallu piviusuunerulertarlutik. Angallassisartut saniatigut suliffeqarfik aalisartunik, soraarnerussutisialinnik ilinniartunillu sulisitsisarpoq, taamaalilluni sumiiffimmi aamma suliffissaqartitsisoqarlunilu attaveqartitsisoqarpoq.
Diskobay Toursimi qimussiussineq pingaarutilittut inissisimavoq. Qimmit 59-t suliffeqarfimmi pigineqarnerisigut qimmit qimuttut Kalaallit Nunaanni piujuartinneqarnissaat pingaaruteqartumillu inissisimanissaat peqataaffigineqarpoq. Qimmit oqaluttuassartaat suliarisartagaallu takornarissanut oqaluttuarineqartarpoq. Ukiukkut qimussiussisoqalertillugu takornarissat qimminik piareersaaqataasinnaasarput, angerlamullu apuunnermi nerisitseqataasinnaasarlutik. Aasakkullu qimmit allatorluinnaq atorneqartarput, tassami kulturikkut pingaaruteqassusaat takornarissanut oqaluttuarineqalertarpoq takornarissallu qanimut qimmit tikillugit paasisaqarsinnaasarlutik.
Aasakkut sermersuarmut angallassineq soqutigineqarluinnartarpoq. Angallassineq Ilulissani aallartittarpoq, takornarissallu Ilimanaliaanneqartarput, angallatillu amfibiet atorlugit nunakkoorteriarlugit Tasiusap kangerluani imaatigut angallanneqartarlutik. Sermersuup eqqaani naatsumut pisuttuartarput, taamaalillutik sermersuup annertussusaa qanimut takuneqarsinnaasarluni. Angallassineq pilersaarusiorluarneratigut pinngortitamut sunniutit annikinnerutinniarneqartarput, Diskobay Toursimilu angallatit nunamut malunnanngitsitsinerpaat atorneqartarlutik.
Najugaqartunik suleqateqarneq Diskobay Toursip angusarissaarneranut pingaaruteqarput. Suliffeqarfik Qasigiannguani katersugaasivimmut, najugaqartunut allanullu suleqateqarpoq, taamaaliornikkut takornarialerineq ataatsimoorluni ineriartortinneqarsimalluni. Ilulissanilu periuseq taanna aamma ingerlanneqarsimavoq, taamaattumik suliffeqarfiup aalisartut najugaqartut angallassisutut atortarpaat aammalu sumiiffimmi eqqumiitsuliortut sanalugaat eqqumiitsuliaallu tuniniarneqartarlutik. Takornariaqarnerup ineriartortinneqarnerani anguniarneqarpoq takornarissat amerliartuinnaratik ineriartorneq najugaqartunut aamma iluaqutaassasoq, taannalu misigisassanut aamma ilaaginnassasoq.
Ukiuni kingullerni Diskobay Toursimi allannguutit annertuut pisimapput. Ilulissanut nuunneq naleqqussartariaqarnermik kinguneqarsimavoq, aammalu suliffeqarfiup suussusaa isiginiarneqartariaqarsimalluni kiisalu sumiiffimmi ingerlatsisut suleqatigineqarnissaat aamma sulissutigineqarsimalluni. Unammilligassaqartaraluartoq Diskobay Toursi akulerulluarsimavoq, pingaarnertullu pingaartitatik ineriartortissimallugit.
Diskobay Toursimi anguniarneqarpoq Kalaallit Nunaanni ukioq naallugu takornariaqarnerup ineriartortinneqarnissaa. Suliffeqarfimmit sumiiffimmi angallassisartut ineriartortinneqarnissaat suleqataaffigineqassaaq, takornariaqarnerullu iluani suleqatigisartakkat qanimut suleqatigineqassallutik. Takornariaqarneq pillugu inatsisissap ineriartornissaq periarfississavaa sumiiffinnilu ingerlatsisut atugarissaarnerulissallutik, Diskobay Toursimiillu periarfissat takkuttussat tigulluarneqarumaarput.
Piujuartitsinermik tunngaveqarluni ingerlatsinissaq Diskobay Toursimi attatiinnarneqassaaq. Suliffeqarfimmi qamuteralaat atorneveersaarneqarput, qimussillu atuunnarneqarlutik, taakkuami pinngortitamut sunniutaat annikinneruvoq Kalaallit Nunaatalu kulturikkut kingornussassaannut pingaaruteqarlutik.
Kalaallit Nunaannut takornariarnissat takorloorukku, taava Diskobay Toursimik atuinissat innersuupparput, attaveqarfiginiarlugillu sumiiffimmi angallassisunut attaviginniinnassaatit. Kalaallit Nunaanni misigineqarsinnaasut arlaqarput, Ilulissallu aasakkut ukiukkulluunniit takornariarniaruit aallartiffissatsialaavoq.