Suliffiit pisortat pigisaanni ataatsimeersuarnerit ingerlaleruttorput Sulisitsisuniillu ataatsimiinnerit 2021-mi nittartakkatigut ilineqarsimasut pissusissamisut malinnaavigaagut.
Aallarniutitut Naalakkersuisut Siulittaasuat nersualaarusupparput suliffeqarfinnut oqalugiaammini siulersuisut, aqutsisoqarfiit sulisullu angusaannik qujaffigimmagit. inissaminiilluinnarpoq – suliffeqarfiit 2020 ingerlanerani unammilligassaqangaatsiarsimapput matumani covid-19 kingunerisimasaanik.
Oqalugaatip suliffeqarfiit inuiaqatigiinni akisussaaffiat suliffeqarfiillu pisortanit pigineqartut piffikkaartumillu politikkikkut atortorineqarsinnaasut immikkut sammineqarlutik. Pitsaasuuvoq suliffeqarfiit pisortanit pigineqartut inuiaqatigiinni akisussaaffiat Naalakkersuisuniit taakkartorneqassappat, Sulisitsisuniillu kaammattuutigerusupparput sulineq akisussaaffillu inuiaqatigiinni pigissaarnermik pilersitsisussat suliffeqarfinnut nuutsinneqannginnissaat, soorlu inissialiortiternerit immaqaluunniit meeqqanut inuusuttunullu suliniutit.
Suliffeqarfiit inuiaqatigiinni akisussaaqataanerat, soorlu CSR (Corporate Social Rosponsibility) taaneqartartoq, pingaartitamit “ataatsimoorluta angusaqarnerusinnaavugut”-mit tunngaveqarpoq. Inuiaqatigiinni pigissaarnerup inissisimanerata annertoqisumik pisortat ingerlatsineranneersumiilluta, killeqarportaaq pisortat ksimiillutik qanoq angusaqartigisinnaaneranik. Tamatumani suliffeqarfiit aaliangiisooqataalertarput, pisortammi namminersorlutillu inuussutissarsiutillit suleqatigiileraangata angusarissaarnerusaratta, akerleriinnarmiit. Namminersorlutilli inuussutissarsiortut silarsuarmut pilersitaapput suliassaq aaliangersimaqqissaartoq suliarissallugu, CSR-minnilu suliniutit sikkerartitsisussat.
Sulisitsisut Siulittaasup oqalugiaataani ujartorpaat suliffeqarfiit immikkorluinnaq suliaat immikkut isiginiarneqarnissaa. Angallassinermiisinnaavoq, attaveqaqatigiinnermiisinnaavoq imaluunniit silaannakkut angallannermi. Immikkorluinnaq suliassaq suliffeqarfinniittoq pikialaartitsinikkut kultureqarnikkullu ineriartortitsisussaanngilaq, meeqqanut inuusuttunullu suliniutinik annertusaasussaanngillat, ataasiartumik suliniaqatigiiffimmut aningaasaliisinnaanngillat imaluunniit inissialiortiterlutik.
Oqaatsit allat atussagaanni CSR-iunngilaq kukkunersiuinermik suliffeqarfik kukkunersiuisut pingasut ilinniartut inissiaannik sanajartotinneqassasut. Ilisimasaq nukissamillu atuinerlunneruinnarpoq, kukkunersiunermik suliffeqarfiup akileeqataaffigisariaqagaa. Ilinniarsimasut allat kukkunersiusuniit ilinniartut inissialiornissamik pikkorinnerupput. CSR-iussaarli kukkunersiuinermut suliffeqarfik ilinniartut peqatigiiffiannut naatsorsuuserinermut kukkunersiuinermullu piginnaasatik isaakkunikkit.
Soorunami Naalakkersuisut suliffeqarfinnut piginnittutut piumasaqarsinnaapput, Naalakkersuisulli nunatta aqunneqarnerani siuttuupput politikkikkullu akisussaaffeqarlutik qanoq nunatta unammilligassai qaangerneqassaneranik siuttuusussat. Sulisitsisuniit ernummatigaarput pisortaniit suliassat aktiatigut suliffeqarfinnut tunniunneqartalernissat, immikkorluinnaq suliartik sammineraniik inuiaqatigiinni suliassanut ilinniarfigisimanngisaminut nukinnik atuisinneqalerlutik.
Royal Arctik Line aningaasartuuteqarnikkut aammalu ingerlatseriaatsikkut eqaatsumik ingerlatsisussaavoq, TELEPOST oqarasuaateqarnikkut internetteqarnikkullu aalajaatsunik aningaasatigullu akilersinnaasunik tunniussisussaavoq aammalu Air Greenland isumannaatsumik, akikinnerpaamik pitsaanerpaamillu timmisartuussisussaavoq tassa assersuutigineqarsinnaasut. Taakkulu tamarmik avatangiisitigut minguitsuusussaallutik. Suliffeqarfiit eqqaaneqartut nunatta attaveqaqatigiinnikkut pingaaruteqarluinnarput taamatullu uagut sinnerinut akuusinnaanitsinnut ingerlatsisinnaanitsinnullu tunngaviliisuullutik.
Pifikkaartumik politikkeqarneq uagut paasinnittaasitsinni, Naalakkersuisut attaveqaatitigut ingerlatsiniarnertik suliffeqarfiit taaneqartut atorlugit piffikkaartumik ingerlatsiniartuuvoq, imatuunngitsorlu attaveqaatit pisorresut atorluarlugit isumaginninnikkut aammalu isumatusaartumik isumassuinissamut.
