Ullumikkut nunarsuaq tamakkerlugu Arnat Ulluat nalliussineqarpoq.
Sulisitsisut inuussutissarsiornermik ingerlatsisut kaammattorumavai ullorsiorneq tunngavigalugu eqqarsaatigeqqullugu, suliffeqarfiit qanoq ilillutik piginnaasallit qanorluunniit suiaassuseqaraluarpata sinaakkutissaannik pilersitseqqullugit.
Suliffeqarfiit iluatsilluarnissaannut aalajangiisuulluinnarpoq, pikkorissunik piginnaanilinnillu sulisoqarnisaat aamma pisortanik. Piginnaasat nukiillu suiaassuseq apeqqutiginagu atortariaqarput aamma ukiut, inuiaassuseq, angutaaguni arnaagunilu, ilinniagaqarneq, tunuliaqutaq il.il., suliffeqarfiutigut pitsaanerpaanik nioqqutissiassanik sullissinernillu isumassarsissappata, imminnut inuiaqatigiillu ineriartornissaannut, iluatsilluarnissaannut aammalu aningaasarsiorluarnissaannut.
Kisitsisit taamaallaat arriitsumik nikikkiartorput. Kisianni inuussutissarsiortut akornanni pisortat arnat siuttuusut amerliartorput – taakkua ilaat tassaavoq Rina Reimer, Aasiaat Olie-mi piginneqataasoq pisortaasorlu. Arnanut assersuutissaavoq, piginnaassutsiminik periarfissaminillu tunineqarnermini atuarluaasimasutut.
Rina siullermik napparsimasunik paarsisutut ilinniarsimavoq. Ukiut arlallit napparsimasunik paarsisooreerluni aamma marloriarluni ernereerluni, suliani isumaalu nakeriunnaarsimavai. Piffissap tamatuma nalaani Aasiaat Olie-mit attavigineqarsimavoq, neqeroorutitsialammik nalunaaruteqartunik: Pisortanngorusussinnaanersoq aperivaat? Tamanna eqqarsaatigilluagassaavoq kisianni qujalluni akuersivoq aamma sunnguamilluunniit peqqissumissutigisimanngilaa.
Rina-p maannakkut oqaluttuarigaangamiuk, ilaatigut, neriuutigigamiuk, maligassiuisutut arnat allat isummersorsinnaallugit takutillugillu, ingerlalluarneq ilaqutariittullu inuuneq ajunngitsumik ingerlanneqarsinnaasut, ilinniagaqarsimagaanni, pilersaarusioraanni tunuliaqutagissaarlunilu tapersersortigisanik.
Rina isumaqanngilaq, suiaassuseq oqaluuserineqassasoq. Namminerpiarmi isumaqarpoq piginnaasat soqutigisallu apeqqutaasut.
!Taakku, piumasut, pisortanngortarput. Pingasut tassani pineqarput: Pisinnaaneq aamma soqutiginninneq piumassuseqarnerlu. Suiaassuseq apeqqutaanngilaq. Allakkut aallartissaagut. Alapernaassusermik soqutiginninnermillu meerartatta akornanni pilersitsissaagut. Tamanna maligassiuisuussaaq. Suiaassuseq apeqqutaatinnagu,” taama oqarpoq Rina.
Napparsimasunik paarsisutut ilinniagaqarnermini tamakku pisussatut naatsorsuutigineqanngillat, Rina pisortanngussasoq pisiniarfiutinilu ingerlatissallugu. Taanna sioqqullu akuersinnginnermini eqqarsaatigilluaqqaartariaqarsimavoq, taama Rina oqaluttuarpoq:
”Ukioq ataaseq atorlugu iluaqutaasinnaasut ajoqutaasinnaasullu eqqarsaatigeqqaarpakka, taassumami malitsigisussaavaa allamut saariarneq. Uannut taanna isumaqarpoq, ilaquttanut tunngatillugu ajunnginnerusumik ingerlanissaq. Pisortatut atorfeqarlerninni kiffaanngissusermik pinasuarsinnaanermillu peqalerpunga, taamaasillunilu ilaqutariiusugut angalanissanut periarfissaqalerpugut aamma ilaatigut ilaquttagut Danmarkimut tikeraarsinnaanngorlugit. Illuatungaatigut taanna silarsuaq iserfigiligassara nutaalluinnartuuvoq. Niuernermik ingerlatsinissaq ilinnialertussaavara. Kisianni taanna ersigisimanngilara, nalunnginnakkumi, tunuliaquteqarlunga tapersersortigisannik. Tamanna peqatigitillugu nutaanut tunngasunut iserluarsinnaallunga – nalunngilaralu, atorfissaqartissallugu. Nalunngilara, assoroornartorujussuussasoq, kisianni ukiut qulit qaangiunnerini oqarsinnaanngorpunga: Taanna imminut akilerluarpoq.
Alapernaatsuunera tunngavigalugu tamanna ingerlanneqarsimavoq. Taamak isumaqarpunga, meerarnermiit taanna pigineqassasoq. Atuarnermi alapernaassuseq siuarsartariaqarpoq. Meerartagut nutaanik ilikkassallutik soqutigisariaqarpaat aamma silatunerulernissartik. Taamaattumik Aasianni atuarfimmi pilersaarutinik peqatigiiffitsini suliniutinut suleqataalersimavunga. Meeqqanut ilinniakkerivimmik cáfeliorsimavugut. Suliffipput pillugu atuarfimmut oqaluttuariartortarpugut, aamma suliffeqarfitsinnut qaaqqusarpagut takornariartillugit. Tupinnaqaaq meeqqat akornanni allanngorneq malugalugu, periarfissarpassuatik takugaangamikkit – piumagunik.
Sinnattoraara, inuusuttut amerlanerusut ilinniagaqalernissaat. Uanga nukappiaraatinnut aamma kinguaariittut takkuttussanut neriuutigaara, ilikkarusussusiat ilisimasaqarusussusiallu isumaqarumaartoq, inuunerminni periarfissat tigujumasassagaat. Tamatumani piumasaqaataavoq, apeqqusiisassagamik kiisalu silarsuarmi inuuffigisarput pillugu apeqqusiisassagamik.
Inuusuttunut pitsaasunik siunnersuuteqassaguma, taava una pineqarpoq: Eqqarsaatigissanngilat angutaanerlutit arnaanerlutilluunniit. Alapernaassutsit ineriartortiguk aamma silarsuaq inuuffigisarput soqutigisariuk. Imminut isumaginissat ineriartornerillu akisussaaffigiuk. Taamaasioruit taava silarsuaq ilinnut ammavoq.”