| Ukioq manna siusinnerusukkut Nukissiorfiit Nuummi ungasissumi kiassarnermut suliniut nutaaq suliariumannittussarsiuussissutigaat. Suliniummi Industrivej Nordimut ungasissumi kiassarnermut aqqut nutaaq pineqarpoq, tassanilu suliffeqarfiit siunissami mingutsitsinngitsumik kiassarnermut attaveqalernissamut neqeroorfigineqarput. Neqeroorut manna malitseqarpoq ukiumi kingullermi inuussutissarsiuteqartunut amerlasuunut katillugit 13-it missaannik immikkoortortamut attaviliinernik pilersitsinermut, taamaalillutik taakku uuliamik kiassarnermik taarsiullugu ungasianiit kiassarnermik mingutsitsinnginnerusumik atuinissamut periarfissaqalerput. Periarfissaq taanna suliffeqarfinnit sumiiffimmiittunit annertuumik tapersersorneqarpoq. Inuussutissarsiortut mingutsitsinnginnerusunik aaqqiissutissanik atuinerulernermut nuukkiartortut Kalaallit Nunaanni inuussutissarsiortut akornanni piujuartitsinerusunut aaqqiissutissanut nuukkiartorneq pingaarnerpaat akornanniippoq, aammalu ungasianiit kiassarnermik siaruarterineq suliffeqarfiit namminneq allannguinermut toqqaannartumik peqataaffigisinnaasaannik aammalu iluaqutigisinnaasaannik alloriarnerusutut takutitsisimavoq. "Industrivej Syd-imi misilittakkat takutippaat suliffeqarfiit nukissiuutit piujuartitsinerusut kissaatigigaat aammalu toqqartarigaat, attaveqaasersuutit pisariaqartinneqartut pigineqaraangata. Taamaattumik Nukissiorfiit kissaatigaat sumiiffinni, allannguinermut mingutsitsinnginnerusumut iluaqutaaginnanngitsumik, aammali Nukissiorfiit inuiaqatigiillu aningaasaqarnikkut pitsaanerusumik atugassaqartinneqarnissaannut iluaqutaasinnaasuni, attaveqaasersuutinik periarfissanik pilersitsinissaq misiliiffigissallugu" Nukissiorfiit Nukissiornermut Pisortaat Johan Danielsen Sulisitsisunut oqarpoq. Industrivej Nord-imi suliniut nutaaq aqqutigalugu inuussutissarsiortunut periarfissat amerlanerusut pilersinneqassapput, tamannalu Sulisitsisut nuannaarutigalugu tikilluaqquaa, pingaartumik piffissami matumani sanaartornermik ingerlataqartartut amerlanerit inissialiornerni suliniutit ikiliartornerisa kingunerisaanik suliassaqannginnerulermata. Sulisitsisuni pisortaq Christian Keldsen ima oqarpoq: "Mingutsitsinnginnerusumut nuukkiartorneq avatangiisinut iluaqutaannaanngilaq, aammali kalaallit inuussutissarsiutaannik nukittorsaaqataavoq, tassami suliniutinut taamaattunut sanaartornermik aamma atortulersuinermik suliffeqarfiit najukkami tunngaveqartut atorneqarmata. Pingaaruteqarpoq suliffeqarfik pisortanit pigineqartoq soorlu Nukissiorfiit sanaartornermut aammalu illuliortiterinermut suliassaqarfimmi piumasaqaateqarnermik pilersitsisarnissaa. Illoqarfitsinni entreprenørit suliatik annikillisittariaqassavaat suliatik ataavartumik ingerlaannartumillu ingerlassinnaanngikkunikkit. Taamaalilluta siunissami ineriartortitsinermik malinnaaniarneq suli ajornarnerulissaaq – tamanna inuiaqatigiit aningaasaqarnerannut pitsaasuunavianngilaq." |