Siulittaasup oqalugiaammini suliffeqarfiit pisortat pigisai sulisuminik ikilisaannginnissaa eqqaavaa. Kisianni amigartoornerit annertuut CSR-mi inuiaqatigiinnilu akisussaaffimmi naapertuutinngilaq, aamma suliffiit paariinnarsimagaluaraanniluunniit. Aqutsisut eqaallisaanerit inuiaqatigiinni alunniuteqartussanik suliaqarsimasut nersugassaapput, sulisunik ikilisaanernik kinguneqarsimagaluarpataluunniit. Brancheni unammilleqatigiiffiusuni suliffeqarfiit pisortanit aningaasalersorneqartuusut, amigartoornernilli ingerlasut unammilleqatigiinnikkut equsoortitsisinnaasarput, ingammik suliffeqarfiit nunatta karsianit aningaasalersorneqartuusimanngikkaangata.
CSR aamma inatsi malinneqarnerata tamallu naligiittussaanerata pingaartitat malinneqarnerisa kinguneraa, soorlu assersuutigigaanni pisariaqavissuni suliunnaarsitsinerni. Politikkikkut inuiaqatigiit aaliangersimasunut pingaarnersiuinissamut peqqusinerit ajornartorsiutitut taaneqartariaqarput.
Inuiaqatigiinni akisussaaffik suliffimmiit tiguneqarsinnaasoq annerpaaq tassaavoq, immikorluinnaq suliaq naammassisinnaasaq aningaasatigut nammaqatigiissumik, ataavartumik aammalu inatsi atuuttumut naapertuuttumik ingerlataq, peqqutigerpiarlugu piffikkaartumik pisuunngortitsisarmat taavalu pisortanit politikkerineqartumut aningaasaleeqataasuusarmat. Aqutsisunit tamanit naluneqanngilaq angusat kusanartut anguniarneranut sulisut pikkorissut aalajaatsullu pingaarnernut ilaasartut. Tassanilu piulersarpoq sulisunut ilaqutaasunullu attaveqarneq peqqissoq, aammalu siunissami sulisussat – pinngorumaartussallu.
Naalakkersuisut naalakkersuisooqatigiinnissamut isumaqatigiissumminni aammalu suliffeqarnermut periusissiaminni ataavartumik ingerlatsineq inuiaqatigiinnullu akisussaassuseq immikkut maluginiarsimasaat pitsaasuuvoq, kisiannili inuussutissarsiortut tungaaniit kaammattuutigerusupparput aaqutsisutut akisussaaassuseqartutut akisussaaffik allamut milorujunneqannginnissaanik. Namminersorlutik inuussutissarsiortunik suleqateqarneq angusaqarnerusnissamik kinguneqassooq, kisiannili inuussutissarsiortut naatsorsuutigineqassanngilaq pisortat suliassaanik naammassinninniarsarissasoq. Pisortat sulaissaanik namminersorlutik inuussutissarsiortunut tunniussineq naalakkersuisoqarfitsigut ammasumik ingerlatsinerunngilaq, naak demokratiiusumik pigissaarnissamillu inuiaqatigiiusuni tunngaviugaluartoq, ilaatigullu aaqqissuussaanikkut inissisimaneq illuartinneqarlunilusooq ingerlatsisoqalissaaq pisortat suliassaat inuiaqatigiit qinigaat avaqqullugit suliffeqarfiit aktiaateqarfiusut aqqutigalugit ingerlannialissagaanni.
Suliffeqarfik ingerlalluartoq aningaasarsiortarpoq ineriartortitsisarlunilu. Suliffissanik malitseqartarpoq piffikkaartunilu akileraarutitigut isertitsissutaasumik, soorlu suliffeqarfiit tunniussaat aamma inuiaqatigiinni pisuunngortitsisartoq. Suliffeqarfiit inuiaqatigiit pigissaarnerannut aningaasaleeqataavoq, pisortallu aaqqissuussaanissaat pisussaaffigaat. Niuerfinni unammilleqatigiiffiusuni pisisoq tassaasarpoq qanoq kiffartuussinerup akeqarnissaanik ilusilersueqataasoq. Niuerfinni kisermaassiffiusuni pisisoq pisussaaginnartarpoq akiutinneqartoq akilissallugu – aamma akigitinneqartumiit pisiarisaq nalikinnerugaluarpalluunniit kisiannili politikkikkut anguniakkamut aningaasaleeqataasussaq, naak akileraarutitigut aningaasalersugassaagaluaq.
Suliffeqarfiit pisortanit pigineqartut nersualaagassaapput suli perusunnermigut aammalu inuiaqatigiinni akisussaaqataanermigut. Suliffeqarfiit arlallit ukiumut nalunaarumminni inuiaqatigiinni akisussaaqataanertik saqqummersittarpaat, soorlu ataavartumik ingerltsiniarnermi aammalu FN anguniagai 17-iusut qanoq anguniaqataanerlugit, taakkulu ulluinnarni ingerltsinerminni malunnartinnerlugit. Sulisitsisuniit piumaffiginnikkusuppugut tamanna isumaq ingerlanneqaannarnissaa, CSR-mmi isumaa nalingalu tassaniimmat, ilutigisaannilu aamma immikkorluinnaq tunniussinnaasaq sammisaralugu.